18°C , Partly cloudy | Kigali-Rwanda
Umuhanzi Jules Sentore ubwo yaririmbiraga abana

Jules Sentore yahaye ubufasha abanyeshuri 120

Yanditswe na NDAMYIROKOYE FRANÇOIS

Ku ya 04-01-2018 saa 09:46:55

Rwamwiza Jules Bonheur ukoresha mu buhanzi izina rya Jules Sentore  mu mpera z’icyumweru cyatambutse yishimanye n’abana b’abanyeshuri  120  bo mu murenge  wa Ntarama mu Karere ka Bugesera abaha ubufasha bw’ibikoresho  by’ishuri banishimira hamwe  iminsi mikuru  no kurangiza umwaka neza muri rusange.

Sentore avuga ko icyo gikorwa yagikoze mu rwego rwo gushimira Imana kuko yasoje umwaka neza wa 2017 ngo kandi ni no mu rwego rwo kwegera abatishoboye dore ko abo banyeshuri bakomoka mu miryango itishoboye.

Umuhanzi Jules Sentore ubwo yaririmbiraga abana

Yagize ati “Ni igikorwa nakoze  ngira ngo nshimire Imana kuko nasoje umwaka meze neza kandi yari mu rwego rwo kwegera abatishoboye kuko buriya ntidukwiye kubaho mu buzima gusa bwo kwishimisha no kwegera abakeneye ubufasha biba ari ngombwa”.

Sentore yahaye abana ubufasha burimo ubw’ibikapu

Ibikoresho yashyikirije abo bana bigana mu mashuri abanza no mu mashuri yisumbuye mu kiciro rusange yavuze ko harimo amakaye ndetse n’ibikapu abana bajyanamo ibikoresho by’ishuri iyo bagiye kwiga.

Uretse ibyo kandi Jules Sentore yavuze ko yaboneyeho umwanya wo gutaramira abo bana  banamusaba indirimbo ze basanzwe bakunda ngo kandi bishimiye kumubona kuko bamwe bajyaga  bamwumva  batari bamubona.

Abana baramubyiniye na we arabafasha

Igikorwa yakoze ku ya 31 Ukuboza 2017 avuga ko  yifuza ko  kizajya kiba ngarukamwaka kikajya kibera mu bice bitandukanye by’igihugu. Ashishikariza abantu kandi kuzajya bakora ibikorwa by’urukundo kuko haba hari abakeneye gufashwa.

Ababyeyi na bo bari bitabiriye ibyo birori

Iki gikorwa cyo gufasha abana no kwishimana na bo yavuze ko kandi yagifashijwemo n’umushinga  witwa Hope For  Children Ministry wita ku bana. Ababyeyi babo bana bafashijwe, Sentore yavuze ko nabo bitabiriye icyo gikorwa.

Umuhanzi Jules Sentore ubusanzwe azwi ku ndirimbo zitandukanye zirimo iyitwa “Kora akazi”, “Udatsikira”, “Ngera” n’izindi.

 

TANGA IGITEKEREZO

Leave a Reply

Be the First to Comment!

avatar