26°C , Partly sunny | Kigali-Rwanda

Kagame yahaye imbabazi imfungwa 51, harekurwa n’abagororwa 3596

Yanditswe na Imvaho Nshya

Ku ya 18-05-2020 saa 22:20:54

Perezida wa Repubulika y’u Rwanda Paul Kagame, yamenyesheje Inama y’Abaminisitiri yateranye kuri uyu wa Mbere tariki 18 Gicurasi 2020, ko yahaye imbabazi umuntu umwe, n’imbabazi rusange abakobwa 50 bari barakatiwe n’inkiko kubera icyaha cyo gukuramo inda.

Inama y’Abaminisitiri kandi yemeje Iteka rya Minisitiri w’Intebe ryemeza ifungurwa ry’agateganyo ry’abagororwa 3596 bahamwe n’ibyaha binyuranye.

Inama y’Abaminisitiri yanavuguruye zimwe mu ngamba  zafashwe zo gukumira ikwirakwira ry’icyorezo cya COVID-19.

Inama y’Abaminisitiri yemeje Politiki, gahunda n’ingamba bikurikira:

  •  Imbanzirizamushinga y’itegeko rigena ingengo y’Imari ya Leta y’umwaka wa 2020/2021, hamwe n’imibare y’ikigereranyo k’ingengo y’imari y’igihe giciriritse k’imyaka itatu 2020/21-2022/23.
  • Ingamba zivuguruye mu gushyira mu bikorwa Amasezerano y’i Paris yerekeye imihindagurikire y’ikirere no kubungabunga ibidukikije;
  • Umushinga East Investment Company wo kubaka no guteza imbere Isoko rya Bugesera.

Inama y’Abaminisitiri yemeje imishinga y’amategeko ikurikira:

  • Umushinga w’itegeko rishyiraho Ikigo gishinzwe iby’Ikirere mu Rwanda (Rwanda Space Agency);
  • Umushinga w’itegeko ryemera kwemeza burundu amasezerano avuguruye ashyiraho Umuryango w’Ubukungu w’Ibihugu by’Afurika yo hagati (ECCAS);

Inama y’Abaminisitiri yunguranye ibitekerezo kuri gahunda yo guteza imbere siporo mu mashuri.

Inama y’Abaminisitiri yemeje ko aba bakurikira bahagararira ibihugu byabo ku rwego rw’Ambasaderi n’Umuryango Mpuzamahanga mu Rwanda:

  • Bwana Chae Jin-Weon; Ambasaderi wa Repubulika ya Koreya mu Rwanda ufite ikicaro i Kigali.
  • Bwana Jaspal Singh: Ambasaderi wa Repubulika ya Singapore mu Rwanda ufite ikicaro muri Singapore.
  • Bwana Jesus Agustin Manzanilla Puppo: Ambasaderi wa Repubulika ya Venezuela mu Rwanda ufite ikicaro i Nairobi.
  • Bwana Valentin Zellweger: Ambasaderi w’u Busuwisi mu Rwanda ufite ikicaro i Nairobi.

Uhagarariye Umuryango Mpuzamahanga 

  • Madamu Mama Keita: Umuyobozi w’Ibiro by’Akarere k’Afurika y’Iburasirazuba muri Komisiyo y’Ubukungu y’Umuryango w’Abibumbye ishinzwe Afurika (UNECA) ufite ikicaro i Kigali.

Inama y’Abaminisitiri yashyize mu myanya abayobozi ku buryo bukurikira:

  • Abagize Inama y’Ubutegetsi- Urwego rushinzwe Iterambere mu Rwanda (RDB)
  1. Itzhak Fisher: Perezida
  2. Evelyn Kamagaju, Visi Perezida
  3. Alice Nkulikiyinka, ugize Inama y’Ubutegetsi
  4. Diane Karusisi, ugize Inama y’Ubutegetsi
  5. Ivan Kagame, ugize Inama y’Ubutegetsi 
  6. Eric Kacou, ugize Inama y’Ubutegetsi
  7. Solange Uwituze, ugize Inama y’Ubutegetsi 
  8. Liban Soleman Abdi, ugize Inama y’Ubutegetsi
  9. Faith Keza, ugize Inama y’Ubutegetsi

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.