17°C , Partly cloudy | Kigali-Rwanda
Madamu Jeannette Kagame ageza ijambo rye ku bitabiriye uyu muhango wo kwizihiza umunsi w'abagore

Jeannette Kagame yagaragaje ibiranga ‘umuryango utekanye’

Yanditswe na Mukagahizi Rose

Ku ya 09-03-2019 saa 07:17:08

“Umuryango utekanye, ni ufite imibereho myiza muri rusange, ni umuryango wateguwe, kandi na wo ukaba wariteguye kubana neza; ni umuryango, abawugize basobanukiwe ko u Rwanda ruhera mbere na mbere muri bo.”

Byatangajwe na Madamu Jeannette Kagame ubwo yifatanyaga n’abaturage b’Akarere ka Nyamasheke n’abo mu turere tugakikije mu birori byo kwizihiza Umunsi Mpuzamahanga w’Umugore no gutangiza ubukangurambaga ngarukamwaka bw’Umuryango “Imbuto Foundation” bwo guteza imbere uburezi bw’umwana w’umukobwa.

Umunsi Mpuzamahanga w’Umugore uba buri tariki ya 8 Werurwe, mu Rwanda mu rwego rw’igihugu wabereye mu karere ka Nyamasheke.

Madamu Jeannette Kagame yavuze ko umuryango utekanye ari umuryango usobanukiwe ko umwana ari ishema ry’umuryango, bityo ugafata ikemezo cyo kubyara abo ushoboye kurera, n’igihugu gishoboye kwitaho.

Ati: “Bakarindwa kugwingira, bakaba abana batekanye, bakura neza maze bakarangwa n’ubumenyi, kuko twabubahaye nk’umuryango! Nk’uko mubizi nta we usarura aho atabibye.”

Yakomeje asobanura kandi ko umuryango utekanye ko ari umuryango usobanukiwe akamaro ko guha abana b’abahungu n’abakobwa amahirwe angana; ugaha agaciro ibiganiro hagati y’abawugize, haba mu bijyanye n’ubukungu, imibereho myiza ndetse n’ibindi byemezo. Ati “Ndizera ko ntawe utifuza umuryango nk’uyu.”

Yavuze ko umuryango ari wo shingiro ry’igihugu, maze yongeraho ko bireba buri wese kubaka Umunyarwanda ushoboye, ati “Dufite inshingano rero zo kuwuherekeza mu kerekezo twihaye cyo kubaka Umunyarwanda ushoboye, ubayeho neza kandi utekanye.”

Madamu Jeannette Kagame ageza ijambo rye ku bitabiriye uyu muhango wo kwizihiza umunsi w’abagore

Madamu Jeannette Kagame yabwiye ababyeyi ko muri uyu mwaka hagiye kubaho kwibuka ku nshuro ya 25 Jenoside yakorewe Abatutsi mu 1994, ndetse no kwizihiza ku nshuro ya 25 umunsi wo kwibohora, abibutsa ko Umuryango ari irerero rya mbere ryigisha umuntu gukunda igihugu no guharanira ubumuntu. Akaba yarasabye ababyeyi gutinyuka kuganira n’abana kuri iyi ngingo, bakababwiza ukuri aho batabishoboye bakifashisha abandi babyeyi cyangwa ababizobereyemo. Ati “Tubatoze indangagaciro zo kugunda igihugu no kurwanya ikibi icyo ari cyo cyose. Bityo dukomeze kuba mu gihugu kiza.”

Umuhuzabikorwa w’amashami y’Umuryango w’Abibumbye mu Rwanda, Fodé Ndiaye, yashimye imiyoborere myiza y’u Rwanda kubera ko iha agaciro bose, avuga ko kuba Inkubito y’Icyeza atari ukugira ubumenyi gusa, ahubwo bijyana no kugira uburyo n’imitekerereze izana impinduka n’ibisubizo. Ni mu gihe kuri uyu munsi “Imbuto Foundation” yahembye abakobwa 27 bitwaye neza mu masomo yabo mu Karere ka Nyamasheke, bazwi nk’Inkubito z’Icyeza.

Minisitiri w’Uburinganire n’Iterambere ry’Umuryango Amb. Nyirahabimana Solina, yavuze ko hari byinshi umugore w’Umunyarwandakazi yishimira bitewe n’uko yasubijwe agaciro ariko ko adakwiye kwirara kuko hari n’ibindi byinshi akeneye kugeraho mu iterambere. Ati “Twishimire ibyiza tumaze kugeraho ariko twongere imbaraga mu bindi bikurikiraho.”

Umuryango w’intangarugero wa Ngirabakunzi James na Nyiranzahorampoze Jeannine bo mu karere ka Nyamasheke batanze ubuhamya bw’uburyo urukundo, kuganira, gukorera hamwe no kutumva amabwire byatumye umugore arihira umugabo we amashuri. Kuri ubu bageze kure mu iterambere.

Madamu Jeannette yifatanyije n’abaturage b’ Akarere ka Nyamasheke n’abo mu turere tugakikije mu birori byo kwizihiza Umunsi Mpuzamahanga w’Abagore no gutangiza Ubukangurambaga ngarukamwaka bw’Umuryango Imbuto Foundation bwo guteza imbere uburezi bw’umwana w’umukobwa.

TANGA IGITEKEREZO

Leave a Reply

Your email address will not be published. Required fields are marked *