27°C , Partly sunny | Kigali-Rwanda
Bagirishya Jean De Dieu wari umutoza wungirije muri Gisagara VC ni we mutoza mushya wa Kirehe VC

Jado Castar yagizwe mutoza wa Kirehe VC

Yanditswe na NKOMEJE GUILLAUME

Ku ya 18-10-2018 saa 14:42:27

Bagirishya Jean de Dieu uzwi mu itangazamakuru nka Jado Castar yagizwe umutoza w’ikipe ya volleyball ya Kirehe asimbuye Ntawangundi Dominique, wagiye gutoza Gisagara VC.

Castar yahawe amasezerano y’imyaka ibiri, akaba azungirizwa na Mbonyuwontuma Jean Luc “Kizungu” watozaga UNIK VC.

Ibi ni ibitangazwa na Mutumwinka Awunick, Umunyamabanga Mukuru w’ikipe ya Kirehe VC, uvuga ko Castar yasabwe kugira byinshi ahindura. Mutumwinka avuga ko bamusabye ko Kirehe VC igera mu makipe ane ya mbere muri shampiyona byanashoboka akaba yayihesha igikombe. Ati “Twamusabye kuzamura urwego rw’imikinire ndetse tunamusaba kuzaza mu makipe ane ya mbere muri shampiyona, ariko n’igikombe byashoboka tukaba twagitwara”.

Muri shampiyona ya 2018, ikipe ya Kirehe VC yasoreje ku mwanya wa 5 n’amanota 21.

Mutumwinka avuga ko bafite gahunda yo kugumana abakinnyi bari basanganywe ndetse bakazamura n’abakiri bato mu ikipe nkuru ndetse ko bari no mu biganiro byo kuba basinyisha abandi bakinnyi babiri bashya.

Yemeza ko bazamuye abakinnyi 3 bavuye mu ikipe y’abato barimo Murwanashyaka William na Rugero Aboubacar. Aba biyongera kuri Iradukunda Dany wasubiye muri iyi kipe, nyuma y’uko yari yerekeje muri IPRC-East VC umwaka ushize.

Bagirishya Jean De Dieu wari umutoza wungirije muri Gisagara VC ni we mutoza mushya wa Kirehe VC

Kirehe VC yashyizeho komite nshya

Mutumwinka Awunick wahoze ari Visi Perezida wa Kirehe VC mu minsi ishize, atangaza ko kuri ubu bafite Komite nshya, izayobora iyi kipe mu gihe k’imyaka itanu iri imbere.

Avuga ko iyi komite nshya yitezweho gukora ishyize hamwe n’abakinnyi bityo bikaba byafasha iyi kipe kwitwara neza.

Iyi komite nshya isimbuye iyari iyobowe na Gasasira Janvier, igizwe na Murayire Protais wungirijwe na Muhawenimana Lambert ndetse na Visi Perezida wa kabiri akaba Niyigena Hervé Benjamin. Hari kandi Kubwimana Marc, ushinzwe imibereho y’ikipe, Uwanyirigira Florence (umubitsi) ndetse n’umuyobozi ushinzwe tekinike, Nshimiyumuremyi Jean Népo.

 

TANGA IGITEKEREZO

Leave a Reply

Your email address will not be published. Required fields are marked *