Jeannette Kagame yitabiriye siporo rusange itegura inama ya ICASA

Yanditswe na Mutungirehe Samuel

Ku ya 01-12-2019 saa 17:53:36
Madame Jeannette Kagame n'abandi bayobozi muri siporo rusange ku Kimihurura kuri uyu wa 1 Ukuboza 2019

Madamu Jeannette Kagame yitabiriye siporo rusange itangiza Ukuboza 2019 ari kumwe n’Umuyobozi Mukuru w’Ishami ry’Umuryango w’Abibumbye ryita ku Buzima OMS, Dr Tedros Adhanom Ghebreyesus n’Umuyobozi Mukuru Wungirije w’ishami rishinzwe kurwanya Sida UNAIDS, Shannon Hader, n’abandi bayobozi batandukanye baturutse mu yandi mashami y’Umuryango w’Abibumbye baje mu Rwanda mu nama ya 20 yiga kuri Sida n’indwara zandurira mu myanya ndangagitsina muri Afurika, ICASA 2019.

Ni siporo yitabiriwe kandi n’abandi bayobozi bakuru b’igihugu hamwe n’abatuye Umujyi wa Kigali by’umwihariko mu karere ka Gasabo basanzwe bahurira mu mbuga rusange ya RRA ku Kimihurura, kuri uyu wa 1 Ukuboza 2019.

Madamu Jeannette Kagame n’itsinda rinini rije mu nama ya ICASA 2019 batangiye siporo rusange bahagurukiye i Remera kuri Sitade Amahoro berekeza ku mbuga rusange ya RRA Kimihurura, aho basanze abaturage batandukanye bakereye siporo, kuva ku bana kugeza ku basaza n’abakecuru, bahabwa serivise zitandukanye zigamije guteza imbere ubuzima bwiza zamurikwaga n’ibigo bitandukanye by’ubuzima bikorera mu Rwanda, birimo amavuriro, farumasi z’imiti, ibitaro n’imiryango ikora mu by’ubuzima n’ibigo bikorana n’Ikigo k’Igihugu gishinzwe Ubuzima RBC mu gusuzuma ku buntu indwara zitandura abitabiriye siporo rusange.

Minisitiri w’Ubuzima Dr. Gashumba Diane, yashimiye Madamu Jeannette Kagame wongeye kwifatanya n’abitabiriye siporo rusange bagamije kurwanya indwara zitandura, ashimira abashyitsi bayobowe n’Umuryango OMS, Dr Tedros.

Umuyobozi Mukuru wa OMS, Dr Tedros Adhanom Ghebreyesus, yatangaje ko u Rwanda ari igihugu nyacyo Isi ishobora kwizihirizamo umunsi mpuzahanga wo kurwanya Sida kuko u Rwanda rufite byinshi rwagezeho muri gahunda ya 90 90 90.

Yashimye gahunda ya siporo rusange u Rwanda rwashyizeho ikaba yaravuye muri Kigali ikagezwa mu gihugu hose; yibukije abantu ko indwara zitandura ziri mu zihitana abantu benshi buri mwaka.

Dr Tedros ati “Ikintu cyantangaje, nahoze nkiganiraho na Madamu Jeannette Kagame, ikirere cya hano kiratandukanye kuri uyu munsi kuko nta kinyabiziga gisohora umwotsi kiba gihari, ni umwuka mwiza, ni ikintu k’ingenzi cyane.

Gahunda ya Car Free Day ikintu cya mbere, ifasha kugabanya ihumana ry’ikirere. Muzi ko abarenga miriyoni 8 ku Isi bapfa buri mwaka bitewe n’ihumana ry’ikirere? Ni ikintu kibi ubungubu, kugeza ubu, gutumura itabi byica abantu miriyoni 7 ku mwaka, wakongeraho n’abicwa n’ihumana ry’ikirere bikaba miriyoni 15. Ibyo muri gukora ni uguhangana n’uhumana ry’ikirere no kugabanya imfu zibikomokaho.”

Yongeyeho ko imyitozo ngororamubiri yasanze abitabiriye siporo rusange bakora zifasha kwirinda indwara zitandura, iz’umutima, kanseri n’izindi; ashimira ko nubwo no mu bindi bihugu iyo gahunda irimo gukorwa ariko u  Rwanda rushyiraho umwihariko w’uko abitabiriye siporo rusange bapimwa, bagasuzuma ibimenyetso by’indwara zitandura.

Umuyobozi Mukuru wungirije w’ishami rishinzwe Sida, UNAIDS, Shannon, yashimiye kuba yifatanyije n’Abanyarwanda muri siporo rusange, yibutsa abantu ko icyorezo cya Sida kigihari kandi kibangamiye imiryango bityo ari yo mpamvu uyu mwaka bihaye intego yo gukangurira imiryango guhangana nacyo.

Ati “U Rwanda rwakoze akazi katoroshye mu guhangana n’iki cyorezo; tuzi ko abagera kuri 84% (83.8%) by’abantu bafite virusi ya Sida mu Rwanda bazi uko bahagaze, kandi abagera kuri 98% (97.5%) na bo bafata imiti kandi benshi muri bo bayifata neza ku buryo virusi ari nke mu maraso itabasha kwanduza cyane (90%).

Iyo ni imibare myiza cyane, kandi dufite byinshi byo gukora nk’imiryango, imiryango mpuzamahanga igateza imbere ubukangurambaga kugira ngo abantu badakomeza kwitinya ngo bamenye uko bahagaze kandi ndizera ko imiryango izakomeza gushyira imbaraga no ku kwirinda akato.”

U  Rwanda ruza imbere mu bihugu byagerageje guhangana n’icyorezo cya Sida hamwe n’indwara zitandura, aho ku Isi 70% by’imfu zibaho ziganjemo izikomoka ku ndwara zitandura.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.