22°C , Mostly cloudy with thunderstorms | Kigali-Rwanda
Uyu we ni muri ubu buryo yabyinagamo

Irushanwa ryo kubyina rirakomeje

Yanditswe na NDAMYIROKOYE FRANÇOIS

Ku ya 26-01-2018 saa 09:48:54

Mu rwego rwo kugarura umuco wo kubyina imbyino zinyuranye nka kimwe mu bigize imyidagaduro, kuva ku ya 13 Mutarama 2018 mu bice binyuranye by’u Rwanda harimo kubera amarushanwa ajyanye no kubyina imbyino zo muri Afurika no hanze yayo.  

Aba ni ababa bagize akanama nkemurampaka

Niyomwugeri Aaron utegura iri rushanwa yatangarije Imvaho Nshya  ko iri rushanwa rimaze kubera mu ntara eshatu, Iburengerazuba, Amajyaruguru ndetse n’Uburasirazuba ngo ariko n’ahandi rigomba kuhagera.

Mu Ntara y’Uburasirazuba yavuze ko ryabaye ku ya 13 Mutarama 2018, ku ya 20 Mutarama 2018 ribera mu Ntara y’Uburengerazuba  mu Karere ka Rubavu   naho ku ya 21 Mutarama 2018 ribera  mu Ntara y’Amajyaruguru mu Karere ka Musanze.

Intara y’Amajyepfo avuga ko iri rushanwa rizaberayo ku ya 28 Mutarama 2018 rikazabera  mu karere ka Huye.

Ahantu irushanwa ryagiye ribera, Niyomwungeri avuga ko abantu baryishimiye ngo kandi n’abahatana baryitabira ku bwinshi.

Abahatana babyina mu buryo bunyuranye

Yagize ati “Aho irushanwa ribera abantu babyakira neza barabyishimira ubona ko  kubyina byagarutse babikeneye”.

I Kayonza yavuze ko hitabiriye amatsinda 4 hatsinda iryitwa YCG, Rubavu hitabira  amatsinda 9  hatsinda iryitwa “ Hope Dance crew”, Musanze hitabira amatsinda 8 hatsinda iryitwa “ The Matters”.

Mu Ntara y’Amajyepfo yavuze ko hiyandikishije amatsinda 16 ngo naho mu mujyi wa Kigali hiyandikishije amatsinda 38 irushanwa rikaba rizaba  ku ya 3 no ku ya 4 Gashyantare2018.

I Kigali yavuze ko impamvu irushanwa rizaba iminsi ibiri ari uko  hari amatsinda menshi ngo kandi hazatoranywa amatsinda 2 azaba yahize andi.

Abantu bajya kwihera ijisho uko babyina

Amatsinda 6 arimo azava mu Ntara no mu Mujyi wa Kigali azahurira mu irushanwa rya nyuma, Niyomwungeri yavuze ko itsinda  rizaba irya mbere rizahembwa miliyoni 1. Irushanwa rya nyuma rizaba ku ya 17 Gashyantare 2018 i Rubavu.

Itsinda rizaba irya kabiri yavuze ko rizahabwa ibihumbi 300 naho irya gatatu rikazahabwa 200 ayandi 3 akazagenerwa agashimwe.

Hahatana amatsinda anyuranye

Mu bice binyuranye  by’igihugu uko imyaka izajya ishira ngo hazajya habera irushanwa rya nyuma rijyanye n’aya marushanwa.

Umuhanzikazi Mbabazi Phionah ni umwe mu bagize akanama nkemurampaka muri iryo rushanwa.

AMA-G The Black ni we muhanzi utaramira abantu muri ayo marushanwa naho Queen Kalimpinya wabaye igisonga cya 3 cya Miss Rwanda 2017 ni we ushinzwe imenyekanishabikorwa  muri iryo rushanwa.

Ama-G The Black ni we muhanzi utaramira abantu mu marushanwa

Muri ayo marushanwa kandi hanatangirwamo ubutumwa bwo kwirinda SIDA.

 

TANGA IGITEKEREZO

Leave a Reply

Be the First to Comment!

avatar