28°C , Sunny | Kigali-Rwanda

Kagame yakiriye Van Rompuy wahoze ari Minisitiri w’Intebe w’u Bubiligi

Yanditswe na Mugabo Lambert

Ku ya 04-09-2019 saa 07:29:07
Perezida Paul Kagame na Hon. Herman Van Rompuy wigeze kuba Minisitiri w'Intebe w'u Bubiligi

Umukuru w’Igihugu Paul Kagame, yakiriye mu biro bye Herman Van Rompuy, wahoze ari Minisitiri w‘Intebe w’Ubwami bw’u Bubiligi, akaba yaranabaye Perezida w’Inama y’Umuryango w’Ubumwe bw’u Burayi (European Council).

Perezida Paul Kagame yakiriye Herman Van Rompuy nyuma y’uko Van Rompuy yari amaze gutanga ikiganiro muri kaminiza y’u Rwanda, mu ishami ry’Ubumenyi n’Ikoranabuhanga, gifite insanganyamatsiko igira iti “Umubano w’Umuryango w’Ubumwe bw’u Burayi n’Umuryango wa Afurika yunze Ubumwe”, n’ikindi kivuga “Uburezi n’Iterambere”.

Uyu Herman Van Rompuy akaba yaraje mu Rwanda nk’intumwa (Goodwill Ambassador) y’umuryango w’Ababiligi Uharanira Iterambere ry’Uburezi mu Rwanda, VVOB.

Intego y’uru ruzinduko rwe rw’iminsi itandatu ikaba ari ukureba uko uburezi buhagaze mu Rwanda muri rusange, no kunoza umubano hagati y’umuryango VVOB na Leta y’u Rwanda mu guteza imbere ireme ry’uburezi.

Ni yo mpamvu ku wa Mbere, tariki ya 2 Nzeri 2019, Van Rompuy yasuye rimwe mu mashuri akorana n’umuryango VVOB mu Karere ka Rwamagana, ahura kandi n’abayobozi b’ibigo by’amashuri byo mu Murenge wa Kigabiro muri ako karere, baganira ku mikoranire yabo n’umuryango VVOB.

Uruzinduko rwa Herman Van Rompuy mu Rwanda yarutangiye ku itariki ya mbere, akazarusoza ku ya 6 Nzeri 2019.

VVOB mu Rwanda ikorana bya hafi na Minisiteri y’Uburezi, Ikigo k’Igihugu Gishinzwe guteza Imbere Uburezi REB, Kaminuza y’u Rwanda Ishami ry’Uburezi, mu kuzamura ireme ry’uburezi binyuze mu mahugurwa ahabwa abayobozi b’ibigo by’amashuri ndetse no guhugura abarimu.

Perezida Paul Kagame na Hon. Herman Van Rompuy wigeze kuba Minisitiri w’Intebe w’u Bubiligi

TANGA IGITEKEREZO

Leave a Reply

Your email address will not be published. Required fields are marked *