Kagame yafunguye Ishami ry’ikigo k’Iterambere rirambye muri Zambia

Yanditswe na Mutungirehe Samuel

Ku ya 07-08-2019 saa 19:39:42
Abayobozi banyuranye bitabiriye ifungurwa ry'ishami ry’ikigo kizashyira mu bikorwa Intego z’Iterambere Rirambye SDGs, ryashyizwe muri Zambia

Perezida Paul Kagame yafunguye ku mugaragaro ishami ry’ikigo kizashyira mu bikorwa Intego z’Iterambere Rirambye SDGs, ryashyizwe muri Zambia, rikazajya rifasha ibihugu byo muri Afurika y’Amajyepfo byose.

Ni umuhango wabaye kuri uyu wa 7 Kanama 2019, ubwo Perezida Paul Kagame uyoboye Inama y’Ubutegetsi y’iki Kigo muri Afurika gifite ikicaro mu Rwanda na mugenzi we Edgar Lungu wa Zambia bafunguraga ku mugaragaro iryo shami muri Hoteli ya “Mulungushi Conference Centre” iherereye i Lusaka muri Zambia.

Mu ijambo rye, Perezida Kagame yavuze ko yishimiye kongera gusubira muri Zambia, avuga ko iryo shami rifunguwe ku muhate mwiza Perezida Lungu yagaragaje na Guverinoma ya Zambia.

Nk’Umuyobozi w’Inama y’Ubutegetsi ya SDGs, Kagame yavuze ko yishimiye uko icyo kigo cyubatse, cyujuje ibyangombwa byose bizatuma kibasha kugera ku ntego zacyo.

Ati “Ikigo k’Intego z’Iterambere Rirambye SDGs, hamwe na gahunda y’Afurika Yunze Ubumwe 2063, biteganyijwe mu ishingiro ry’ahazaza abaturage bacu bagomba. Bisaba gushyiraho gahunda nziza no gushyiraho uburyo bwo kugenzura amakuru kugira ngo harebwe uko intego zigerwaho.

Akamaro k’iki kigo kuri Afurika ni ugufasha za Guverinoma muri uru rugamba, by’umwihariko mu gutanga inama tekenike mu kuzamura imibare igerwaho n’ubushakashatsi bufite ireme, isesengura bigendanye n’ibyo buri gihugu gifite.”

Perezida Kagame yakomeje avuga ko igisiyage ari uruhare rwa za Guverinoma, abikorera na sosiyete sivile mu kubyaza umusaruro ubushobozi buba butanzwe. Yashimangiye ko kugeza ubu habura ikinyacumi kimwe ngo gahunda ya 2030 igerweho ariko umugabane w’Afurika udahangayikishijwe no kugera kuri izo ntego.

Ati “Intego z’iterambere rirambye zifite akamaro kuri Afurika, ni yo mpamvu turimo kubikora nk’ibyacu. Icyo intego zigamije kirasobanutse, zigamije iterambere nyaryo ry’abaturage bacu. Impinduka nziza ku buzima, amahirwe ku bukungu, uburinganire bw’abagabo n’abagore, no kurengera ibidukikije n’ibindi nk’ibyo. Ibintu buri wese ashobora kubona no kumva mu mibereho ye.”

Umukuru w’Igihugu yavuze ko mu nama y’Inteko Rusange y’Umuryango w’Abibumbye (UNGA2019) iteganyijwe guterana mu kwezi gutaha kwa Nzeri 2019, Abakuru b’Ibihugu bazamurika ibiri kugerwaho mu kugera ku ntego z’iterambere rirambye; by’umwihariko Umuryango w’Abibumbye n’Umuryango w’Afurika Yunze Ubumwe bigiye kuba bikorana bya hafi.

Yaboneyeho gutangaza ko igihugu cya Liberia nacyo kemeye kwakira ishami ry’Ikigo cyo kwihutisha iterambere rirambye rizafasha ibihugu byo muri Afurika y’Iburengerazuba byose.

Abayobozi banyuranye bitabiriye ifungurwa ry’ishami ry’ikigo kizashyira mu bikorwa Intego z’Iterambere Rirambye SDGs, ryashyizwe muri Zambia

Umukuru w’Igihugu Paul Kagame, uwa kabiri uvuye ibumoso, akurikiye na Edgar Lungu wa Zambia, bari mu muhango wo gufungura ishami ry’ikigo kizashyira mu bikorwa Intego z’Iterambere Rirambye SDGs

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.