26°C , Partly sunny | Kigali-Rwanda

Ishuri New Life Christian Academy rirashimira Leta ibyagezweho mu burezi

Yanditswe na Amani Claude

Ku ya Jul 11, 2018 saa 5:02

Ubuyobozi bw’Ikigo New Life Christian Academy gikubiyemo ishuri ribanza n’iryisumbuye New Life Christian High School burashima ko nyuma y’imya 17 iki kigo kimaze gikorera mu Karere ka Kayonza hari byinshi bimaze kugerwaho mu burezi ku bufatanye na leta y’u Rwanda.

Kabanda Richard Umuyobozi w’Ishuri New Life Christian High School

Kabanda Richard Umuyobozi w’iri shuri ryigenga avuga ko ryashinzwe mu mwaka wa 2001 na Rev. Dr. Buregeya Charles, nk’umwe mu banyarwanda batahutse agasanga hari abana benshi batigaga.

Yatangije ishuri ry’inshuke ndetse anishyurira abana icyenda ishuri ariko abona bakeneye uburyo burambye buzafasha na barumuna babo ndetse n’abo bazabyara, ariko anashakisha imishinga yishyurira abana babaga batishoboye.

Ishuri New Life Christian Academy rirahamya ko u Rwanda rumaze guteraintambwe ifatika mu burezi

Iri shuri ryaje kubyara amashuri abanza, ndetse ubu bakaba bafite amashuri yisumbuye aho bibanda ku kwigisha amashami y’ubumenyi (sciences) rikaba rinafite umwihariko wo kwigisha amasomo y’ubuyobozi na Bibiliya .

Iri shuri rifite abanyeshuri 580 mu mashuri abanza na 797 bari mu mashuri yisumbuye biga bataha abandi bakaba mu kigo. 78% by’aba bana bishyurirwa n’umushinga African New Life Ministries ndetse iki kigo  ni kimwe mu bigize uyu muryango ufasha n’abandi bana bari mu bigo bitandukanye nka Kageyo, Kirenga na Rwisirabo aho hafashwa abana bagera ku 9000.

Iki kigo gifite abarimu babifitemo uburambe dore ko mu biruhuko abarimu babigisha muri iki kigo bifashishwa mu kwandika ibitabo by’integanyanyigisho nshya no guhugura abandi barimu kuri yo ku rwego rw’igihugu.

Kabanda akomeza avuga  intego yabo ari uguharanira ubudasa mu mitsindire. Yagize ati “Dufite abana benshi bagiye baza mu bambere mu gihugu, mu kiciro rusange (Tronc Commun) no mu mashuri abanza (primaire) bagiye buzuza mu bizamini bya Leta. Tronc Commun twari dufite abana  86 bose baje mu kiciro cya mbere n’icya 2, naho mu mashuri yisumbuye, dufite ibikoresho byose dukeneye hari Laboratwari 3 na gahunda ya “Smart Classroom”.

Abarimu bigisha bifashishije ibikoresho by’ikoranabuhanga, kandi iki kigo gifite amahuriro menshi (clubs) afasha abanyeshuri kwiga ibindi bintu birebana n’imibereho y’igihugu hamwe no gusabana.

Iki kigo cyubatswe mu buryo bujyanye n’igihe

Mu gihe u Rwanda rwizihiza isabukuru ya 24 yo Kwibohora, Kabanda Richard arashimira uruhare Leta y’u Rwanda igira mu kubafasha muri aka kazi k’uburezi, abayobozi barabasura cyane kugira ngo bamenye ibyo bakora bajyanisha na Politiki y’igihugu y’uburezi.