28°C , Sunny | Kigali-Rwanda

Isuku bayigize umuco baca ukubiri n’indwara zabibasiraga

Yanditswe na Tumukunde Georgine

Ku ya 12-06-2019 saa 09:22:10
Nyirabahizi Veronique yita ku bihe by'ingenzi byo gukaraba intoki

Abaturage bo mu Murenge wa Rugabano na Gashari mu Karere ka Karongi mu Ntara y’Iburengerazuba baratangaza ko bamenye agaciro k’isuku bakayigira umuco, bikabafasha gukumira indwara zitandukanye zituruka ku mwanda; barakora bakiteza imbere kuko ntawukirwaragurika.

Bavuga ko ubukangurambaga bukorwa n’inzego zitandukanye ku bijyanye n’isuku bwatumye bahindura imyumvire, bareka ibyo bajyaga bakora bibwira ko nta cyo bitwaye nyamara ari ukwikururira indwara zituruka ku mwanda.

Bamwe mu bagiranye ikiganiro n’Imvaho Nshya, bagaragaje uko bita ku isuku mu buzima bwabo bwa buri munsi, uko ikorwa haba ku mubiri, ku myambaro, ku biribwa n’aho batuye bakabifatanya n’imirimo y’urudaca ikunze kugaragara mu cyaro.

Isuku y’aho batuye

Nyirabahizi Veronique utuye mu Mudugudu wa Nyarusange, Akagari ka Birambo, Umurenge wa Gashari, ni umwe mu batishoboye bubakiwe inzu, abana n’abana be babiri. Avuga ko mu bushobozi afite aharanira kwimika isuku kuko yasobanukiwe ko ari isoko y’ubuzima.

Ati: “Nahawe aho gutura heza nange mfite inshingano zo kuhagirira isuku, ngasukura mu nzu hose, aho turyama dore ko nta na nyakatsi ku buriri ikiharangwa, ntibagiwe gukubura mu mbuga, mu gikoni no gusukura ubwiherero. Isuku yazanye impinduka kuko mbere wasangaga umuntu ahora arwaye, ntabone n’uko akora ngo yiteze imbere.”

Nyirabahizi Veronique yita ku bihe by’ingenzi byo gukaraba intoki

Tuyisenge Eric utuye mu Mudugudu wa Nyarusange, we n’umuryango we batuye mu nzu ikurungiye, inateye ingwa, avuga ko mu mikoro make bafite babashije gusukura neza inzu yabo barwanya umwanda.

Ati: “Ubu ni uburyo bwakwifashishwa n’abatabasha kubona sima n’amarangi. Akenshi inzu iyo idakurungiye usanga izamo imbaragasa. Abajyanama b’ubuzima batwigishishe ibyiza byo gukurungira inzu, kandi urabona ko koko hasa neza.”

Yishimira ubumenyi butandukanye yungukiye mu bukangurambaga ku isuku. Yagize ati: “Ubundi ntitwari tuzi ko ubwiherero buhomwa bukanasakarwa, kuko ari ahajya umwanda twumvaga ko kuhagirira isuku ari uguta igihe, twari dufite ubwiherero butuzuye, budahomye butanasakaye, ubu dufite ububoneye kandi tubona ari byiza”.

Yakomeje avuga ko bari bafite n’imyumvire yo kuraza amatungo magufi mu nzu babamo. Ati: “Twakunze korora inkwavu, tukaziraza mu cyumba kimwe tukaryama mu kindi, ari ko ibyo ntibikibaho twamenye ko kwari ukwikururira uburwayi”.

Dusabumuhoza Claudine wo mu Kagari ka Mubuga avuga ko ntawukwiye kurarana n’amatungo ngo amwanduze indwara kandi hari uburyo bwo kuyubakira ibiraro

Isuku yo ku mubiri n’imyambaro

Abaturage bagaragaza ko basobanukiwe ko bagomba kwiyuhagira kenshi bakanamesa imyambaro yabo.

Bazirikana gukaraba intoki igihe cyose bavuye mu bwiherero, mbere yo gufata amafunguro, ku babyeyi bafite abana bato bakibuka kubikora mbere yo kubonsa no kubagaburira.

Uwumuremyi Marie wo mu Mudugudu wa Nyarusange yagize ati: “Umuntu agomba kwiyuhagira buri munsi, nkatwe turi abahinzi ntabwo wasiba kwiyuhagira ngo wumve ufite ubuzima, ikindi ni ukwambara imyambaro imeshe kandi ukaba wayanitse ku zuba ikuma neza, udukoko dutera indwara tugapfa”.

