19°C , Partly cloudy | Kigali-Rwanda

Ishami rya Kenya Airways ryafunguye ingendo Kigali-Nairobi ku mafaranga atageze ku bihumbi 100

Yanditswe na Ntawitonda Jean Claude

Ku ya 10-11-2019 saa 12:21:02

Jambojet, ishami ry’Ikigo Kenya Airways gitanga serivisi z’ubwikorezi mu kirere, ryatangiye kugurisha amatiki y’ingendo Kigali-Nairobi mu gutegura ingendo zizatangira tariki 25 Ugushyingo 2019.

Biteganyijwe ko izo ngendo zizatangirira Nairobi-Kigali ari ku wa Mbere ahagana saa 14:35, indege ihaguruke i Kigali isubira Nairobi saa 16:15 ku giciro kingana n’amadorari y’Amerika 107, angana n’amafaranga y’u Rwanda 99 670 ku rugendo rumwe.

Iki kigo kigiye gutangira ingendo zihuza u Rwanda na Kenya mu gufasha abagenzi gukora ingendo zo mu kirere ku biciro biri hasi ugereranyije n’ibisanzwe.

Umuyobozi wa Jambojet Allan Kilavuka, yatangarije Imvaho Nshya ko urugendo rwerekeza i Kigali ruri mu bikorwa byo kwagura gahunda z’ingendo mu karere k’Afurika y’Iburasirazuba.

Yagize ati: “Urugendo rushya rwa Kigali-Nairobi ruri muri gahunda yacu yo kwagura ibikorwa mu karere tugahuza imirongo mpuzamahanga ku mugabane ikagera kuri itatu, ukuyemo iyo tunyuramo mu izina rya Kenya Airways, ikagera no ku 9 yose Jambojet ikoreramo muri rusange. »

Jambojet kuri ubu yerekeza mu bice bitandukanye bya Kenya birimo Mombasa, Malindi, Ukunda (Diani), Kisumu na Entebbe muri Uganda. Mu wa 24 Ugushyingo 2019 mbere y’uko itangira ingendo za Kigali, iyi kompanyi izaba yaraye ifunguye n’ingendo za Nairobi-Mogadishu (Somalia). 

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.