20°C , Mostly cloudy | Kigali-Rwanda
Uwizeyimana Evode, Umunyamabanga wa Leta muri Minisiteri y'Ubutabera ushinzwe Itegeko nshinga n'andi mategeko, yari mu nteko asobanura iby'iryo tegeko (Foto James R.)

Iterabwoba si ikibazo kireba igihugu kimwe, ni ik’isi yose– Evode

Yanditswe na TWAGIRA WILSON

Ku ya 04-01-2018 saa 08:48:28

Umunyamabanga wa Leta muri Minisiteri y’Ubutabera ushinzwe Itegeko nshinga n’andi mategeko, Uwizeyimana Evode, asanga iterabwoba atari ikibazo kireba imipaka cyangwa igihugu kimwe, kuko ngo ari ikibazo kireba isi yose.

Uwizeyimana Evode yabivugiye mu Nteko ishinga amategeko ejo hashize tariki ya 3 Mutarama 2017  aho yari ahagarariye Guverinoma, mu nama yahuje Komisiyo y’abadepite bashinzwe ububanyi n’amahanga n’umutekano ubwo batangiraga gusuzuma umushinga w’itegeko rigamije kurwanya no guhana iterabwoba.

Uwizeyimana Evode, Umunyamabanga wa Leta muri Minisiteri y’Ubutabera ushinzwe Itegeko nshinga n’andi mategeko, yari mu nteko asobanura iby’iryo tegeko (Foto James R.)

Uwizeyimana akaba avuga ko iterabwoba ari ikibazo k’isi yose ashingiye ku mitwe y’iterabwoba igenda ivuka mu bihugu bitandukanye nka Boko Haram, Leta ya kiyisilamu (I.S) n’iyindi mu karere, avuga ko u Rwanda rufite ubushake bwo gufatanya n’izindi nzego zaba izo mu karere, Afurika, n’ahandi kugira ngo ikibazo k’iterabwoba kiranduke burundu.

Ku byerekeranye n’isobanurampamvu kuri  iyo ngingo, Perezida wa Komisiyo y’ububanyi n’amahanga n’umutekano mu Nteko ishinga amategeko  Hon. Mutimura Zeno kimwe n’abandi badepite barimo Depite Rwabyoma, bavuga ko mu rwego rwo guca intege  abashobora kwishora muri ibyo bikorwa by’iterabwoba bashyigikiye iyo ngingo.

Ni umushinga w’amategeko agizwe n’ingingo 50, aho zimwe muri izo ngingo zigaragaza umwihariko urebana no gukurikirana no guhana ukekwaho iterabwoba, zirimo gufata urikekwaho bitarinze gusaba inyandiko yo kumufata.

Maj. Kabandana John abwira abadepite iby’umushinga w’itegeko ryo kurwanya iterabwoba (Foto James R.)

Uwizeyinama Evode yagarutse ku ngero ziganisha ku gushyigikira iyo ngingo  ati “Nk’ubu nta bwo umuntu yaba afite amakuru afatika yuko muri hoteli runaka hacumbitsemo umuntu urimo kwitegura gutegamo igisasu agamije kuyisenya, ngo urinde wategereza iyindi minsi yo kujya mu biro by’ubushinjacyaha gusaba inyandiko yo kujya kumufata, kandi uzi neza ko mu kanya gato ubuzima bw’abantu benshi bushobora kuhagirira ibibazo?  Iterabwoba ni icyaha ndengakamere udashobora kujya muri ibyo byo gutinda usaba inyandiko, nubwo mu bihugu bimwe bataragifata nk’icyaha mpuzamahanga, ubufatanye rero burakenewe mu kukirwanya.’’

Ku birebana n’ikibazo k’iminsi 15 y’igifungo cy’agateganyo ku muntu ukekwaho iterabwoba, mu gihe abandi ari iminsi 5, Maj. Kabandana John, umwe mu bakurikiranye umushinga w’iri tegeko, yabwiye abadepite ko iyo minsi nta kibazo ifite kuko asanga ari igihe gihagije cyafasha abantu kuba bakusanyije amakuru y’ibanze  yafasha mu iperereza ku bantu bose bashobora kuba bafte ubufatanyacyaha mu gikorwa k’iterabwoba ku buryo ibikenerwa byinshi bisaba icukumbura.  Ati   “Iterabwoba ni icyaha kidasanzwe, na cyo kigomba  guhagurukirwa kikarwanywa mu buryo budasanzwe.”

TANGA IGITEKEREZO

Leave a Reply

Be the First to Comment!

avatar