Uwumuremyi Marie asobanura ko atunganya amazi yo kunywa yifashishije igikoresho kiyayungurura cyangwa akayateka akayashyira mu kajerikani

Uko bategura amafunguro bita ku isuku

Uwingabiye Claudine utuye mu Mudugudu wa Karumbi, mu Kagari ka Mubuga, mu Murenge wa Rugabano, afite umwana w’uruhinja; avuga ko isuku yayigize umuco kugira ngo we n’umuryango we batekane.

Yagize ati: “Isuku nyitaho by’umwihariko kuko mfite umwana muto, kandi bigendana no gutegura indyo yuzuye, ugize isuku nturye neza nta cyo waba ukoze. Indyo yuzuye igizwe n’ibyubaka umubiri, ibirinda indwara n’ibitera imbaraga. Mfite imboga mu karima k’igikoni n’imbuto ndazihinga, byombi ntibijya bibura kuri buri funguro”.

Akomeza asobanura uko yita ku isuku ategura amafunguro. Ati: “Ibyo ngiye guteka nabihase, nateguye n’imboga, mbanza kubironga neza n’amazi meza, imbuto na zo nazironga nkazishyira ku isahane zikumuka.

Amasahane yo kuriraho ifunguro natetse kandi ryahiye neza, mba nayogeje kare nkayashyira ku gatanda kabugenewe ku kazuba akumuka; iyo atumutse wenda n’isazi zikayakoraho aba ari indiri y’udukoko dutera indwara zirimo inzoka zo mu nda, impiswi n’izindi. Ibikoresho byo ku meza ntakoresheje mbibika mu ndobo nkayipfundikira neza”.

Ashima gahunda zashyizweho na Leta zihuza abaturage n’abayobozi kuko bazikuramo inyigisho nyinshi zihindura imibereho yabo.

Ati: “Hari byinshi nungukiye mu mugoroba w’ababyeyi, ku bajyanama b’ubuzima, mu masibo n’ahandi. Ibyo kurira ku masahani yumutse sinari mbizi, sinitaga ku gukaraba intoki igihe ari ngombwa, sinanywaga amazi atetse numvaga kuvoma ku iriba ngahita nywa bihagije, ariko ubu imyumvire yarahindutse”.

Uwumuremyi Marie agaruka ku bijyanye no kunywa amazi meza kandi atetse, akebura abakinywa adatetse bitwaje ko badafite ibicanwa.

Yagize ati: “Kwita ku isuku ntibisaba ubushobozi buhambaye, sinemeranya n’abavuga ko kubona amazi atetse bigoye. Hari amafunguro atandukanye duteka twabanje guteka amazi agaserura; nk’umuceri, igikoma, n’ibindi, ushobora gusukura neza isafuriya, wajya guteka ayo mafunguro ugacanira amazi menshi ukaza gukuraho ayo kunywa”.

Akomeza avuga ko n’udafite igikoresho cyabugenewe kiyungurura amazi (Filtre), yajya ayateka akayashyira mu kajerikani gasukuye.

Mukamihigo Eugenie utuye mu Mudugudu wa Birambo, Akagari ka Birambo, na we ashimangira ko buri wese yagira isuku mu bushobozi bwe. Ati: “Isuku ni umuhate nta bwo igirwa n’ubushobozi, ubu se wagira umwanda ngo ni uko udafite ubushobozi? Buri wese mu rwego rwe yagira isuku […], mfite imyaka 72 kandi ndacyayitaho uko nshoboye, isuku ni isoko y’ubuzima”.

Ibikorwa by’isuku ntibireba abagore gusa

Ibikorwa by’isuku ntibigomba guharirwa abagore gusa nkuko bamwe mu bagabo babitangaje bahwitura bagenzi babo bagifite imyumvire y’uko isuku itabareba.

Tuyisenge Eric ati: “Iyo ni imyumire ya kera, biramutse bigenze bityo mu rugo isuku ntiyabaho kuko umugore hari igihe aba afite inshingano nyinshi, ubwo rero bisaba ko n’uwo bashakanye amufasha, isuku na yo isaba ubufatanye bw’abagize umuryango nge n’umugore wange turafatanya kandi numva ari byiza”.

Ndagijimana Jean Pierre utuye mu Mudugudu wa Karumbi mu Kagari ka Mubuga mu Murenge wa Rugabano na we ati: “ Nta bwo wabona ahantu hatari isuku ngo utegereze umugore ko aza kuhasukura, ntiwabona umwana yiyanduje ngo ureke kumusukura, n’amasahane urayoza ukanamesa”.

