19°C , Partly cloudy | Kigali-Rwanda

Ireme ry’uburezi: Umwarimu mu ishuri azajya agira abamwunganira

Yanditswe na Mugisha Benigne

Ku ya 15-10-2019 saa 17:05:33
Minisitiri w'uburezi, Dr Mutimura Eugene

Minisitiri w’Uburezi, Dr. Mutimura Eugène, atangaza ko hari gahunda igiye gushyirwa mu mashuri abanza kuva mu mwaka wa mbere kugera mu mwaka wa gatatu, aho ishuri rizajya rigira umwarimu urishinzwe n’undi umwe cyangwa babiri bamwunganira, akaba ari mu rwego rwo gukomeza gushakisha ireme ry’uburezi mu mashuri abanza n’ayisumbuye.

Ibi byasobanuwe na  Dr. Mutimura Eugene, kuri uyu wa kabiri, tariki ya 15 Ukwakira 2019, mu nama yahuje iyi Minisiteri n’abafatanyabikorwa mu rwego rwo kurebera hamwe ibyagezweho mu burezi umwaka ushize n’ibikwiye gushyirwamo imbaraga mu mwaka utaha.

Yagize ati “Umubare w’abarimu ugereranyije n’abanyeshuri bigisha mu cyumba ntuhagije, ni yo mpamvu mu mwaka wa mbere kugeza mu wa gatatu, ishuri rimwe rizaba rifite umwarimu urishinzwe n’abandi babiri bo kumwunganira.”

Avuga ko ibyo bizashoboka kuko amafaranga yo guhemba abarezi biyongereyeho ahari, kandi ngo mu by’ukuri icyumba k’ishuri kirimo abana 70 gikwiye kuba gifite abarimu babiri.

Avuga ko kandi umwarimu wo mu mashuri abanza ahanini aba azi indimi nk’Ikinyarwanda n’Icyongereza, ashobora rero kwigisha ishuri ry’abana 70 agahabwa undi umwe cyangwa babiri bamwunganira.

Minisitiri w’Uburezi avuga ko mu kiciro cya mbere cy’amashuri abanza byagaragaye ko abanyeshuri baba bakiri bato, bakaba bakeneye kugira abarimu bihariye, hakabaho umwe ushinzwe ishuri n’abandi bamwunganira, bizatuma abana biga neza kandi bakurikiranwa kugira ngo bose bagendere rimwe.

N’ubwo ngo amafaranga yo guhemba abo barezi ahari, ngo hanakenewe ibindi byumba by’ishuri kugira ngo hagabanywe ubucucike, ari nayo mpamvu uyu munsi ibyumba by’amashuri bikomeje kubakwa mu rwego rwo kunoza imyigire y’abanyeshuri hagamijwe kugera ku burezi bufite ireme.

Iki kibazo kizakemuka ku bufatanye bwa Leta na Banki y’Isi kuko habonetse amafaranga yo kubaka ibyumba by’amashuri bishya biza byiyongera ku byari bisanzwe bihari.

Ku bijyanye n’uburezi bw’inshuke, aho hari ikibazo cyo kubona ibihembo by’abigisha amashuri y’inshuke, Minisitiri Mutimura avuga ko amafaranga yabonetse, ngo igisigaye ni ukubishyira ku murongo.

Aha yatanze urugero rw’amafaranga ahari yatanzwe angana na miriyari 3.2 yo gushyira abarezi mu mashuri y’inshuke, igisigaye ngo ni ukubinoza.

Mbabazi Faith, ni umukozi wa VSO, umwe mu bafatanyabikorwa ba Minisiteri y’Uburezi, avuga ko iyi gahunda Minisiteri y’Uburezi ifite yo guhindura uburyo bw’imyigishirize mu kiciro cya mbere cy’amashuri abanza, buri shuri rikagira urishinzwe n’abandi bamwunganira, ngo asanga ari byiza kuko bizafasha abana kugira umwarimu umwe bahorana n’abandi bamufasha, bikazatuma aba bana biga neza aho guhinduranya abarezi buri kanya no muri buri somo kandi ari abana bato cyane, kuko ubusanzwe byarushagaho kubayobera.

Agira ati “Ubundi abana bo mu kiciro cya mbere cy’amashuri abanza, ni ukuvuga mu mwaka wa mbere, uwa kabiri n’uwa gatatu, baba bakeneye kugira umwarimu bahorana, ubamenya na bo bakamumenya kandi bakamwiyumvamo kuko aba ari abana bato ntibaba baragera mu gihe cyo guhindagura abarimu mu maso yabo. Iyi gahunda Minisiteri ishyizeho rero ni nziza cyane izafasha kuzamura ireme ry’uburezi muri iki kiciro.”

