20°C , Partly sunny | Kigali-Rwanda
Umukuru w'Igihugu Paul Kagame arimo kugeza ijambo ku bitabiriye Inama y'igihugu y'Umushyikirano ku munsi wawo wa nyuma

Kagame yamaganye ihohoterwa n’ibiyobyabwenge

Yanditswe na admin

Ku ya 20-12-2017 saa 07:16:47

Perezida Paul Kagame yavuze ko Inama y’Igihugu y’Umushyikirano ku nshuro ya 15 yagenze neza kuko yabaye ingirakamaro, aboneraho kwamagana ikoreshwa ry’ibiyobyabwenge ndetse n’ihohoterwa.

Ubwo yasozaga inama y’igihugu y’umushyikirano ejo hashize tariki ya 19 Ukoboza 2017, Perezida Paul Kagame yavuze ko ibiyobyabwenge ari icyorezo. Ati “U Rwanda nta bwo ari ikirwa, ibiyobyabwenge ni icyorezo kiri hose ku isi yose dusabwa kurwanya duhereye mu bato n’abakuru.

Tugomba kubirwanya ku buryo bubiri, kubikumira bitarinjira mu Rwanda, no kurwanya ibyageze mu gihugu. Ni ikibazo gikwiye kwitabwaho, tunigisha kuko bitari mu ndangagaciro zacu. Dukwiye gufata umwanya wo kubirwanya  kuko ibiyobyabwenge ni imungu imunga buri kintu cyose uhereye ku bantu, bikagera ku byo twubaka tutabirwanyije uko bikwiye.”

Kagame yagarutse ku kibazo k’ihohoterwa mu muryango, maze agira ati “Dukwiye kubaho twiyubaha twese, ariko by’umwihariko tukubaha abakobwa n’abagore uko bikwiye. Bakwiye kubahwa. Nta bwo mu muryango nyarwanda habamo ko hari ababerewe  gukubitwa. Tumaze gutera intambwe ariko dukwiye kurushaho kwiyubaha uko bikwiye.”

Akaba yaravuze ko iyi nama yagenze neza, kandi yabaye ingirakamaro, asaba abayobozi guha umwanya no gutega amatwi abaturage, kubaha ijambo, imikorere itarangwamo ruswa, gukoresha neza umutungo uhari, atari ukuwigwizaho, n’ubufatanye bw’inzego mu kwirinda no kwamagana ibibazo by’ihohoterwa mu miryango.

Ku birebana n’umuco wo kubahiriza igihe n’imvugo zidakwiye, Kagame yagize ati “Twavuye ku kibazo k’imitekerereze n’imigirire. Ibigomba guhinduka ni byinshi. Dukwiye kwishyiramo umuco wo gukoresha igihe cyacu neza no mu mvugo. Uko uvuga ni ko ukora. Imvugo tuyihindure ingiro. Kutubahiriza igihe ntibikwiye kuba kamere yacu.”

Mu gusoza yagize ati “Dukwiye gukoresha inzego z’ubuyobozi dufite. Nta bwo wagenda wubaka urwego rushinzwe buri kibazo. Inzego zirahari, mureke tuzikoreshe. Ibishoboka bikorwe, ibidashoboka harebwe uko twatera intambwe tuzakigereho.”

TWAGIRA WILSON

TANGA IGITEKEREZO

Leave a Reply

Your email address will not be published. Required fields are marked *