25°C , Partly sunny | Kigali-Rwanda
Perezida Paul Kagame uwa gatatu uturutse ibumoso abanjirijwe na Ambasaderi w'u Buhinde Oscar Kerketta, uwa kabiri uvuye iburyo ni Minisitiri Sezibera Richard n'abari baherekeje ambasaderi w'u Buhinde

Kagame yakiriye abambasaderi bahagarariye ibihugu 9

Yanditswe na Twagira Wilson

Ku ya 05-12-2018 saa 19:14:47

Perezida Paul Kagame mu bihe bitandukanye kuri uyu wa 5 Ukuboza 2018 yakiriye abambasaderi 9 bamushyikirije inyandiko zibemerera guhagararira ibihugu byabo mu Rwanda.

Mu byo abo bambasaderi bahurizaho baganiriye n’Umukuru w’Igihugu harimo gukomeza ubufatanye n’ubutwererane mu nzego zitandukanye, cyane cyane mu rwego rwa dipolimasi.

Ambasaderi Oscar Kerketta waje guhagararira u Buhinde mu Rwanda ari na we wabimburiye abandi kwakirwa na Perezida Paul Kagame, yabwiye itangazamakuru ati: “U Rwanda tugiye gufatanya mu nzego zitandukanye, nk’ubu nyuma y’uruzinduko rwa Minisitiri w’Intebe wacu Narendra Modi wasize agabiye inka abanyarwanda, nzakomeza kubakira ku byo yasize akoze cyane dufatanya n’u Rwanda mu rwego rw’ubuhinzi, uburezi, urugero nk’umushinga w’isomero ry’ikoranabuhanga dusanzwe dushyigikira, gufasha ba rwiyemezamirimo n’ibindi.”

Perezida Paul Kagame uwa gatatu uturutse ibumoso abanjirijwe na Ambasaderi w’u Buhinde Oscar Kerketta, uwa kabiri uvuye iburyo ni Minisitiri Sezibera Richard n’abari baherekeje ambasaderi w’u Buhinde

Uhagarariye u Buhinde mu Rwanda ni ubwa mbere agiye kugira ikicaro i Kigali mu Rwanda, ubusanzwe ikicaro k’iy’i ambasade cyari i Kampala muri Uganda.

Amb. Dr. Christian Fellner waje guhagararira Austria mu Rwanda afite ikicaro i Nairobi muri Kenya, nyuma yo kwakirwa n’Umukuru w’Igihugu mu kiganiro n’abanyamakuru, yavuze ko ashyikirije inyandiko Perezida Kagame mu gihe Umukuru w’Igihugu ke cya Austria yitegura kuza mu Rwanda, aho azagirana ibiganiro na mugenzi we w’u Rwanda, mu buryo bw’umwihariko bakazibanda ku birebana n’ihuriro rikuru “Africa forum” rizavuga ku mugabane w’Afurika, iyo nama y’iryo huriro ikazabera i Vienna.

Ku birebana n’imikoranire hagati y’igihugu cya Austria n’u Rwanda, Amb. Fellner yagize ati: “Umubano w’igihugu mpagarariye n’u Rwanda uhagaze neza kandi tugiye gukomeza kuwushimangira, binyuze mu bucuruzi no mu rwego rwa politiki, kuko nk’ubu dufite amahuriro y’abacuruzi na ba rwiyemezamirimo bafite ibigo by’ubucuruzi binini bazakorana n’abo mu Rwanda, haba mu rwego rw’ingufu, ubuvuzi, ndetse no guteza imbere urwego rw’ubukerarugendo buteye imbere kuko Austria ni igihugu usanga hari aho kifashisha utumodoka two mu kirere bita “Cable Cars’’

Mu bandi Bambasaderi bakiriwe na Perezida Paul Kagame harimo Amb. Alison Helena Chartres uhagarariye Australia mu Rwanda, Fernando Estellita Lins de Salvo Coimbra wa Brazil, Frantisek Dihopolcek wa Repubulika ya Slovakia, Martin Gomez Bustillo uhagarariye Argentina, Ambasaderi w’igihugu cy’Angola Eduardo Filomeno Leiro Octavio, Amasaderi wa Indonesia Prof. Dr. Ratlan Pardede, Ambasaderi Uriel Garibay wa Philippines, watangaje ko umubano w’u Rwanda n’iki gihugu uzakomeza kuba mwiza kuko watangiye hambere muri 1971.

Perezida Paul Kagame yakiriye Ambasaderi wa Indonesia mu Rwanda Prof. Dr. Ratlan Pardede

TANGA IGITEKEREZO

Leave a Reply

Your email address will not be published. Required fields are marked *