17°C , Partly sunny | Kigali-Rwanda
Minisitiri w'Ubutegetsi bw'Igihugu Francis Kaboneka asaba abaturage b'Akarere ka Bugesera n'Abanyarwanda muri rusange kwitondera kwishyingira abo batazi iyo bava n'iyo bagana (Foto James)

Kaboneka yihanije abashyingiranwa n’abanyamahanga batazi kuko biteza akajagari

Yanditswe na SEZIBERA ANSELME

Ku ya 30-05-2018 saa 07:00:23

Minisitiri w’Ubutegetsi bw’Igihugu Francis Kaboneka arasaba Abanyarwanda gucika ku ngeso yo gushakana n’abanyamahanga batazi iyo bava n’iyo bagana kuko nta gihugu, nta sosiyete cyangwa umuryango wari watera imbere ushingiye kuri bene ako kajagari.

Minisitiri w’Ubutegetsi bw’Igihugu Francis Kaboneka asaba abaturage b’Akarere ka Bugesera n’Abanyarwanda muri rusange kwitondera kwishyingira abo batazi iyo bava n’iyo bagana (Foto James)

Ibyo yabitangarije abatuye Akarere ka Bugesera  mu cyumweru cya Polisi y’igihugu kigamije ubukangurambaga mu kurwanya no gukumira ihohoterwa mu miryango.

Agira ati: Abantu bashakana n’abo batazi by’umwihariko abanyamahanga utazi iyo ava n’iyo ajya, ukubitana na we uyu munsi umwe akaba abaye umugabo undi na we akaba umugore ibyo na byo tugomba kubyitondera kandi ndakeka muri aka karere ka Bugesera hari aho bigenda bigaragara.

Abantu batari Abanyarwanda baturuka hirya no hino bakaza tukabashyingira cyangwa abantu bakabishyingira n’ibindi nk’ibyo ng’ibyo. Nk’abayobozi, nk’ababyeyi dukwiriye kubikurikirana tukagabanya ako kajagari n’akavuyo, nta sosiyete, nta gihugu, nta muryango uratera imbere ushingiye ku kajagari”.

Minisitiri Kaboneka avuga ko abantu bakwiye kuba babona aho bavuye, aho bageze bakahabona bagafata n’ingamba z’aho bakwiye kuba berekeza, kandi bakahajya bose nk’Abanyarwanda, nk’abaturage batuye Akarere ka Bugesera by’umwihariko nk’abaturage b’igihugu cyose.

Asaba abaturage n’inzego z’ubuyobozi bitabiriye igikorwa cya Polisi cy’ubukangurambaga mu kurwanya ihohoterwa guhagurukana ingamba zo kubihagarika kuko hari n’ibindi byakozwe.

Kaboneka avuga ko iyo umugore n’umugabo batumvikana, barara barwana, iyo ibyo bahashye cyangwa bakoreye batabishyize hamwe bikabaviramo kurwana kugera n’aho bicana kiba ari igihombo kuri uwo muryango no ku gihugu.

Akomeza ashimangira ko iyo bombi bazindutse bajya gukora ariko ntibabashe gushyira hamwe baba babaye umuzigo kuri Leta, ku baturanyi ariko cyane cyane umuzigo ku babakomokaho kuko n’abana bakurira muri uwo muryango bakawurererwamo bibagiraho ingaruka zitandukanye.

Agira ati: Nubwo hari imibare y’abahohoterwa igaragazwa mbona ari ikibazo kitoroshye tugomba gufatira ingamba dushingiye no ku bindi bibazo twagiye duhura na byo nk’igihugu kandi tukabifatira ingamba, tukabihashya nta mpamvu n’iki kitakagombye kuba gicika”.

Yakomeje agira ati: Ndasaba abayobozi bose guhaguruka bagashyira imbaraga mu gukumira ihohoterwa kuko nta bwo dushobora gutera imbere nk’igihugu tugifite imiryango ibanye nabi, kuko iterambere ryiza ridukwiriye twese ari irishingiye ku gukorera hamwe, tukagendera hamwe tugafatanya”.

Umuyobozi wungirije wa Polisi y’Igihugu ushinzwe ubutegetsi n’abakozi, DIGP Marizamunda Juvenal, avuga ko kurwanya ihohoterwa rikorerwa mu miryango byahuriranye n’ukwezi kwahariwe umuryango kandi iyo nsanganyamatsiko igamije gufata ingamba zo kurandura burundu ihohoterwa rishingiye ku gitsina.

Umuyobozi w’Umudugudu wa Kabashya ubarizwa mu kagali ka Rurenge mu murenge wa Mwogo, Mukarubuga Jeanne d’Arc, avuga ko ihohoterwa rikunze kwigaragaza mu giturage no mu ngo muri rusange, ari irishingiye ku mitungo hagati y’abashakanye cyangwa n’abana babo kubera ko umugabo yumva ko imitungo ari iye kandi agomba gukoresha uko yishakiye.

Ukwezi kwahariwe umuryango kwatangiye tariki ya 16 Gicurasi kukazasoza ku ya 03 Kamena 2018. Icyumweru cya mbere k’ibikorwa bya Polisi muri uko kwezi cyari gifite insanganyamatsiko yo kurwanya ibiyobyabwenge, icya kabiri gifite iy’umutekano wo mu muhanda, naho icyumweru cya 3 gifite insanganyamatsiko yo kurwanya ihohoterwa rishingiye ku gitsina.

 

TANGA IGITEKEREZO

Leave a Reply

Your email address will not be published. Required fields are marked *