“Jesus cares to Kids” bashimye inkunga bahawe ngo bite ku batishoboye

Yanditswe na Rutayisire Emile

Ku ya 23-10-2019 saa 15:32:13
Hagati Kiveu Osbert wari uhagarariye Africa Improved Foods na Teta Mbabazi Nadine washinze umuryango Jesus Cares to Kids ibumoso bwe bari kumwe n'abo bamaze guha ifu y'igikoma (Foto Rutayisire E.)

Abagize umuryango “Jesus cares to Kids”, bafasha ababyeyi babyarira kwa muganga batishoboye, bishimira inkunga bahabwa n’uruganda ‘Africa Improved Foods’ y’ifu y’igikoma, bagatekera abatishoboye igikoma.

Ibi ni ibitangazwa na Teta Mbabazi Nadine uyobora kandi washinze umuryango “Jesus cares to Kids”, umubyeyi w’abana bane.

Avuga ko yashinze uyu muryango nyuma yo kubona ko we ntacyo abuze n’umuryango we kandi azi ko hari abandi bababaye, atekereza ku bana bari mu bitaro n’ababyeyi babo.

Agira ati “Natangiye mu 2010 mfite ibihumbi 25 nyuma nitabaza inshuti ziraza turafatanya none ibikorwa byaragutse dufasha abantu bari hagati ya 30 na 50 buri kwezi. Ndashimira cyane uruganda ‘Africa Improved Foods’ rudutera inkunga y’ifu y’igikoma ku buryo buri gitondo dutekera ababyeyi n’abana badafite ibyo kurya bigatuma bagira ubuzima bwiza.”

Akomeza avuga ko ubufasha babukorera mu bitaro, akaba yaratangiriye mu bitaro bya Kigali (CHUK) akomereza mu bitaro bya Kibagabaga. Kuba kuri ubu umuryango “Jesus cares to Kids” utekera igikoma abatishoboye bari mu bitaro bya Kibagabaga, ni uko uyu muryango wavukiye mu gace ibyo bitaro biherereyemo.

Mu muhango wo guha ababyeyi ifu y’igikoma kugira ngo nihagira abasezererwa mu bitaro bazayitahane ibafashe mu rugo, wabaye kuri uyu wa kabiri tariki ya 22 Ukwakira 2019, ukabera mu bitaro bya Kibagabaga, hatanzwe amakarito 120 y’ifu izwi nka Nootri Mama batewemo inkunga na ‘Africa Improved Foods’.

Teta Mbabazi yagize ati “Iyi fu abo bazasezerera mu bitaro bazayitahana, kandi buri munsi dufite umukozi uteka igikoma akagemura kwa muganga. Bifasha ababyeyi n’abana batishoboye bakagira ubuzima bwiza.  Ibi bikorwa ndifuza ko byakwaguka ariko bikaba mu myumvire y’abantu bakamenya ko gufasha ari ngombwa kandi ko bishoboka ku bantu bose. Hagize abantu bari hafi ya buri bitaro biyemeza gushyira hamwe ubushobozi bajya bagemurira abana n’ababyeyi batishoboye bakagira ubuzima bwiza.”

Akomeza avuga ko icyo ari ikifuzo afite yifuza ko cyazagera mu Rwanda hose. Yagarutse ku bikorwa bya “Jesus cares to Kids” avuga ko habaho gufasha mu bijyanye n’igaburo, kugurira abarwayi imiti ndetse no kubagurira ubwisungane mu kwivuza n’ibikoresho bikenerwa kwa muganga. Yashimye kandi inkunga yatewe kandi akomeje guterwa indi n’abakozi ba Airtel Rwanda, n’abandi bose bumva igitekerezo bakagishyigikira.

Ntezukobagira Marie Chantal n’Uwimana Clarisse, batuye mu Murenge wa Kibagabaga, bagiye barwaza abana na bo bakarwara bari mu bitaro bya Kibagabaga, bishimiye inkunga bagiye bahabwa n’umuryango “Jesus cares to Kids” kuko yatumye babasha kwishyura ibitaro, babaha ibyo kurya kandi nta bushobozi na buke bari bafite. Ntezukobagira utagira umugabo ufite abana 7 ati “Nk’ubu narwaye indwara yo gusarara, nta bushobozi ariko mvuzwa n’abagiraneza bo muri Jesus cares to Kids”.

Pasiteri Cyakwera Denise, ni umwe mu nshuti za Teta wiyemeje gushyigikira igitekerezo cyo gufasha abana n’ababyeyi bari mu bitaro, akaba avuga ko yabyaye umwana utagejeje igihe agahiga ku Mana ko atazibagirwa gufasha no kwita ku bana. Agira ati “Gufasha ni byiza kandi birinda abacu. Nge nabonyemo inyungu kuko kuva natangira kwita ku bana, abana bange nta kibazo baragira nibaza ko bituruka kukugira neza.”

Akomeza avuga ko bagiye bafasha abana n’ababyeyi benshi ariko ashimira Imana abana 5 bafashije baragize ikibazo cyo gushya ariko kuri ubu barakize usibye umwe wari wahiye cyane utarabashije gukira. Ikindi yibuka kikamunezeza, ni uburyo bishyura Fagitire y’umwuka baha abana kandi uba uhenze.

Kiveu Osbert, Umuyobozi ushinzwe ubucuruzi mu ruganda ‘Africa Improved Foods’ mu Rwanda, yatangaje ko ari inshuro ya kabiri bateye inkunga umuryango ‘Jesus cares to Kids’ bakaba bamaze nibura kubaha amakarito y’ifu 200 ikungahaye ku ntungamubiri zifasha ababyeyi batwite ndetse n’abana.

Yagize ati “Mu ntego dufite harimo gukora ifu twohereza mu shami ry’umuryango w’Abibumbye ryita ku biribwa, iyo dukorera Minisiteri y’Ubuzima ifashishwa abakene mu bigo nderabuzima  n’iyo ducuruza abantu bagura ariko usibye n’ibyo tugira ibikorwa byo gufasha binyuranye ari muri urwo rwego twateye inkunga ‘Jesus cares to Kids’ kandi si bo gusa kuko hari n’indi miryango igera muri 20 dutera inkunga.”

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.