Murekatete Annette we ni umubyeyi, avuga ko kwigisha abana mu kiciro cya mbere cy’amashuri abanza mu buryo abarimu basimburanamo (Professorat) ubusanzwe yabibonaga nk’ikibazo, ngo kuko abana bato baba bakeneye umwarimu umwe ubigisha kuko bituma bamumenyera ndetse bakageza n’ubwo bisanisha na we, icyo gihe barushaho kumwiyumvamo no kumukurikira mu gihe yigisha no gufata ibyo abigisha.

Avuga ko muri iki kiciro cy’amashuri bitorohera umwana kubona abarimu benshi mu maso ye ku munsi umwe, ngo ikindi uko buri mwarimu yinjiye umwana asa nk’umubonye bwa mbere mu gihe hari uwari asoje isomo yari amaze kumenyerana na we. Ngo ibyo rero birushaho kumuyobera bigatuma atiga neza.

Umwanditsi:

Mugisha Benigne

63 Comments on “Ireme ry’uburezi: Umwarimu mu ishuri azajya agira abamwunganira”

  1. Ibi nanjye ndemeza ko bizagira umusaruro ushimishije KU Ireme ry’uburezi.
    Minister n’abamwunganiye bakomeze bashakishe ingamba zatuma turushaho kubona umuti w’ibibazo dufite mu burezi bw’abana bacu

  2. Ibi ni byo byari byarabuze rwose dushimiye cyane abatekereje ko abana bakeneye kwitabwaho by’umwihariko reka dutegereze uko birzashyirwa mu bikorwa kuko iyo uburezi bukoreshejwe nabi ndaho twaba tuganira igihugu.

  3. Ibi ntacyo bizakemura. Nibubake amashuri, umwarimu yigishe abo ashoboye gukurikirana, kabiri, nibahembe umwarimu. Wakwita ute Ku bana 70, abawe 2 cyangwa 3 bakunaniye?

    1. Ibyo uvuga harimo ukuri ariko nanone dutekereze kure….ko no muri za kaminuza ireme ryuburezi rikemangwa nabo bahembwa nabi?
      Ntago solution gusa ari ugutanga umushahara nubwo nawe wakagombye kongerwa.Niyi nayo ni motivation twizere ko nibindi bizaza.

      1. Gasimu we
        ni byo ntabwo umushahara wonyine wakemura ikibazo dufite cy’ireme ry’ uburezi. Ariko reka nkubaze: Kuki amashuri ya ‘privés’, abana baba barite ubumenyi n’ubushobozi mu byo biga kurusha aya Leta? Dere impamvu, nzikubwire n’umuntu ukurikiranira hafi iby’ uburezi:
        1. MWARIMU AHEMBWA NEZA.
        2. IBIKORWA REMEZO( Ibyumba, bihagije, nta bucucike, ibitabo; apana igitabo Ku bana 10, intebe, computer and internet….)
        3. MWARIMU WAHAWE IBYANGOMBWA, ARAFASHWA KANDI AGAKURIKIRANWA, UMUNSI KUWUNDI. ( Accountability) BITUMA NAWE AKURIKIRANA BURI MWANA.
        4. ABABYEYI BAGIRA URUHARE MU MYIGIRE Y’ABANA BA BO. ( Kubaha ibikoresho bihagije, kubagira inama( motivation) gukurikirana imyigire n’ imyitwarire…)
        5. IGITSURE CY’UBUYOBOZI, ABARIMU N’ ABABYEYI.( Bose bahangayikishwa n’ubuzima bwa buried munsi bw’ umwana kuko NI CYO KIBARAJE ISHYINGA; NI AKAZI BISHIMIYE .

