29°C , Partly sunny | Kigali-Rwanda

JeantheHustla yashyize hanze indirimbo nshya yise “Amahanga”

Yanditswe na BUGINGO FIDELE

Ku ya 02-08-2020 saa 23:05:56
Umuhanzi JeantheHustla washyize hanze indirimbo nshya "Amahanga"

Umuhanzi w’Umunyarwanda, Ntawukuriryayo Jean Luc ukoresha izina rya “Jeanthehustla”  yashyize  hanze indirimbo nshya  yise “Amahanga” aho  yerekana imibereho y’ababa mu mahanga n’uko iwabo mu bihugu  baba baravuye babafata.

JeantheHustla ubarizwa muri Canada ari naho akorera ubuhanzi bwe muri iyi ndirimbo yashyize hanze tariki 01 Kanama 2020 mu buryo bw’amajwi n’amashusho  yerekanye uburyo abantu baba mu mahanga bakora akazi kavunanye gasa n’ubucakara ariko  buri gihe ugasanga bakira ubutumwa bw’abo basize iwabo babasaba amafaranga.

Akomeza agaragaza ko muri abo haba harimo abantu azi, abo mu muryango we ndetse n’abandi atazi.

Muri iyi ndirimbo JeantheHustla avuga  umuntu uri hanze nyuma yo kohereza amafaranga inshuro 2 ubwa gatatu asaba ko  hakorwa umushinga wunguka undi nawe akamusaba kohereza amafaranga  bikarangira bayamuriye.

Mu gusoza asaba ababa mu mahanga ko igihe kigeze kwiyemera bakabivaho kuko rimwe na rimwe bifotoza bigize nk’abatunzi kandi imyenda bayitiye nyuma bagashyira amafoto ku mbuga nkoranyambaga.  Ati : “Ibaze unisubize uburyo umuvandimwe ashobora kukubona gutyo ntagusabe duke tw’amaramuko. Kugira ngo ubone amafaranga urakora, amahanga nta bwo ari Paradizo.”

JeantheHustla ni umuhanzi umenyerewe muri Canada dore ko no muri 2018  yari mu bahataniraga igihembo cy’umuhanzi w’umugabo cyangwa w’umusore wakoze ibihangano byahize iby’abandi bakomoka muri Afurika “Kilimandjaro Music Awards” gitangwa  na Radio Kilimandjaro ikorera muri Canada.

Indirimbo nshya “Amahanga”

Umwanditsi:

BUGINGO FIDELE

One Comment on “JeantheHustla yashyize hanze indirimbo nshya yise “Amahanga””

Tanga Igitekerezo

Email yanyu ntigaragazwa ku rubuga. Amazina na Email ni ngombwa.