27°C , Partly sunny | Kigali-Rwanda

Ishoramari rya BRD rishingiye kuri gahunda za Leta

Yanditswe na KAYITARE JEAN PAUL

Ku ya 20-10-2019 saa 19:48:23
Umuyobozi Mukuru wa BRD, Rutabana Eric, yagaragaje aho ishoramari rya BRD rishingiye

Umuyobozi Mukuru wa Banki itsura amajyambere mu Rwanda BRD, Rutabana Eric, yatangaje ko ishoramari ryayo rishingiye kuri gahunda za Leta, mu rwego rwo kugira ngo umubare munini w’Abanyarwanda babone imirimo ndetse no kugira uruhare mu kugabanya ibyinjira mu gihugu, bityo hagakurwaho icyuho kigaragara mu byoherezwa n’ibitumizwa mu mahanga.

Mu kiganiro kihariye umuyobozi wa BRD Rutabana Eric, yagiranye n’Imvaho Nshya, yasobanuye ko ishoramari rya Banki itsura amajyambere mu Rwanda ryibanda ku byo Leta yahisemo cyane cyane ibice by’ubukungu bituma umubare munini w’Abanyarwanda ubona imirimo bityo Abanyarwanda bagashobora kuva mu bukene.

Rutabana yagize ati “Ibyo dushoramo imari ni ubuhinzi nk’ikintu k’ibanze gitunze Abanyarwanda. Nubwo ubuhinzi bugaragara nk’ubugoye nk’ahantu ho gushora imari, ariko ntitwabunyura ku ruhande kuko ubuhinzi burimo Abanyarwanda bagera hafi kuri 70%, bivuze ngo niba ushaka guteza imbere Abanyarwanda nta bwo wakwirengagiza wa mubare urimo abantu bageze kuri 70%.”

Umuyobozi Mukuru wa BRD, Rutabana, akomeza agira ati “Ikindi dukora ni ukugabanya icyuho kiri hagati y’ibyoherezwa mu mahanga n’ibikurwayo. Ahongaho dufasha abohereza ibintu mu mahanga kugira ngo barusheho kongera ingano y’ibyo bohereza ndetse n’ubwiza bwabyo, bityo agaciro kabyo kazamuke ariko nanone tugafasha abashora imari mu Rwanda kugira ngo hagabanywe cya cyuho k’ibintu bikurwa mu mahanga.”

Ashimangira kandi ko BRD ifasha mu mishinga y’abikorera kugira ngo bashobore kubona amafaranga yo gushora mu mishinga ibyara ingufu z’amashanyarazi, ibyo bigatuma n’ibindi bikorwa bishobora gukorwa kuko byabonye umuriro wo gukoresha.

Avuga kandi ko ibindi BRD yibandaho muri iyi minsi ari ibijyanye n’inzu, nko gushora imari mu bwubatsi bw’inzu cyane cyane iziciriritse zituma umubare w’Abanyarwanda benshi badafite amacumbi bashobora kuzibamo kandi ku buryo buboroheye.

Ku rundi ruhande, Rutabana avuga ko hari ibindi bikorwa bashoramo imari. Yagize ati “Ibindi dushoramo imari ni ibikorwa remezo birimo ingendo (Transport), ibibuga by’indege, ibikorwa by’amashanyarazi, uburezi, ikoranabuhanga, ibyo byose ni ibintu dushoramo imari ndetse n’izindi serivisi zirimo ubuvuzi.”

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.