        Naho ahandi, MWARIMU BAMWISE cg BAMWITA MAGORWA. KUBERA IKI?
        1. USHAKA GUTANGA URUGERO RWIZA RW’UMUNTU UCIRIRITSE cg WINJIZA BIKE, AVUGA RUNAKA W’ UMWARIMU. ( Ngaho nawe nkorera budget ya 40,000 cg 50,000frs)
        2. ABABYEYI BIYAMBUYE INSHINGANO MAZE NA LETA YIYEMEZA KWIKORERA UMUZIGO ITAZASOHOZA. ( Umubyeyi arakubwira ati”umusaza yaduhaye amashuri, ntiyatwima ibiryo n’amakayi y’abana,; ubwo mwarabirigishije ( mwarabyiririye!). MURI MAKE, UYU MUBYEYI YABYAYE NTAGAHUNDA YO KURERA.
        3. MWARIMU UHANGAYITSE ARARERA/ ARIGISHA UMWANA UHANGAYITSE. ( AHA, WIBUKE KO HARI ABAZANWA KU NGUFU N’ INZEGO ZINYURANYE( kuri bo, ishuri ni gereza)
        4. UBUCUCIKE BURENZE URUGERO, NTA NTEBE, IBITABO REKA DA, IMFASHANYIGISHO, ASHWI, AMASAHA MENSHI Y’ AKAZI….
        5. PROFESSORAT: NI GUTE HEJURU Y’IBYO BIBAZO BYOSE, MWARIMU UMUHA IMINOTA 40 YOKUBA ARANGIJE KWIGISHA ISOMO?
        6. ICYISWE IBIDANAGO: NI GUTE MWARIMU WIGISHA KUVA SAA 7:00 – 5pm UMUSABA KUBA AFITE AHO YATEGURIYE BURI SOMO? ( Abikora ryari? AHO NTIHARI AMASAHA ATIGISHA, AKICARA AKIRWANAHO, DORE KO KUTABISANGANWA ARI AKAGA?)
        7. ABABYEYI BARADOHOTSE, LETA IRASABA MWARIMU IBYO ITAMUHAYE N’ IGITSURE KIREMEREYE, HANYUMA MWARIMU AGAKORA YINTWANAHO, MBESE AKORERA IJISHO.

        *REKA NSOZE NSHIMIRA MINISTER KUKO NAKARE KOSE UMWANA AGOMBA GUTINDANA N’ UMUREZI. UBUNDI BABIKURIYEHO IKI?
        N’IBINDI BYOSE BYATUMAGA UMUNYESHURI AMENYA IBYO YIGA, BIGATUMA MWARIMU ABONWA KANDI AKUBAHWA MURI SOSIYETE, NIBIREBWEHO. NAHO IREME RYO KU MUNWA NA MEDIAS NTIRIZIGERA RIBONEKA. MURAKOZE, NDAKEKA ABO TUDAHUJE IBITEKEREZO BUBAHA UKO MBYUMVA KANDI MBIBONA NK’ UKO NANJJYE MBIBAGENZEREZA.

    2. Nanjye ndabona ikibazo ni umushara udahagije baramutse bongereye umushara wa MWARIMU nibindibyo se by agenda neza noneho bakongera ibyumba byamashuri. ariko kongera ni y UMVA byamashuri MWARIMU agihembwa ubuse bwamfaranga babwo murakora ubusa mbese murakama ikimasa kbx

  4. Iki cyemezo ni kiza cyane kizadufasha mu burezi cyane kuko abana bato kandi benshi mu ishuri,umwalimu kubakurikirana ntibyoroha. Ni byiza cyane turabishimye.

  5. Tubaye dushimiye iyo support ariko ngewe nagirango ntange igitekerezo niba amafaranga ahari nuwo akaba atari motivated bitewe n’umushahara we udahagije bitewe n’ubuzima buhenze Ayo mafaranga yakabaye yongererwa uwo Mwalimu kugirango Abe motivated nibyo byose yabikora

  6. Ibi by a professorat twagiye tubigaragaza kuva kera twerekana ko bidakwiye muri Primary bakagenda badutera utwatsi none barashyize babonye ko Nta musaruro byatangaga rwose.Erega ntabwo twakora ibyo mu bihugu biturenze tutaramera nkabo cg ngo tugire ubushobozi.Gusa Imana Ishimwe ubwo bimwe mutangiye kubikosora

  7. Kongera abarimu mu ishuri se nibyo bizakemura Ireme ryuburezi ? ongera umushahara wa mwarimu wongere nibyumba abana bigiramo umubare buwucucike ugabanyuke maze urebe ko bitagenda neza.

  8. Kubwange ntacyo bizakemura.ubundi, ibibazo ni 2.ubucucike bw’abana n’umushahara wamwarimu.mugihe mwarimu azaba agikurikurana abana 70 ni ikibazo,kuko nubundi ntihazajyamo abarimu 2 icyarimwe. nibubake amashuri bagabanye ubucucike,ayo mafaranga bayongeze mwarimu barebe ko ireme ry’uburezi ritaboneka.

