18°C , Showers | Kigali-Rwanda

Itegeko rishya: Abacuruzi baciriritse bagitangira basonewe Umusoro w’Ipatanti mu myaka ibiri

Yanditswe na Gisubizo Gentil

Ku ya Feb 22, 2019 saa 9:41

Mu kwezi kw’Ukwakira umwaka ushize hasohotse itegeko rishya N° 75/2018 ryo ku wa 07/09/2018 rigena imisoro y’inzego z’ibanze, iri ryaje risimbura itegeko N° 59/2011 ryo ku wa 31/12/2011 rishyiraho inkomoko y’imari n’umutungo by’inzego z’ibanze rikaba ryarahinduye byinshi bitandukanye, ubu tukaba tugiye kureba ku Musoro w’Ipatanti.

Ni nde ufite inshingano yo kwishyura Umusoro w’Ipatanti?

Umuntu wese utangije igikorwa cy’ubucuruzi mu karere ako ari ko kose. Ni ukwishyurira aho ukorera. Itegeko rya kera ryateganyaga ko utangije ubucuruzi wese ahita atangira kwishyura ipatanti ariko iri tegeko rigena ko ku batangije ibigo by’ubucuruzi bito n’ibiciriritse mu myaka ibiri (2) ya mbere ikurikira ishingwa ryabyo basonewe uyu musoro.

Igihe cy’Umusoro w’Ipatanti kibarwa ku mwaka, ni ukuvuga kuva tariki ya mbere Mutarama kikarangira ku itariki ya 31 Ukuboza buri mwaka.

Usora amenyekanisha akanishyura Umusoro w’Ipatanti bitarenze itariki ya 31 Mutarama y’umwaka yishyurira.

Iyo ibikorwa by’ubucuruzi bisoreshwa bitangiye nyuma y’ukwezi kwa Mutarama, umusoreshwa atanga Umusoro w’Ipatanti ungana n’amezi asigaye kugira ngo umwaka urangire habariwemo n’ukwezi ibikorwa byatangiriyemo.

Ku basoreshwa bakora ibikorwa by’ubucuruzi bidahoraho cyangwa by’ingarukagihe, Umusoro w’Ipatanti utangwa ku mwaka wose kabone n’iyo ibikorwa by’ubucuruzi bisoreshwa byaba bidakorwa mu mwaka wose.

Igipimo cy’Umusoro w’Ipatanti:

Inama Njyanama y’Akarere igena buri mwaka ahafatwa nk’icyaro cyangwa nk’umugi.

Imbonerahamwe ikurikira igaragaza ibipimo by’Umusoro w’Ipatanti haba mu cyaro, ahafatwa nk’umugi no mu migi ndetse no mu Mujyi wa Kigali.

Igipimo cy’Umusoro w’Ipatanti ku bucuruzi bwanditse ku musoro ku nyongeragaciro (TVA/VAT).

Ikitonderwa: Abasoreshwa bacuruza ibintu cyangwa serivisi zisonewe umusoro ku nyongeragaciro ariko agaciro k’ibyacurujwe kakaba karuta cyangwa kangana na miliyoni makumyabiri z’amafaranga y’u Rwanda (20.000.000 FRW) bishyura umusoro w’ipatanti ku buryo bumwe n’abasoreshwa biyandikishije ku musoro ku nyongeragaciro

Imenyekanisha ry’Umusoro w’Ipatanti
 
Iyo umusoreshwa akorera ibikorwa by’ubucuruzi mu mashami atandukanye, imenyekanisha rikorwa ku kicaro gikuru no kuri buri shami;
 
Iyo hari ishami ridafite igicuruzo cyangwa ridashobora kugaragaza igicuruzo cyaryo, Umusoro w’Ipatanti umenyekanishwa hashingiwe ku gicuruzo k’ikicaro gikuru;
 
Iyo umusoreshwa akorera ibikorwa by’ubucuruzi bitandukanye mu nyubako zitandukanye, buri gikorwa cy’ubucuruzi gikorerwa imenyekanisha ry’Umusoro w’Ipatanti;
 
Iyo ubucuruzi bumwe bugizwe n’ibikorwa byinshi bikorwa n’umuntu mu nyubako imwe, hakenerwa ikemezo kimwe kigaragaza ko Umusoro w’Ipatanti wishyuwe, hagakorwa n’imenyekanisha ry’umusoro rimwe kuri ibyo bikorwa byose by’ubucuruzi;
 
Iyo ubucuruzi bukorerwa ku butaka bwambukiranya imbibi z’Akarere, umusoreshwa amenyekanisha Umusoro w’Ipatanti muri buri Karere akoreramo.
 
Igihe ntarengwa cyo kwishyura Umusoro w’Ipatanti
 
Umusoro w’Ipatanti wishyurwa bitarenze tariki ya 31 Mutarama y’umwaka w’isoresha.
 
Iyo umusoro udatanzwe ku gihe, urwego rusoresha rushobora guhagarika ibikorwa by’ubucuruzi;
 
Umusoro w’Ipatanti usonewe:
 
Inzego za Leta zidakora ibikorwa by’ubucuruzi;
 
Ibijyanye n’itangwa, kumanikwa, kwerekana n’isimburwa ry’ikemezo cy’Umusoro w’Ipatanti:
 
Umusoreshwa afite inshingano yo kugaragaza ikemezo cy’uko yishyuye Umusoro w’Ipatanti aho akorera ibikorwa by’ubucuruzi bwe. Kutamanika ikemezo k’Ipatanti bihanishwa ihazabu y’amafaranga y’u Rwanda 10,000.
 
Umusoreshwa utaratangiye umusoro ku gihe yishyura:
 
 Inyungu z’ubukererwe: 1.5% buri kwezi by’umusoro wari kwishyurwa.
 
 Ibihano by’inyongera: 10% by’umusoro wari kwishyurwa ariko ntibirenge 100,000 Frw.
 
Umusoreshwa utarakoze imenyekanisha ku gihe n’uwatanze amakuru atari yo, yishyura 40% by’umusoro ugomba kwishyurwa.

Isoko rya Kijyambere riherereye mu karere ka Muhanga

Isoko rya Kijyambere rya Nyarugenge

Abatwara abagenzi kuri moto na bo bagira uruhare mu iterambere bishyura imisoro

Abacuruzi b’ibyiciro bitandukanye bose baba bagomba gutanga ipatanti