22°C , Partly cloudy | Kigali-Rwanda
Isra The Holly Rapper yiyemeje kuzageza kure umuziki we

Isra The Holly Rapper yiyemeje kuzageza kure umuziki we

Yanditswe na Ndamyirokoye François

Ku ya 11-01-2019 saa 10:48:36

Inshallah Israel ukoresha mu buhanzi izina rya Isra The Holly Rapper urebererwa inyungu mu bijyanye n’umuziki na kampani yitwa KIKAAC Music akaba amaze amezi agera kuri abiri akorana n’iyo kompanyi yavuze ko yiyemeje kugeza umuziki we ku rwego rwiza akorera abantu umuziki mwiza.

Aganira n’Imvaho Nshya yavuze ko kuva yatangira gukorana n’iyo kompanyi bamaze gukora indirimbo imwe yitwa “Swag” ikoze mu buryo bw’amajwi ndetse n’amashusho.

Iyi ndirimbo iri mu njyana ya Rap Isra yavuze ko mu buryo bw’amajwi yakozwe na Devydenko naho amashusho akorwa na Fayzo.

Avuga ko kandi nyuma y’uko iyo ndirimbo isohoka abantu bayishimiye ngo kandi byamweretse ko akomeje gukora umuziki mwiza yagera kure hashoboka mu buhanzi bwe.

Intego ye avuga ko ari ukubanza umuziki we ukamenyekana ku rwego rw’u Rwanda hanyuma akazakurikizaho ku rwego mpuzamahanga.

Kugira ngo ibyo byose abigereho yavuze ko icyo asabwa ari gukora ibihangano byiza.

Aho akomora ubuhanzi bwe

Avuga ko akiri muto ababyeyi be bajyaga bamwigisha indirimbo zo kuramya Imana ndetse kuyihimbaza bityo akura akunda kuririmba ngo gusa afite na mushiki we ukunda kuririmba.

Uyu muhanzi avuga kandi ko mu 2012 yagiye mu nzu itunganya umuziki gukora indirimbo ngo gusa icyo gihe yabikoraga byo kwishimisha ariko aza guhura n’umwe mu bamufasha mu buhanzi bwe ari we Uhujimfura Jean Claude nyuma biza kurangira ashyizwe muri KIKAAC Music na Claude abarizwamo nk’umwe mu bayigize ariko ikaba iyoborwa na Dr Kintu unareberera inyungu z’umuhanzi Bebe Cool hano mu Rwanda.

Ku rundi ruhande, Isra yavuze ko umuhanzi mu Rwanda afataho ikitegererezo ari Riderman, muri aka karere ho ngo akunda umuraperi witwa Octopizzo wo muri Kenya naho ku rwego rw’Afurika ho ngo abahanzi yiyumvamo cyane harimo Sarkodie, umuraperi ukomoka muri Ghana.

Ku rwego rw’Isi ho yavuze ko ahanini akunda umuhanzi bitewe n’uba arimo gukora ibihangano byiza.

Nubwo ari umuraperi kandi avuga ko ashobora kurapa mu njyana zitandukanye.

Dr Kintu avuga ko nubwo areberera inyungu za Bebe Cool mu Rwanda abarizwa no muri iyo kompanyi ya KIKAAC ifasha abahanzi banyuranye dore ko yavuze ko nubwo bafasha Isra Holly Rapper bakorana n’abandi bahanzi ngo kandi imiryango irafunguye kuri buri muhanzi.

Umuhanzi Isra kandi ngo muri uyu mwaka afite imishinga myinshi azageza ku bakunda umuziki we ngo dore ko ubu arimo gukora indirimbo zitandukanye, Dr Kintu ahamya ko zizanyura abazazumva.

Isra The Holly Rapper yiyemeje kuzageza kure umuziki we

TANGA IGITEKEREZO

Leave a Reply

Your email address will not be published. Required fields are marked *