21°C , Partly sunny | Kigali-Rwanda
Perezida Kagame mu bihe byashize

Kagame yagarutse ku baturanyi bafasha RNC na FDLR mu ijambo rifungura umwaka

Yanditswe na Imvaho Nshya

Ku ya 01-01-2019 saa 04:14:56

Perezida Kagame mu ijambo rifungura umwaka wa 2019, yagarutse ku mutekano w’u Rwanda avuga ko uhamye nubwo hari abaturanyi batarwifuriza ibyiza.

Yavuze ko umubano w’u Rwanda n’ibihugu by’Afurika umeze neza ariko ko “hari ibibazo duterwa na bimwe mu bihugu duturanye”

Yavuze ko hari ibihugu bibiri bikorana n’imitwe ya RNC na FDLR, avuga ko hari amakuru yemeza ko iyo mikoranire ihari nubwo ibyo bihugu bibihakana. 

Ati “Bamwe mu baturanyi bacu bakomeje kugerageza gufasha kuzanzamura imitwe igamije guhungabanya umutekano w’u Rwanda nka FDLR, RNC n’abandi. Ibi bibangamira ibikorwa byiza ubundi bisanzwe biranga umuryango wa Afurika y’Iburasirazuba n’umutekano w’aka karere muri rusange.”

Perezida w’u Rwanda avuga ko imikoranire ya kimwe muri ibyo bihugu n’iyo mitwe idatangaje, ariko ko igitangaje ari ikindi gihugu gikorana na yo nubwo kitabyemera.

Perezida Kagame yagarutse ku musanzu u Rwanda rwatanze mu gusigasira ubumwe bw’Afurika, anahamya ko ubukungu bw’u Rwanda bwakomeje kuzamuka “ahanini bishingiye ku bumwe n’ubufatanye bw’Abanyarwanda.”

Yavuze ko “imiyoborere n’imibanire na byo bikomeje gutera imbere”, ahamya ko “no mu bindi nk’imikino Abanyarwanda berekanye ubushobozi bitwara neza ku rwego mpuzamahanga cyane cyane mu gusiganwa ku magare.

Ibi ni bimwe mu bikubiye mu ijambo ry’Umukuru w’Igihugu rifungura umwaka ushobora kureba uko ryakabaye muri video ikurikira.

TANGA IGITEKEREZO

Leave a Reply

Your email address will not be published. Required fields are marked *