17°C , Mostly cloudy | Kigali-Rwanda
Perezida Paul Kagame mu nama ya Viva Tech yagaragaje uko u Rwanda rwiyubatse mu myaka 25 ishize haherewe ku busa

Kagame yagaragaje uko u Rwanda rwiyubatse haherewe ku busa

Yanditswe na Twagira Wilson

Ku ya 18-05-2019 saa 17:14:45

Perezida Paul Kagame yagaragaje ko u Rwanda rwasenyutse, rusigara iheruheru mu nzego zitandukanye mu gihe cya Jenoside yakorewe Abatutsi mu 1994, ariko kandi ko rwashoboye kwishakamo ibisubizo ruriyubaka.

Yabivugiye mu nama mpuzamahanga ya 4 yiga ku iterambere ry’ikoranabuhanga, VIVATECH 2019 i Paris mu Bufaransa kuwa 17 Gicurasi 2019.

Perezida Kagame yagize ati “Nyuma y’imyaka 25 ishize u Rwanda rwahereye ku busa. Abantu amamiliyoni bari baravuye mu byabo, abasaga miliyoni barapfa.”

Yakomeje avuga ko n’ubwo bitari byoroshye hagombaga gushakishwa ibisubizo. Ati “Hashize imyaka 25, twashakishije aho guhera byari bikomeye. Ariko, twatangiye twegera abantu. Ni ubwiyunge, umutekano w’abantu, ni ubutabera.”

Umukuru w’Igihugu yagarutse ku kijyanye n’iterambere ry’u Rwanda. Ati “Guhindura u Rwanda, ni ugutekereza uko rwatera imbere mu mibereho n’ubukungu. Ntibihagije kugarura amahoro gusa mu gihugu, ubwiyunge mu muryango nyarwanda n’ubutabera ngo bihagararire aho.”

Kandi ati “Dushobora gukora byinshi. Uwo mutima ni wo watumye tugera ku iterambere rigaragara tumaze kugeraho kuri ubu. Uko umwaka utashye, ntiduhwema kwibutsa abaturage bacu ko atari abandi bazakemura ibibazo dufite, ko ahubwo ari twe ubwacu tugomba kubyikemurira, ko gusa abandi bagira uruhare mu kudushyigikira mu gushaka ibisubizo by’ibibazo byacu mu gihe dukoze ibyo dusabwa gukora ubwacu.”

Yagaragaje kandi ko bidahagije kubona ibiribwa ahubwo ko mu gihe byari bikomeye habonetse ubutabazi. Ati “Hari hariho ibikorwa by’ubutabazi, ibihugu byateye imbere, n’abatanga impano batangaga imfashanyo.”

Mu rwego rw’ubutabera ntibyari byoroshye, ariko byari umwihariko hibazwa uburyo inkiko zisanzwe zaburanisha abasaga miriyoni bagize uruhare muri Jenoside. Perezida Kagame yagize ati “Nyuma ya Jenoside, mu rwego rw’ubutabera byari umwihariko twibaza uburyo inkiko zisanzwe zaburanisha abasaga miriyoni, ariko u Rwanda rwatangiye uburyo bwo kwishakamo ibisubizo rukoresha Inkiko Gacaca kuko zafashije guca imanza nyinshi vuba kandi ku kiguzi gito. Urugero Inkiko Gacaca zaciye imanza za Jenoside zisaga miriyoni hakoreshwa miriyoni 37 z’amadorari y’Amerika, mu gihe urukiko mpuzamahanga mpanabyaha rwaciye imanza 62 rukoresha miriyari ebyiri zisaga z’amadorari y’Amerika.”

Umukuru w’Igihugu yavuze kandi ko bitagarukiye aho kuko hanatekerezwaga no ku zindi nzego z’ubuzima. Ati “Twakomereje no mu zindi nzego uburezi, ubuzima, ibikorwa remezo…. Tunatekereza ku ikoreshwa ry’ikoranabuhanga n’ikoreshwa ry’imibare hagamijwe ahazaza.”

Ku bijyanye n’iterambere ry’ubukungu hifashishijwe ikoranabuhanga, Perezida Paul Kagame yavuze ko hari ihuriro ryo hambere n’ubu. Ati “Mu ntangirio ikoranabuhanga ryabaye ikiraro gihuza ibyabanje, iby’ubu n’ahazaza kandi bigomba gukorwa guhera ubu. Iyo umuntu arebye iterambere ry’ubukungu bw’Afurika, buri gihugu cyakora ibishoboka kigashora imari mu ikoranabuhanga.”

Perezida Kagame yagarutse ku kamaro k’Ihuriro mu guteza imbere ubukungu bushingiye ku ikoranabuhanga, yibukije ko gukorera hamwe ari ngombwa. Ati “Twishyize hamwe mu Ihuriro Smart Africa rihuje ibihugu bigizwe n’abaturage bayingayinga miriyoni 600 bo ku mugabane w’Afurika. Si ngombwa kwita kuri politiki gusa, ahubwo no mu bindi nk’ubukungu, urujya n’uruza rw’abaturage muri Afurika ni ngombwa ko hakoreshwa ikoranabuhanga.”

Yongeyeho ati “Ni ngombwa ko ibihugu by’Afurika bigira umuyoboro umwe bihuriyeho w’ikoranabuhanga kuko ni bimwe mu bizatuma n’abatuye uyu mugabane bihuriza hamwe kandi ku buryo bworoshye, bikaba n’inyongeragaciro ku byo abantu bakora, ikoranabuhanga ryongera agaciro ku byo abantu bakora, nko mu micungire bikagenda neza.”

Mu kiganiro cyahuje Perezida Kagame na Perezida wa Senegali Macky Sall, Abakuru b’Ibihugu byombi bagaragaje intambwe Umugabane w’Afurika ugezeho mu bijyanye no kubaka ubukungu bushingiye ku ikoranabuhanga. Perezida Kagame yanashimiwe aho u Rwanda rugeze rutera imbere mu nzego zitandukanye zirimo n’urw’ikoranabuhanga rwabaye ipfundo mu guteza imbere izindi nzego zitandukanye nk’iz’uburezi, ubuzima, n’izindi nyuma ya Jenoside yakorewe Abatutsi.

Perezida Paul Kagame mu nama ya Viva Tech yagaragaje uko u Rwanda rwiyubatse mu myaka 25 ishize haherewe ku busa

TANGA IGITEKEREZO

Leave a Reply

Your email address will not be published. Required fields are marked *