  9. Inama nzima zubaka zigamije kuzana Irene ry’uburezi igihe zitagizwemo uruhare narindi Mwalimu we ushyira mu bikorwa mbona haba hariho kurenga etape

  10. Ni byiza ko muhora mutekereza ku burezi kandi ni byo biranakwiye. Nge mbona kuzamura ireme ry ‘uburezi mu mashuri byahera gukemera ikibazo cy ‘umushahara cya mwarimu no kugabanya ubucucike mu Majuro. Moralize.

  11. Nibyo rwose Ababa bato profesora irabagora bityo kugira umwarimu umwe nibyiza cyane.gusa ariko aho kongeraho abandi bamufasha nabo batari motive kubera agashahara gake nibongere ibyumba umubare wabana ugabanyuke banongere umushahara ujyane nibiciro biri kuisoko.

  12. Ibi ni byiza cyane, bizadufasha gkemura ikibazo cy’abana benshi mu ishuri byagoraga mwalimu gukurikirana niba bumvise isomo. Ku rundi ruhande ahubwo hashyirwa imbaraga muri recruitment kuko niho byazambiye cyane cyane ku barezi binjiye mu kazi barakoze candidat libre bakaza gushakira amaramuko mu burezi kuko ariho hari akazi.. Mfite impungenge ko abarezi bazaduha baba benda gusa na bamwe nabo navuze haruguru. Recruitment yajya isaba na TTC transcripts

  13. Ibintu ministry y’uburezi yakoze nibyo kuko umwana wo mumwaka wambere kugirango yigishwe nabarimu benshi ntabwo byaribyo.umwana yakagombye kugira umwarimu amenyera
    Ibi rero bikaba bizatuma ireme ry’uburezi ryiyongera cyane cyane mumashuri abanza

  14. Icyo kemezo ni kiza nikita ku mibereho ya mwarimu kandi hakanakemurwa ikibazo k’intebe nkeya ziri mu mashuri.

  15. Niba professorat iteje ikibazo, jyewe ndabona no gushyiraho abarimu bunganira na byo ni professorat. Ahubwo nibongere umubare w’ ibyumba n’ umushahara wa mwarimu wongerwe, uhuzwe n’ ibbiciro biri Ku isoko. Mwarimu akore akazi yishimye afashwe neza kimwe n’ abandi bakozi ba Leta.

  16. Erega nuko bashakira ikibazo aho kitari , urebye mbona bagarura uko byahoze ishuri rikagira umwarimu uryitaho kdi akaba ari nawe urimenya kuri buri kimwe Wenda guhinduranya abarimu bikaba muri secondary nkuko byari bimeze ngewe mbona byarapfiriye ahantu hatatu
    1. Umunyeshuli yahawe ubwigenge burenze ubwamwarimu bigatuma rero yikora ibyo ashaka kuko ntavugwa . Mwarimu navuga ndamurega afugwe
    2. Muri kwakwamburwa uburenganzira kubana kwa mwarimu byatumye nabo baba tereriyo ntakumenya ngo umwana yize cg ntiyize , aze cg abireke mbega ntibindeba.
    3. System barikwigamo yorohereza abanyeahuri cyane kumva bari free mbega niba umwana atakijyana amakayi kwishuli yazakora etude ate? Nonese niba umwana aziko yakwiga atakwiga ntazasibira umwete wavahe? Ibyo rero bituma biga ntacyo bikanga kuko ntakibazitira mbega navugako challenges zose abize cyera babaga bafite ubu zakuweho bigatuma rero baryoshya cyane kurusha kwita ku masomo

  17. Nibyo abana bato iriya system ya professorat yabagoraga cyane ariko batekereze cyane no kwongerera mwalimu umushahara kuko hari abakora akazi karenze ako akora kandi bakagakora neza kubera ko bahembwa umushahara ujyanye n’igihe.Njye mbona umushahara wa mwalimu ukiri muto ariwo ukwiye gutekerezwaho mbere y’ibindi byose

  18. Ariko njyewe ndabona muri mo mubiganisha heza gusa kwita k’umwana gusa ninkokumera nk’umukozi wo murugo wasigiwe umwana naba shebuja ntibamusigire ibyo aza kurya saa sita.
    Buriya mwalimu nacyemurirwe ikibazo cy’umushahara yumveko uwo bafite niveau imwe banganya imibereho bajye ku isoko kuburyo bungana ibindi babimubaze
    Nanone leta ifite inshingano zo kubaka amashuri dore ko dutanga imisoro neza kuko ntaho wacikira Ngali baganye ubucucike maze murebeko tutaba Singapore.
    Naho abavuga ngo bakore recruitment muri TTC erega ibuka ko nabo bigishwa na barimu twe turabafite muri primary ariko hari uza kundeba ngo jya kunyigishiriza iri somo ntabyo nzi ntiyize TTC se ikibazo kiri ahantu habiri bareke kujya badushyeshyenga ngo baduhaye Sacco. Ruzingiye aho navuze haruguru.