Ndagijimana Jean Pierre auga ko ibikorwa by’isuku bitereba umugore gusa

Inyigisho z’isuku zikomeje gushyirwamo ingufu

Mukamisha Speciose utuye mu Mudugudu wa Birambo, mu Kagari ka Birambo, amaze imyaka 10 ari Umujyanama w’Ubuzima, avuga ko hari intambwe ishimishije yatewe mu rwego rw’isuku bitewe n’ubukangurambaga bwashyizwemo ingufu.

Ati: “ Ubu umuturage wese azi ko agomba kuva mu rugo abanje gukubura, agasasa uburiri kandi ibiryamirwa bisukuye, akaba azi ko agomba kwambara inkweto, abafite abana bazi ko bagomba kubafurira, bakabuhagira, hari ukugira ubwiherero buboneye, agatanda k’amasahane, kandi bazi no gutegura indyo yuzuye iteguranywe isuku”.

Asanga hari indwara nyinshi zimaze gucika kubera kwita ku isuku.

Umuyobozi w’Akarere ka Karongi wungirije ushinzwe imibereho myiza y’abaturage Mukashema Drocelle, avuga ko hari intambwe igaragara yatewe mu rwego rw’isuku ariko bakomeje gushyira imbaraga mu bukangurambaga kugira ngo n’ukiri inyuma azamure imyumvire.

Ati: “Ubukangurambaga bw’isuku ntibugomba guhagarara; dukora ibiganiro n’abaturage, ibigo nderabuzima na byo biradufasha bikabigisha, tukifashisha n’Abajyanama b’Ubuzima. Hari abantu benshi badufasha mu bukangurambaga, kandi tuzajya dukora ku buryo abaturage bamaze kubimenya bigisha abandi”.

Intambwe yatewe mu isuku inashimangirwa na Mukamunana Alphonsine ushinzwe Ubuzima bushingiye ku bidukikije muri Minisiteri y’Ubuzima, uvuga ko isuku imaze kugera ku rwego rushimishije, haba ku bantu ku giti cyabo, aho batuye no mu migi.

Yagize ati: “Isuku mu Gihugu cyacu ihagaze neza, igeze ku gipimo gishimishije, iyo urebye abantu ku giti cyabo ubona bakeye, hari n’umuco Abanyarwanda bamaze kugira wo kwambara inkweto, kugeza ubu ubona bose bazambaye”.

Akomeza avuga ko ibyagezweho bishingiye kuri Politiki ya Minisiteri y’Ubuzima n’abafatanyabikorwa yo guteza imbere ubuzima bushingiye ku bidukikije yifashishije amatsinda (Clubs) y’ubuzima mu rwego rw’umudugudu, aho abaturage basabwa kwibumbira hamwe bagahabwa ibikoresho n’imfashanyigisho zibafasha kugira umuco w’isuku.

Ati: “Abaturage bo ubwabo baricara bakaganira, bakareba ibibazo bijyanye n’isuku nkeya bibugarije mu mudugudu wabo bakishakamo ibisubizo. Hari uturere tumwe na tumwe twatangiye iyo gahunda kandi ubona ko byatanze umusaruro”.

Mukamunana yongeraho ko ubukangurambaga bukomeje kuko guhindura imyumvire bisaba guhozaho, kugira ngo indwara zituruka ku mwanda zirusheho kugabanuka, dore ko ubushakashatsi bwakozwe muri 2015 (DHS 2015) bugaragaza ko mu bana bari munsi y’imyaka itandatu, abagera kuri 12% bahura n’impiswi nk’imwe mu ndwara zikomoka ku mwanda.

Ati: “ Imibare yagiye igabanuka ku gipimo gito cyane, ariko ubu dufite intego yo kumanuka tukagera ku 9%, mbere wabonaga hagabanukaho nka 1% nyuma y’imyaka itanu, ubu turashaka ko hagabanukaho nibura 3%”.

Arakangurira Abanyarwanda gukomeza kwirinda indwara zituruka ku mwanda, bakubahiriza ibihe byo gukaraba intoki kandi bakoresheje amazi meza n’isabune. Hifuzwa ko umuco wo gukaraba intoki wakomeza gutera imbere ukava kuri 5% uriho ubu.

Tuyisenge Eric n’umugore we basukuye inzu yabo bayikurungira bakanayitera ingwa

Abaturage basobanukiwe ko isuku ikorwa hose no ku buriri

TANGA IGITEKEREZO

Leave a Reply

Your email address will not be published. Required fields are marked *