17°C , Mostly cloudy | Kigali-Rwanda
Umukuru w'Igihugu Paul Kagame (ibumoso) ari kumwe na mugenzi we wa Gabon Ali Bongo Ondimba i Libreville muri Gabon

Kagame yagaragaje impamvu hari abataremeza amasezerano ya CFTA

Yanditswe na Mugabo Lambert

Ku ya 10-06-2019 saa 18:45:50

Mu ruzinduko rwe i Libreville mu gihugu cya Gabon, Umukuru w’Igihugu Paul Kagame, mu kiganiro n’abanyamakuru, yavuze ku isoko rusange ry’Afurika, CFTA, avuga ko kuba kugeza ubu hari ibihugu bitari byemeza amasezerano arishyiraho atari ukubera ko bitabishishikaje, hari impamvu zibitera zirimo n’amategeko.

Ni ku munsi w’ejo hashize ku wa Mbere tariki 10 Kamena 2019 Perezida Kagame yageze muri Gabon. Mu kiganiro n’abanyamakuru, hagarutswe ku isoko rihuriweho ku mugabane w’Afurika, avuga ko hakunze kugaragara impinduka nziza kuva amasezerano arishyiraho yashyirwaho umukono. Ati “Twageze ku mubare w’ibihugu byari bikenewe kwemeza amasezerano kugira ngo ashyirwe mu bikorwa.”

Perezida Paul Kagame yavuze ku mpamvu hari ibihugu bitari byemeza ayo masezerano, ko atari ubushake buke, agira ati: “N’ubwo abandi batari bayemeza, nta bwo ari ukubera ko bitabashishikaje cyangwa se kubera ko batabona ko bikenewe. Ahubwo ni ukubera ko bafite imbogamizi, zaba iziterwa n’amategeko cyangwa se iza tekinike, bakeneye kubanza kubikemura mbere y’uko batangira.”

Perezida Kagame yagiye muri Gabon mu gihe Perezida w’iki gihugu Ali Bongo Ondimba mu minsi yashize yari arwariye hanze y’Igihugu ke. Kagame akaba yaravuze ko uru ruzinduko n’ubwo rugamije gukomeza inzira yo gushimangira ubufatanye hagati y’ibihugu bya Gabon n’u Rwanda, harimo no gusura mugenzi we wari umaze iminsi atameze neza.

Yagize ati: “Bimpaye amahirwe yo gusura mugenzi wange wari umaze iminsi atameze neza. Nishimiye ko hari impinduka zigaragara ku buzima bwe, byatumye asubira mu nshingano ze […] Mu buryo bwa kinyafurika, dusura inshuti igihe ziri mu bihe byiza n’igihe zitari mu bihe byiza.”

Muri icyo kiganiro n’abanyamakuru, Umukuru w’Igihugu yagarutse ku mvururu ziba hirya no hino ku mugabane w’Afurika, avuga ko Afurika igomba gukorera hamwe, hakabaho gukorana, kuko nta bundi buryo bwo guhangana n’ibyo bibazo. Yashimangiye ko Perezida Bongo wa Gabon yakunze gukorana n’abandi bayobozi b’Ibihugu ku mugabane w’Afurika mu rwego rwo kuzamura iterambere ryawo.

Umukuru w’Igihugu Paul Kagame (ibumoso) ari kumwe na mugenzi we wa Gabon Ali Bongo Ondimba i Libreville muri Gabon

TANGA IGITEKEREZO

Leave a Reply

Your email address will not be published. Required fields are marked *