25°C , Partly sunny | Kigali-Rwanda

Kagame ahamya ko hazakomeza impinduka zishingiye ku ikoranabuhanga

Yanditswe na TWAGIRA WILSON

Ku ya 08-05-2018 saa 05:35:18

Perezida  Paul Kagame avuga ko nubwo hakiri urugendo rurerure mu birebana n’ikoreshwa ry’ikoranabuhanga hazakomeza kubaho gukangurira abaturage gukoresha   ikoranabuhanga by’umwihariko urubyiruko, kuko bizahindura byinshi mu rwego rw’ubukungu bw’ibihugu.

Perezida Paul Kagame hagati (uwa 3 uvuye ibumoso) ari kumwe n’abandi bitabiriye inama ya Transform Africa

Ibyo Perezida Kagame yabivugiye i Kigali ejo hashize ubwo yatangizaga Inama Nkuru ku Ikoranabuhanga irebana no guhindura Afurika, ‘Transform Africa summit 2018’. Yavuze ko guhanga ibishya bikomeje gutera imbere ndetse anasaba inzego zibishinzwe guharanira inyungu rusange kuko bifasha mu kwirinda ko za politiki zadindiza iterambere.

Perezida Kagame ati “Tuzakomeza guteza imbere impinduka zishingiye ku ikoranabuhanga rirangajwe imbere n’Umuryango w’Afurika Yunze Ubumwe, Ubunyamabanga bwa Smart Africa, Komisiyo y’Umurongo Mugari wa interinet  ndetse n’abandi bafatanyabikorwa”.

Bamwe mu bitabiriye inama ya Transform Africa

Perezida Kagame yavuze ko ubufatanye mu by’ikoranabuhanga bugomba gufatwa nk’ubwo mu by’ubukungu kandi rigakoreshwa mu gukemura ibibazo byinshi birimo n’urujya n’uruza ku batuye Umugabane w’Afurika.

Ati: “Reka twubakire ku bushake buhari kugira ngo dushyire mu bikorwa Isoko Rihuriweho n’Ibihugu by’Afurika rizafasha mu gukuraho imbogamizi ku mahirwe menshi ari mu turere. Ibi byafashije cyane mu gushimangira ko twese twungukira mu gufatanya no gukorana. Ibiganiro by’uyu munsi rero bifite ishingiro rwose”.

Umukuru w’Igihugu  yagarutse  ku ngero zirebana  n’imishinga y’ubufatanye. Ati: “Ingero z’imishinga y’ubufatanye yabashije kugerwaho ni nyinshi. Harimo Smart Africa cyane cyane mu mishinga nka One Africa Network yafashije mu gushyiraho umusingi w’indi mishinga nk’Isoko Rihuriweho n’Ibihugu by’Afurika. Tugomba gukora cyane, buri wese akagira uruhare rwe kugira ngo ibyo tugeraho bigaragaze ikigamijwe”.

Umukuru w’Igihugu kandi yanagarutse ku bufatanye no guhanga ibishya, agira ati: “Hari uburyo karemano budufasha mu kurushaho kunoza ubufatanye hagati ya Leta n’abikorera. Aya mahirwe nta bwo twayapfusha ubusa. Ku ruhande rwa Guverinoma, guhanga ibishya bikomeje gukura ndetse tunasaba inzego zibishinzwe kutureberera hagamijwe inyungu rusange”.

Perezida Kagame yakomeje avuga ko guhanga ibishya nabyo bikomeje gushinga imizi mu bikorera cyane cyane binyuze mu bushakashatsi, no mu ikwirakwizwa ry’ibicuruzwa na za serivisi. Ati: “Akenshi urujya n’uruza rw’abaza muri Afurika banyura hanze yayo mbere yo kuyigarukamo. Nta cyo twaba dukoze twishyize hamwe ibi tukabyibagirwa. Kuki bitakorwa hatagombye kubaho visa ngo abantu bage babanza kunyura hanze y’Afurika babone kugaruka? Iyo rero abantu bavuga ku isoko rihuriweho rikoresha ikoranabuhanga, cyangwa se ku guhuza ikirere cyacu, haba hagamijwe gukemura ibibazo nk’ibi ng’ibi”.

 

TANGA IGITEKEREZO

Leave a Reply

Be the First to Comment!

avatar