Joeboy wo muri Nigeria agiye kuza gutaramira i Kigali

Yanditswe na Ndamyirokoye François

Ku ya 26-01-2020 saa 15:38:58
Joeboy wakunzwe mu ndirimbo 'Baby' agiye gutaramira mu Rwanda

Umuhanzi ukomoka mu gihugu cya Nigeria Joseph Akinfenwa Donus wamamaye mu muziki nka ‘Joeboy’ mu ruhando mpuzamahanga agiye kuza gutaramira mu Rwanda ku nshuro ye ya mbere mu gitaramo cya Kigali Jazz Junction.

Joeboy yavutse tariki 21 Gicurasi 1997 avukira muri Nigeria, ariko kuva yashyira hanze indirimbo yitwa ‘Baby’ yahise yigarurira imitima y’abari n’abategarugori bitewe n’ijwi ryiza afite.

Uyu muhanzi utegerejwe kuzaza mu Rwanda mu kwezi gutaha, aririmba mu njyana ya Afropop, R&B, akunze kuvuga ko nta mukobwa w’inshuti ye agira n’ubwo umubare munini w’abamukunda ari abakobwa.

Binyuze mu matora yakorewe ku rubuga rwa Twitter ya Kigali Jazz Junction ku itariki 18 Mutarama 2020, hashyizweho abahanzi batatu mpuzamahanga, babaza uwo bifuza ko yazaza gutaramira mu Rwanda.

Muri abo bahanzi harimo INNOS B ukomoka muri Repubulika Iharanira Demokarasi ya Congo, Stella Mwangi ukomoka muri Kenya, ndetse na Joeboy ukomoka muri Nigeria.

Aya matora yasojwe Joeboy ari we uyatsinze n’amanota 66.2 ku ijana, akurikirwa na INNOS B wagize amajwi 20.6 ku ijana ndetse na Stella Mwangi agira 13.2 ku ijana.

Ibi byahise byemezwa bidasubirwaho ko Joeboy ari we uzaza gutaramira mu Rwanda mu gitaramo cya Kigali Jazz Junction kigomba kuzaba tariki 28 Gashyantare 2020.

Mu kiganiro n’abanyamakuru umuyobozi mukuru wa RG Consult Inc isanzwe itegura ‘Kigali Jazz Junction ’ Remmy Rubega yemeje ko Joeboy ariwe muhanzi mukuru uzaza gutaramira mu Rwanda muri iki gitaramo mu kwezi gutaha.

Yagize ati: “Yego, Joeboy ni we twatumiye muri Kigali Jazz Junction mu kwezi gutaha, ni we muhanzi mukuru uzaba uhari.”

Uyu muhanzi Joeboy yakuriye mu muryango w’abanyamuziki, aho mukuru we yaririmbaga muri korali, n’aho se akaba yari umucuranzi wa piano mu rusengero.

Joeboy ibyiyumviro by’umuziki byakanguwe n’imiririmbire ya 9ice n’uwitwa ID Cabasa bakunda guhurira muri situdiyo, aho yatangiye kuririmba afite imyaka 16, akaza gusohora indirimbo ye ya mbere yitwaga “Gbeseyein” afite imyaka 17 y’amavuko.

Nyuma y’aho Joeboy yaje gusohora indirimbo ya Ed Sheeran yasubiyemo yitwa ‘Shape of you’ yakirwa neza muri Nigeria n’ahandi, ihita inamuhesha kubonwa na Mr Eazi wamwemereye guhita atangira kumufasha.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.