18°C , Partly cloudy | Kigali-Rwanda

Kagame yagaragarije Abanyarwanda uko igihugu gihagaze

Yanditswe na admin

Ku ya 19-12-2017 saa 08:38:32

Perezida Paul Kagame ubwo yatangizaga Inama y’Igihugu y’Umushyikirano ku nshuro ya 15, ejo hashize tariki ya 18 Ukuboza 2017, yagaragaje uko igihugu gihagaze mu nzego zinyuranye, avuga ko hakwiye gukomeza gukorera hamwe hagamijwe kuzamura imibereho y’Abanyarwanda.

Perezida Paul Kagame yishimira ko kugeza ubu u Rwanda rumaze gukomera mu nzego zitandukanye zaba iz’ubukungu, imibereho myiza n’imiyoborere. Yagize ati “Reka rero dukoreshe aya mahirwe, dukomeze gukorera hamwe, tugamije kuzamura imibereho y’Abanyarwanda, ndetse n’iy’umugabane wacu w’Afurika.”

Avuga ku kumenya uko igihugu gihagaze, yagize ati “Kumenya uko Igihugu gihagaze ni isuzuma rigomba guhoraho, tukibaza ibibazo bitandukanye. Iterambere riragenda ku muvuduko twifuza? Twita ku mibereho y’Abanyarwanda bose uko bikwiye nta we usigaye inyuma? Inshingano yo kubaza no gusubiza ibi bibazo ni iyacu.”

Mu rwego rw’ubuhinzi rufatiye runini abaturage, umusaruro wiyongereye ku kigero cya 8%. Kagame ati “Ubuhinzi bwari bumaze igihe butiyongera. Ariko, muri uyu mwaka, umusaruro ubuturukamo wiyongereye ku gipimo cya 8%, n’ubwo habayeho ibibazo bitandukanye, birimo udukoko twona ibihingwa n’izuba ryavuye igihe kirekire mu bice bimwe.”

Yakomeje agira ati “Imbaraga z’abaturage ni zo zatumye habaho iyi mpinduka. Ndagira ngo mbibashimire, kandi mbasabe gukomerezaho. Ubufatanye bw’inzego za Leta bwatumye ibihabwa abahinzi bibageraho ku gihe, binagabanya ruswa ibigaragaramo. Kuhira imyaka na ko kwafashije kongera umusaruro. Twafashe ikemezo cyo gushora imari mu gutunganya imbuto mu gihugu kugira ngo twongere agaciro k’ibyo duhinga, kandi tugabanye gutegereza izivuye hanze, akenshi tutakwizera ko zizaboneka uko tubishaka.”

Mu rwego rwo guhanga imirimo mishya n’ingamba zashyizweho, Perezida Kagame avuga ko hari intambwe imaze guterwa bihereye mu rubyiruko, aho asanga nibura abana ubu barangiza amashuri baratangiye kugira umuco wo kwihangira imirimo.

Ku bukerarugendo, yagize ati “Ingamba zo guteza imbere ubukerarugendo bushingiye ku nama zibera mu gihugu, zatangiye gutanga umusaruro. Uyu mwaka u Rwanda rwakiriye inama mpuzamahanga 169. Zazaniye amahoteli n’indege zacu abakiliya babarirwa mu bihumbi byinshi. Abo bashyitsi basubira iwabo bishimye bavuga ibyiza babonye mu gihugu bigatuma n’abandi biyongera’’.

Mu rwego rw’ubukungu, Umukuru w’Igihugu yagize ati “Ku byerekeranye n’ubukungu, mu 2017, twandikishije ishoramari rishya, n’irindi rijyanye n’ibikorwaremezo, ringana n’amadolari y’Amerika miliyari 1.5. Aha harimo ikibuga mpuzamahanga k’indege cya Bugesera, ubu kirimo kubakwa.

Kuri ibi hiyongeraho kuba uburezi bufite ireme, ati “Muri urwo rwego, ndumva ko impinduka mu ireme ry’uburezi, ku nzego zose, igomba kuba kimwe muri gahunda dushyira imbere. Abantu bafite ubumenyi n’ubushobozi ni cyo kintu cya ngombwa ku gihugu kiri ku rwego rw’ubukungu rwo hejuru.”

Yavuze no ku mashanyarazi, ko yiyongera kandi Leta izakorana n’abashoramari mu nganda mu gushyiraho igiciro kidahenze kugira ngo abifuza gukoresha ayo mashanyarazi barusheho kuba benshi.

Ku bucukuzi, ati “Agaciro k’ibyo twohereza mu mahanga biturutse ku bucukuzi bw’amabuye y’agaciro ubu karuta ak’ibindi byose ducuruza mu mahanga bikubiye hamwe. Ibi tubikesha imbaraga zashyizwe mu kubyongerera agaciro bitaroherezwa no gushakisha ibindi bishya.”

Ku byerekeranye na politiki yo guteza imbere ibikorerwa mu Rwanda, Perezida Kagame yagize ati “Ingamba zo guteza imbere ibikorerwa mu Rwanda zongereye umusaruro. Ugereranyije n’umwaka ushize, ibyo twohereza hanze byiyongereyeho 50%. Ibyo dukura hanze byagabanutseho 3%. Kubera iyi mpamvu, ikinyuranyo mu bucuruzi n’amahanga cyaragabanutse ku kigero kirenze 20%.”

Mu zindi ngamba Perezida Kagame yagarutse no ku guteza imbere urwego rw’ubuzima, gukomeza gukusanya, kwandika no kubungabunga amateka, kurinda no gufata neza ibyagezweho.

TWAGIRA WILSON

TANGA IGITEKEREZO

Leave a Reply

Be the First to Comment!

avatar