  19. Hakenewe ko hasuburaho Normale primaire Mwarimu yige amasomo menshi. Ikindi Kandi hatekerezwe ukuntu staff y’ ISHURI yakongererwa umushahara kuko usanga bakora amasaha y’ ikirenga Kandi hari n’ avantage batemererwa nko gukosora Kandi usanga bahembwa angana n’ abarezi bagenzi babo uretse Head teacher gusa. Ese muri education inzego ntizubahirizwa mumihembere? Murakoze.

  20. Ni byiza rwose icyitwa professorat nikibeho burundu muri primary. Mwarimu afatwe neza ashakirwe n’ibisabwa byose. Maze urebe ko ireme ritaraba ireme koko.

  21. Centralised decisions whether good or not do not actually benefit alot. More teachers for a single class may lead to confusion, hence unproductive. Just establish a system of reward instantly to teachers according to their achievements,then quality education will be achieved.

  22. Ariko n’ubundi abana bacu bari bararenganye!Ibyo bita modeling na imitating babibona hehe rwose?Ubu rero abarimu niho bagiye kuba ba ndatanga urugero.

  23. iki bavuze cyo kongera ibyumba hagamijwe kugabanya ubucucike ni sawa cyane rwose abana benshi mu cyumba kimwe Bose ntibiga neza

  24. ko numva ishuri rigiye kuba isoko ry’abarimu se ubwo ireme ry’uburezi rizaboneka rite? uzafata umusirikare n’imbunda ngo nazenguruke ibigo by’amashuri ashaka ireme ry’uburezi nkaho arimo gushaka umwanzi? ikibazo gihari nibafate mwalimu neza abone umushahara ujyanye n’igihe kandi bashake abarimu babyigiye ubundi bizakemuka. ariko reka mbibarize, ufashe umukozi umuhembye 1200000 ku kwezi mu gihe mwalimu ayafatamo inguzanyo akazayishyura mu mezi 60 ubwo warangiza ngo urashaka ireme ry’uburezi? ryava he?

  25. Njye ndabona ibi ntaho bitaniye nibiriho.none c ubundi ishuli ntirigira uryitaho n,abandi basimburana? Cyeretse niba abazamufasha bazajya bigisha yicayemo kugirango bigaragare ko ariwe uryitaho.

  26. Ikindi kdi muzarebe ibitabo muterurira abana mwite no Ku ngano yabo,muzasanga rwose into nabyo bigira ingaruka kwireme ry,uburezi.

  27. Nibyiza ko mukiciro cyambere cy’amashuri abanza habamo umwarimu umwe ushinzwe ishuri nabandi bamwunganira bagera kuri babiri kuko bizanongera itangwa ry’akazi mumashuri abanza

  28. Iki gitekerezo ni kiza , kizazamura ireme ryuburezi, ariko hagurwe namashuri mwarimu ageyigisha abo afitiye ubushobozi, Kandi na motivation ya mwarimu ikwiye kwitabwaho, nko kumuhemba umushahara ujyanye naho isi igeze( ibiciro kumasoko)

  29. Ni byiza cyane kongera abarimu mu mashuri atatu abanza hongerwa n’ibyumba by’amashuri ariko hatirengagijwe kongera umushahara wa Mwarimu.

  30. Ibi nange ndabyemera pe.Kuko guhinduraho abarimu ni ugucangacanga abana ariko hakenewe ko mwarimu nawe ahembwa umushahara ungana n’abo banganya amashuri kuko usanga ku isoko yibura.

  31. Nkuko benshi bakomeje kubikomozaho, ndashimira cya Minister watangiye kubona ko hari ibibazo mu burezi akanabona bimwe ibyo ari byo. Gusa icyo nabivugaho ni uko umwarimu ufite abazajya bamufasha ntaho bizaba bitandukaniye na professorat yari iriho. Ikindi ari nacyo nyamukuru: Nibahembe mwarimu rwose. