21°C , Mostly cloudy | Kigali-Rwanda
Umuyobozi w'urwego rw'igihugu rw'imiyoborere Prof.Shyaka Anastase

Itegeko rigenga Amadini n’Amatorero ryatangiye  kuvugururwa

Yanditswe na UWERA MARIE CLAIRE

Ku ya 20-02-2018 saa 06:43:22

Urwego rw’Igihugu rw’Imiyoborere (RGB) rutangaza ko amategeko agenga amadini n’amatorero mu Rwanda yatangiye  kuvugururwa.

Umuyobozi w’urwego rw’igihugu rw’imiyoborere Prof.Shyaka Anastase

Umuyobozi Mukuru w’Urwego rw’Igihugu rw’Imiyoborere, Prof. Shyaka Anastase mu kiganiro n’abanyamakuru ejo hashize tariki 19 Gashyantare 2018, yavuze ko uru rwego rwatangiye kuvugurura itegeko rimaze imyaka  5 rigenga amadini n’amatorero.

Yagize ati:“Turifuza amadini n’amatorero afite ibyangombwa, ni muri urwo rwego twatangiye kuvugurura itegeko rimaze imyaka isaga 5, no gushyiraho amabwiriza akoze neza, arimo ibyangombwa byose bisabwa, agenda afasha mu gukemura ibibazo bigenda bigaragara mu igenzura tugenda dukora kugira ngo Amatorero age mu murongo unoze wo kubaka igihugu kiza twifuza.”

Avuga ko kugeza ubu mu Rwanda hari Amadini n’Amatorero asaga ho gato 700 afite ibyangombwa bya burundu ariko hari n’andi menshi akora atariyandikisha.

Itegeko ryariho mbere ryateganyaga ko umuntu ushaka kugira Idini cyangwa Itorero atangira gukora no mu gihe atarabona ibyangombwa ndetse ko mbere hasabwaga ikemezo giturutse mu karere.

Prof Shyaka yagaragaje ibizavugururwa muri iryo tegeko yagize ati “Buri wese uzajya yigisha Abanyarwanda azajya aba yarabyigiye, kugira amategeko n’amabwiriza agenga Amatorero n’Amadini nk’urwego rw’igenzura mu mpuzamatorero no kubahiriza imiterere y’ibisabwa yaho abanyamadini bakorera ndetse no kubahiriza amasaha yo gusenga n’umutekano hirindwa urusaku.”

Iryo tegeko rivuguruye ryitezwe ho kuzongera ubuziranenge bwuzuye ku nsengero zivuka no kugabanya amakimbirane y’urudaca agaragara mu mikorere n’imiyoborere y’imbere mu matorero no kumenya uko umutungo w’imbere ukoreshwa.

Aha, Prof. Shyaka yatanze urugero rw’Amadini n’Amatorero acikamo kabiri, ari nayo mpamvu ituma habaho ukwiyongera kw’akajagari k’Amadini n’Amatorero atujuje ibyangombwa.

Igihugu cy’u Rwanda gitanga uburenganzira bwo gusenga no kujya mu miryango ishingiye ku myemerere ku Banyarwanda ariko hateganyijwe ko insengero zizajya zikorerwa ubugenzuzi ko zujuje ubuziranenge n’ibisabwa mbere yuko zitangira kwakira abantu bazijyamo.

 

Amadini n’Amatorero ni abafatanyabikorwa bakomeye mu guteza imbere Abanyarwanda n’igihugu muri rusange ariko hari abakoresha ubwo bushobozi bwabo bakigisha abantu ibitagororotse kandi bitemewe.

Prof. Shyaka akomeza asobanura ko hari inzego z’impuzamatorero usanga zidakora neza mu gukemura ibibazo mu gihe byavutse ndetse ko insengero zitujuje ibisabwa zatangiye gufungirwa.

Biteganyijwe ko bitarenze tariki ya 1 y’ukwezi kwa gatatu itegeko rivuguruye rigenga amatorero n’amadini rizaba ryashyizwe mu bikorwa.

 

TANGA IGITEKEREZO

Leave a Reply

Be the First to Comment!

avatar