Jeannette Kagame yagaragaje ibyakozwe mu kugabanya icyorezo cya Sida

Yanditswe na Mutungirehe Samuel

Ku ya 02-12-2019 saa 17:07:17
Madame Jeannette Kagame ageza ijambo rye ku bitabiriye iyi nama

Madamu Jeanette Kagame yatangaje ko ubufatanye bw’abafasha (abagore) b’Abakuru b’Ibihugu by’Afurika bibumbiye mu Muryango OAFLA bwafashije umugabane mu guhangana n’icyorezo cya Sida n’indwara zandurira mu mibonano mpuzabitsina.

Yagaragaje ibyakozwe ku ruhande rw’u Rwanda biri muri gahunda z’Umuryango ‘Imbuto Foundation’ yashinze, biri no muri gahunda ya Guverinoma bihuriweho n’ibihugu byo kuri uwo mugabane.

Yabitangaje kuri uyu wa Mbere 2 Ukuboza 2019 mu ijambo yagejeje ku bafasha b’abakuru b’ibihugu by’Afurika bagize umuryango OAFLA bateraniye mu Rwanda, mu nama ya 20 yiga kuri Sida izamara icyumweru.

Insanganyamatsiko y’umuryango OAFLA kuri iyi nshuro ya 20 igira iti “Ubuyobozi bw’abadamu b’abakuru b’ibihubu by’Afurika mu guhangana na Sida” (Leadership of African First Ladies in the fight against HIV and AIDS”).

Jeanette Kagame yavuze ko uburyo ikibazo cyo kurandura Sida ku mugabane kihutirwa mu bihugu by’Afurika byasabye ko buri umwe mu bagize uwo muryango ashyira imbere gahunda n’imishinga bitanga ibisubizo ku miryango itishoboye yagizweho ingaruka n’icyorezo cya Sida.

Yavuze ko gutegura inama ya 20 y’abafasha b’Abakuru b’igihugu by’Afurika ari ishema ku Rwanda, yibutsa ko umuryango OAFLA wavutse mu myaka 17 ishize, kubera ubufatanye buvuye mu bushake bwabo, kugira ngo bazamure ijwi ry’ababana na virusi itera Sida, abashegeshwe nayo cyane cyane abugarijwe nayo nk’abagore n’abana.

Ati “Nkuko duteraniye aha uyu munsi, hari impamvu yatuma twishimira uruhare rwacu rwo guhuza imbaraga n’ubushake bukomeje. Twese dushobora guhamya itandukaniro ry’ibyavuye mu bukangurambaga bwa ‘Free to Shine’ bwakozwe mu bihugu byacu, ‘Free to Shine Umwana Wanjye, Ishema Ryanjye’ bugamije kugabanya ubwandu bw’agakoko gatera SIDA mu bana bakivuka no guharanira ubuzima bwiza bw’ababyeyi babo.

Mu muryango wange Imbuto Foundation, twibanze no mu gushyira mu bikorwa imishinga ijyanye n’ibikenewe ku rwego mpuzamahanga no ku rwego rw’ibyo igihugu gishyize imbere muri gahunda ya Guverinoma, bijyanye na gahunda y’Afurika ‘Agenda 2063’, ku ntego ziterambere rirambye.”

Iyo ni imishinga irimo uw’ubuzima bw’imyorerekere bw’abangavu n’abasore, bituma bagera ku makuru akenewe, serivisi no kubitaho bigenewe urubyiruko, kugabanya ubwandu bushya mu rubyiruko nabyo biri muri gahunda y’igihugu na gahunda mpuzamahanga yo kurwanya Sida.

Jeannette Kagame ati “Binyuze muri uyu mushinga, imiryango ifite vurusi ya Sida ikorana n’ibigo nderabuzima bakabaha imiti igabanya ubukana ART, kandi abajyanama b’ubuzima bakabigiramo uruhare runini mu kwigisha.

Mu Rwanda, imibare yo mu 2018 igaragaza ko ubwandu bushya bwagabanutseho 83%, kandi imfu zituruka kuri Sida nazo zagabanutseho 82% mu myaka 20 ishize. Ikindi ni uko imbaraga ziri hagati ya Leta n’abikorera zatanze umusaruro ugaragara mu kurandura Sida mu byiciro byose.”

Madamu Antoinette Sassou Nguesso, Madamu wa Perezida wa Congo akaba na Perezida w’ihuriro ry’abagore b’Abakuru b’Ibihugu by’Afurika, OAFLA, yavuze ko ubuyobozi abafasha b’abakuru b’ibihugu b’Afurika bafite bwabafashije kugera ku ntsinzi zitandukanye mu guhangana na Virusi ya Sida (HIV) hamwe na Sida.

Mu ijambo yagejeje ku bitabiriye inama yiga kuri Sida n’indwara zandurira mu mibonano mpuzabitsina ICASA 2019 iteraniye i Kigali, yashimye abanyarwanda by’umwihariko mugenzi we Jeannette Kagame ku buryo yakiriwe kuva yagera mu Murwa Mukuru wa Kigali.

Yagize ati “Turi hano mu mugi umeze nk’ikimenyetso cy’ubushobozi bwo kwihagararaho kw’abaturage b’Afurika n’ubushake bwo gushoboza abaturage bacu.”

Yavuze ko ubushake bwabo mu kugera ku ntego Isi yiyemeje, 90 90 90, bazi neza ko iyo ntego iri mu ngamba zabo, ahamya ko bari ku mugambi wo kugera kuri Afurika izira ubwandu bwa Sida mu 2030.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.