19°C , Intermittent clouds | Kigali-Rwanda

Isano y’itangazamakuru n’Inteko Ishinga Amategeko mu Rwanda

Yanditswe na KAYITARE JEAN PAUL

Ku ya 28-10-2020 saa 07:52:13
Abanyamakuru bibukijwe ko itangazamakuru ari ijwi rya rubanda

Perezida wa Sena Dr Iyamuremye Augustin yagaragaje isano iri hagati y’itangazamakuru n’Inteko Ishinga Amategeko, asobanura ko abagize Inteko Ishinga Amategeko ari intumwa za rubanda, itangazamakuru rikaba ijwi rya rubanda.

Ibi yabigarutseho kuri wa Kabiri tariki 27 Ukwakira 2020 ubwo yatangizaga amahugurwa y’iminsi ibiri y’abanyamakuru mu cyumba k’inteko rusange ya Sena.

Ni amahugurwa yateguwe n’Inteko Ishinga Amategeko ifatanyije n’Inama Nkuru y’Itangazamakuru (MHC), aho abanyamakuru basobanurirwa inshingano, imiterere y’imikorere y’imitwe yombi y’Inteko Ishinga Amatageko, ubwuzuzanye bwayo n’ubundi butegetsi bwa Leta, ndetse n’uruhare rw’itangazamakuru mu kumenyekanisha uko Inteko Ishinga Amategeko ishyira mu bikorwa ishingano zayo.

Perezida wa Sena, Dr Iyamuremye, asobanura ko itangazamakuru ari ijwi rya rubanda ku rundi ruhande abagize Inteko Ishinga Amategeko bakaba intumwa za rubanda.

Ati: “Itangazamakuru ni inkingi y’iterambere rishingiye ku muturage. […] Inteko Ashinga Amategeko n’itangazamakuru ni inzego ebyiri zifitanye isano ya hafi kuko niba abagize Inteko ari ijisho, amatwi ndetse n’umutima w’abaturage, abanyamakuru ni ryo jwi ryabo”.

Dr Iyamuremye Augustin, Perezida wa Sena, yagaragaje isano y’itangazamakuru n’Inteko Ishinga Amategeko

Agaragaza ko uko demokarasi yagiye itera imbere, impuguke mu miyoborere zageze aho zifata itangazamakuru nk’ubutegetsi bwa kane kubera uruhare rifite mu guhuza ibyifuzo by’umuturage n’inshingano z’ubuyobozi zijyanye n’ibikorwa bigamije guteza imbere abaturage.

Avuga ko itangazamakuru ritegerejweho uruhare runini mu bijyanye no gusobanurira abaturage uburenganzira bwabo no kubafasha kubona amakuru bakeneye kugira ngo bashobore kwiteza imbere.

Ati: “Ni yo mpamvu itangamazamakuru rigomba gushingira ku bumenyi mu bijyanye n’imiterere n’imikorere y’inzego bya Leta. Ni inshingano z’ubuyobozi korohereza ibitangazamakuru ni nacyo nk’Inteko Ishinga Amategeko twifuza kandi tugomba guharanira”.

Umunyamabanga Nshingwabikorwa w’Inama Nkuru y’Itangazamakuru, Mbungiramihigo Peacemaker, avuga ko amahugurwa abanyamakuru batangiye ari ikimenyetso gikomeye kerekana ko Inteko Ishinga Amategeko ishyigikiye byimazeyo iterambere ry’itagazamakuru.

Mbungiramihigo agaragaza ko kujijura Abanyarwanda n’abakurikira ibitangazamakuru, ari zimwe mu nshingano z’itangazamakuru.

Yagize ati: “Muri uko kubajijura, kumenya imikorere y’inteko bigomba kuza ku isonga nk’urwego rw’igihugu rushinzwe gushinga amategeko no kureba ko yubahirizwa mu nyungu z’Abanyarwanda”.

Yifuza ko abanyamakuru bahabwa ubumenyi bwatuma bagira isura nziza ku mikorere y’Inteko Ishinga Amategeko, bagakora inkuru zifasha Abanyarwanda bityo bakarushaho gusobanukirwa imikorere y’Inteko Ishinga Amategeko.

Ibipimo by’Urwego rushinzwe imiyoborere (RGB) rugaragaza ko ubwisanzure bw’itangazamakuru, mu 2013 bwari kuri 71.5%. Ibipimo byarazamutse bigera ku gipimo cya 83.3% muri 2018.

Inama Nkuru y’Itangazamakuru ivuga ko ibyo byatewe na poritiki yo kuvugurura itangazamakuru.

Abanyamakuru bitabiriye amahugurwa bavuga ko bazayungukiramo imikorere y’Inteko Ishinga Amategeko

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.