19°C , Mostly cloudy | Kigali-Rwanda

Kagame yagaragaje ko u Rwanda rutanga ikizere ku ishoramari

Yanditswe na Twagira Wilson

Ku ya 07-03-2019 saa 12:26:41
Perezida Kagame aganira na Mckeel Hagerty wahoze ari umuyobozi w’umuryango YPO

Perezida Paul Kagame yabwiye abagize Umuryango w’abashoramari bagizwe n’abayobozi bakiri bato YPO, ko ari abafatanyabikorwa, kandi agaragaza ko u Rwanda rwivana mu bihe bikomeye by’ibibazo, ubu akaba ari igihugu gitanga ikizere ku ishoramari.

Ibyo Perezida Kagame yabivugiye mu gihugu cy’Afurika y’Epfo, kuwa Gatatu tariki 6 Werurwe 2019, aho yari yitabiriye inama mpuzamahanga y’iminsi ibiri y’abagize Ihuriro ry’abayobozi bakiri bato bafite ibikorwa by’ishoramari (Young Presidents Organization) baturutse mu bihugu bitandukanye byo ku Isi. Hari mu kiganiro kihariye yagiranye na Mckeel Hagerty wahoze ari umuyobozi  w’umuryango YPO, ikiganiro cyakurikiwe n’abantu bagera kuri 700.

Umukuru w’Igihugu Paul Kagame, ubwo yatangaga ikiganiro, ahari hateraniye abagize umuryango w’abashoramari bagizwe n’abayobozi bakiri bato, YPO

Ku birebana n’umutekano ku bikorwa by’abashaka kuza gushora imari yabo mu Rwanda, Perezida Kagame yabwiye abagize Umuryango w’abashoramari bakiri bato ko  amarembo y’u Rwanda afunguye, aho bashobora kuza gukorera  no gushora imari yabo batekanye.

Ati “Turifuza kubona muza mu Rwanda, aho muzaba mutekanye, n’ibikorwa byanyu by’ishoramari, kuko twifuza igihe cyose kubona umusaruro w’ibyavuye mu mbaraga zacu, u Rwanda nk’ahantu heza ho gukorera ibikorwa by’ubucuruzi. Twishyize mu mwanya w’abashoramari bo hanze, twabonaga bashobora kuvuga ngo aho kujya gukorera mu Rwanda, kuki ntajya mu kindi gihugu, bityo dushyiraho ibishobora  gufasha abo bikorera bo hanze kugira amahitamo yabo kandi biratanga ikizere.”

Yongeyeho ati “Uko igihe kigenda ibintu birushaho kugenda neza, tugerageza gushyira ku gipimo n’umusaruro uturuka mu byo dukora, kuko iyo  hari ibitagenda neza, ni twe bireba kandi tuba twagawa kandi nkumva  ari nge bireba. Ngomba gukora cyane, kandi nkagira n’umwanya wo kwita ku muryango wange.”

Itsinda ry’abashoramari b’abayobozi bakiri bato YPO riheruka gusura u Rwanda mu Gushyingo 2018, ubwo abagera kuri 80 baturukaga mu bihugu  nk’u Bubiligi, Amerika, Monaco, Luxembourg, Lebanon, u Bwongereza, Kenya ndetse n’abo mu biyaga bigari bagizwe n’abo mu Rwanda, Uganda, Burundi, RDC na Sudan y’Epfo.

YPO ni ihuriro ribera ku migabane itandukanye buri mwaka rikitabirwa n’abayobozi bagera ku 2500, by’umwihariko abitabiriye iryo huriro Umukuru w’Igihugu arimo bagera ku 130, bakaba baraganiriye ku ngingo zitandukanye zirimo guteza imbere ibikorwa by’ubucuruzi, politiki, ubumenyi n’ibikorwa by’ubugiraneza.

Perezida Kagame aganira na Mckeel Hagerty wahoze ari umuyobozi w’umuryango YPO

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.