21°C , Partly sunny | Kigali-Rwanda

Jay D yasezeye mu irushanwa rya Godfather East Africa

Yanditswe na SHEMA CHRISTIAN

Ku ya 01-03-2018 saa 07:56:43

Ntabanganyimana wabaye rudasumbwa w’Afurika yasezeye mu irushanwa rya Godfather East Africa kubera impamvu ze bwite irushanwa riteganyijwe kuzabera mu gihugu cya Kenya.

Ntabanganyimana Jean de Dieu wabaye rudasumbwa w’Afurika umwaka ushize yasezeye mu irushanwa rya Godfather East Africa

Aganira n’Imvaho Nshya, Ntabanganyimana yavuze ko kwitabira irushanwa Godfather East Africa bisaba umwanya munini kandi inshingano ze zikaba zariyongereye ku buryo atabona uwo mwanya.

Yagize ati ”Ni byo koko nasezeye mu irushanwa n’ibaruwa nayitanze, nasezeye ku mpamvu zanjye bwite birumvikana ndetse no kuba mu kazi nkora narabonye umwanya mushya utanyemerera kujya kuba hariya amezi agera kuri atatu nshobora kujyayo ugasanga simbaye n’uwa mbere kandi narivanye mu kazi urumva naba mpombye kabiri nafashe umwanzuro rero wo kubanza nkita ku kazi kanjye n’imishinga yanjye muri rusange”.

Ntabanganyimana usanzwe ukora akazi ko muri hoteli ndetse akaba n’umwe mu nkingi za mwamba mu kumurika imideli hano mu Rwanda  yatangaje ko kuri ubu afite kompanyi ifasha abanyamideli kumurika impano zabo ndetse no kubashakira akazi ko kwamamaza (Remarkable Modeling Management).

Irushanwa Godfather East Africa ni ubwa mbere ryari riteguwe rikaba rikorwa hagamijwe kugenzura imibanire hagati y’abaryitabiriye aho biyemeza kumara amezi agera kuri atatu babana mu nzu imwe hagahuzwa abantu bagiye bavuye mu bihugu bitandukanye uhize abandi mu kwitwara neza agahembwa miliyoni zirenga makumyabiri z’amafaranga y’u Rwanda.

Ijonjora mu Rwanda ryabaye ku wa 16 Mutarama 2018 aho hahatanye abantu barenga 17 basanzwe bazwi mu myidagaduro hano mu Rwanda muri bo hatambuka 10 haza gutoranywamo batandatu aribo: shinny Abdallah, Teta Sandra, Vanessa Uwase, Sisi Ngamije, Gigi Mugisha na Jay D wasezeye.

Mu gusoza ikiganiro Ntabanganyimana yagiranye n’Imvaho Nshya yavuze ku makuru amaze iminsi acicikana avuga ko yaba ahugiye mu gutegura igikorwa cyo gutora Rudasumbwa w’u Rwanda (Mr rwanda) yagize ati ”Ni byo koko uwo mushinga urahari ariko abavuga ko biri hafi barabeshya ntabwo navuga ko ari muri uyu mwaka gusa dutegereje abaterankunga ndetse n’ibindi byinshi nkenerwa, ntabwo rwose birajya mu buryo nibitungana muzabimenya”.

Ntabanganyimana Jean de Dieu yabaye rudasumbwa w’Afurika mu 2017

TANGA IGITEKEREZO

Leave a Reply

Be the First to Comment!

avatar