21°C , Partly sunny | Kigali-Rwanda

Itegeko rishya ryo kurwanya ruswa, igisubizo ku byuho byagaragaraga mu guhana

Yanditswe na MUKAGAHIZI ROSE

Ku ya 09-10-2018 saa 06:12:36

Musangabatware Clément, Umuvunyi Mukuru wungirije ushinzwe gukumira no kurwanya ruswa, asanga itegeko rishya ryo kurwanya ruswa rije ari igisubizo ku byuho byagaragaraga mu guhana abanyereza umutungo cyangwa abarya ruswa, ari abatorokaga ubutabera cyangwa abahabwa ibihano bito.

Umutwe w’Abadepite, mu nama yawo yo ku wa 30 Gicurasi 2018 watoye Itegeko ryo Kurwanya ruswa risimbura Itegeko n° 23/2003 ryo ku wa 07/08/2003 ryerekeye gukumira, kurwanya no guhana ruswa n’ibyaha bifitanye isano na yo.

Iri tegeko rigamije gukumira no guhana ruswa mu nzego za Leta, iz’abikorera, sosiyete sivili n’imiryango mpuzamahanga ikorera cyangwa ishaka gukorera mu Rwanda.

Mu kiganiro kihariye n’Imvaho Nshya, Musangabatware Clément yavuze ko yishimiye iri tegeko rishya ndetse n’impinduka rizazana mu kurwanya ruswa mu Rwanda ariko cyane cyane akishimira ko ibitekerezo Urwego rw’Umuvunyi rwatanze byashyizwe muri iri tegeko.

Musangabatware avuga ko itegeko ryahaye buri rwego rwa Leta, urw’abikorera, urwa sosiyete sivili cyangwa umuryango mpuzamahanga ukorera mu Rwanda gushyira mu bikorwa ingamba zo gukumira ruswa; gukorera mu mucyo; kugaragariza raporo abo igenewe; kugenzura ko nta bikorwa bya ruswa birurangwamo; kugaragaza ibyakozwe mu rwego rwo gukumira ruswa igihe rubisabwe n’urwego rubifitiye ububasha; kugira inyandiko igaragaza uburyo n’igihe ntarengwa ibyemezo bifatwa; kugira imikoranire myiza n’izindi nzego, hubahirizwa igihe gisabwa mu kugaragaza ibyakozwe cyangwa hatangwa amakuru urundi rwego rwasabye; kudasumbanya, kudatinza no kudasiragiza abarugana.

Inyito ya ruswa yaragutse

Umuvunyi Mukuru wungirije ushinzwe gukumira no kurwanya ruswa, Musangabatware Clément, avuga ko muri iri tegeko rishya inyito ya ruswa yagutse ihuzwa n’ikubiye mu masezerano y’ Umuryango w’Abibumbye.

Yagize ati “Itegeko rishya rivuga ko ruswa ari igikorwa icyo ari cyo cyose gikorewe mu nzego za Leta, iz’abikorera, sosiyete sivili, n’imiryango mpuzamahanga ikorera cyangwa ishaka gukorera mu Rwanda, kigamije gusaba, kwakira cyangwa gutanga indonke mu buryo bunyuranyije n’amategeko hagamijwe kwigwizaho umutungo udashobora gusobanura inkomoko yawo cyangwa gukora ishimishamubiri kugira ngo hakorwe umurimo cyangwa igikorwa mu buryo bunyuranyije n’amategeko byaba bikozwe na nyir’ubwite cyangwa binyujijwe ku wundi muntu.”

Musangabatware Clement, Umuvunyi Mukuru wungirije ushinzwe gukumira no kurwanya ruswa Foto Imvaho Nshya)

Mukeshabatware yungamo ati “Ruswa igaragarira muri kimwe mu bikorwa bikurikira: gusaba, kwakira cyangwa gutanga indonke; gusaba, gusezeranya cyangwa gukora ishimishamubiri rishingiye ku gitsina; gufata ikemezo gishingiye ku itonesha, ubucuti, urwango, ikimenyane cyangwa ikenewabo; gukoresha igitinyiro; kudasobanura inkomoko y’umutungo; kunyereza umutungo; gukoresha umutungo wa Leta icyo utagenewe; gukoresha nabi umutungo ufitiye rubanda akamaro; gusonera bitemewe n’amategeko; kwaka cyangwa kwakira amafaranga bidakwiye cyangwa arenze ateganyijwe; gukoresha ububasha uhabwa n’itegeko mu nyungu bwite no kwiha inyungu zinyuranyije n’amategeko.”

Kunyereza umutungo byabaye icyaha cya ruswa kandi ntigisaza

Musangabatware avuga ko zimwe mu mpinduka itegeko rishya ryo kurwanya ruswa zizazana harimo kuba kunyereza umutungo byarabaye icyaha cya ruswa kandi kidasaza.

Akomeza avuga ko umuntu wese, yaba umukozi wa Leta cyangwa undi ukora umurimo wa Leta cyangwa ukora mu nzego zayo, umuyobozi cyangwa umukozi mu kigo cy’ubucuruzi cyangwa isosiyete y’ubucuruzi cyangwa koperative cyangwa ukorera undi muntu, umuryango ushingiye ku idini cyangwa undi muryango uwo ari wo wose, ukoresha mu nyungu ze cyangwa iz’undi, umutungo, amafaranga cyangwa inyandiko z’agaciro yahawe cyangwa yashyikirijwe kubera imirimo akora cyangwa ukoresha mu nyungu ze abakozi ashinzwe ku bw’umurimo aba akoze icyaha.

Nkuko akomeza abivuga, ngo iyo abihamijwe n’urukiko, ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’umutungo yanyereje.

Ukutaryozwa icyaha cya ruswa

Umuvunyi Mukuru wungirije ushinzwe gukumira no kurwanya ruswa yakomeje abwira Imvaho Nshya ko umuntu watanze cyangwa wakiriye indonke mu rwego rwo gufasha ubutabera kubona ibimenyetso ku cyaha cya ruswa adafatwa nk’uwakoze icyaha iyo yabimenyesheje inzego z’ubutabera mbere y’uko icyo cyaha gikorwa.

Yagize ati “Nta buryozwacyaha bubaho ku muntu watanze cyangwa wakiriye indonke, ubimenyesha inzego z’ubutabera mbere y’uko ikurikiranwa ry’icyaha ritangira, atanga amakuru cyangwa agaragaza ibimenyetso.”

Mukeshabatware yasabye Abanyarwanda bose kongera imbaraga mu bufatanye mu kurwanya ruswa mu gihugu.

TANGA IGITEKEREZO

Leave a Reply

Your email address will not be published. Required fields are marked *