23°C , Mostly cloudy | Kigali-Rwanda
Perezida Kagame na Madamu baganira n'Umwami n'Umwamikazi b'u Buyapani

Kagame: Turashaka iterambere nk’iry’u Buyapani n’ibindi bihugu bikomeye

Yanditswe na Imvaho Nshya

Ku ya 09-01-2019 saa 10:10:13

Perezida Kagame yavuze ko mu rugamba rwo kwiyubaka u Rwanda rumazemo imyaka 24, hashakishwa icyatuma rutera imbere rukamera nk’ibihugu bikomeye ku Isi birimo u Buyapani.

Yavuze ko ari urugendo rusaba ubushishozi no kutirara, aho Abanyarwanda basenyera umugozi umwe ariko bakanakenera ubufatanye bw’ibihugu bitandukanye birimo n’u Buyapani.

Yabivugiye mu nama yahuje abacuruzi bo mu Rwanda n’abo mu Buyapani, aho ari mu ruzinduko rw’iminsi ibiri muri icyo gihugu kigizwe n’ibirwa  6,852 biri mu Nyanja ya Pacifique mu Burasirazuba bw’Umugabane w’Aziya.

Ati, “Mu rugamba rwo kwiyubaka, tuzi ibintu by’ingenzi byadufasha gutera imbere tukagera aho u Buyapani n’ibindi bihugu byateye imbere biri. Mu yandi magambo, dukomeje urugendo, kandi dufatanya n’ibi bihugu byateye imbere n’abantu dukorana. Ibyo dukorana mu rwego rw’ishoramari ni ingirakamaro cyane.”

Umukuru w’u Rwanda avuga ko Urwego rw’Igihugu rw’Iterambere rukora byinshi mu korohereza ishoramari, ariko ko bidasobanuye ko ibyakozwe bihagije, bityo korohereza abashoramari barimo Abayapani bikaba bikomeje.

Ati, “Nta na rimwe ibyo twifuza byose twabigeraho, ntabwo twiyumva nk’abakoze ibikenewe byose, icyo kikaba ari ikintu cyiza kidutegeka gukora neza no gukomeza korohereza abashoramari, ni byo dukora.”

“Ntidukwiye kwirara ngo twumve ko twakoze ibihagije kabone n’ubwo ubushakashatsi, imibare, bigaragaza ko twateye imbere cyane. Kumva ko dukora neza ni inkuru nziza ariko itubwira ko dukwiye gukora neza kurushaho.”

Soma: 2018: U Rwanda rwungutse ishoramari rya miliyari zisaga 2 z’Amadolari

Perezida Kagame yijeje abashoramari bo mu Buyapani ko Leta y’u Rwanda izakomeza korohereza ishoramari ku buryo uwaza gushora imari ye mu Rwanda yakora neza bikamubyarira inyungu.

Perezida Kagame yavuze ko u Rwanda rurangamiye guteza imbere ubukerarugendo, ubuhinzi n’ubworozi n’ibikorwaremezo, kandi ko umushoramari uza agafatanya na Leta muri urwo rugendo na we bimwungukira.

Yagarutse ku kibazo cy’ibikoresho bitorohera abashoramari kubigeza mu Rwanda kuko ari igihugu kidakora ku nyanja, avuga ko icyo ari ikibazo ariko ko hari uburyo abantu bakomeza kugishakira umuti ubuzima bugakomeza.

Yavuze ko igihugu kidakora ku nyanja gihura n’ibibazo nk’ibyo ndetse bikagihenda, ariko ko hageragezwa gushaka uko uburemere bw’ibyo bibazo bwagabanuka hakoreshejwe ubumenyi no guhanga udushya.

Ati, “Ibyo bibazo bigaragara nk’ibikakaye dushobora kubibyazamo amahirwe, mu bucuruzi tugashakira umuti w’ibibazo mu guhanga udushya, ikoranabuhanga…”

Muri uru ruzinduko rw’iminsi ibiri, Perezida Kagame yagiranye ibiganiro n’abayobozi bakuru mu Buyapani barimo Umwami n’Umwamikazi, Minisitiri w’Intebe n’Umuyobozi w’Umujyi wa Kobe muri Tokyo.

Perezida Kagame yashimiye uruhare rw’u Buyapani muri gahunda zitandukanye z’u Rwanda n’Afurika, yizeza gukomeza ubufatanye hagati y’ibihugu byombi n’umugabane w’Afurika muri rusange.

Perezida Kagame na Madamu Jeannette Kagame bari muri icyo gihugu  ku butumire bwa Minisitiri w’Intebe w’icyo gihugu, Shinzo Abe, mu rwego rwo gutsura umubano hagati y’ibihugu byombi.

Mu biganiro byahuje Perezida Kagame na Minisitiri w’Intebe Shinzo Abe ku mugoroba wo kuri uyu wa Mbere yariki ya 7 Mutarama zishyira tariki ya 8, Kagame yashimiye u Buyapani uburyo bwabakiriye, avuga ko u Rwanda rwishimira iterambere ry’umubano uri hagati y’ibihugu byombi rishingiye ku nzego zitandukanye zirimo ubuhinzi, Ikoranabuhanga n’ibikorwaremezo.

Ati “Ndashaka kubashimira ku bufasha mugira muri gahunda yo guteza imbere ubwikorezi mu mugi. Nk’uko abaturage b’u Rwanda bagenda biyongera bahinduka amanyamugi kurushaho, dushishikajwe no kwigira ku bunararibonye bw’u Buyapani gutunganya umugi n’ubwikorezi bwaho.”

Yakomeje agira ati “Ndashaka kandi kubashimira ku ruhare u Buyapani bugira mu kubaka iterambere ry’ubushobozi bwa muntu, binyuze muri gahunda y’ishoramari rigamije guteza imbere uburezi muri Afurika “Africa Business education Initiative”, iri kugirira akamaro urubyiriko rw’u Rwanda.”

Soma inkuru yabanje: Kagame yashimiye uruhare rw’u Buyapani mu iterambere ry’Abanyarwanda

Perezida Kagame na Madamu baganira n’Umwami n’Umwamikazi b’u Buyapani

TANGA IGITEKEREZO

Leave a Reply

Your email address will not be published. Required fields are marked *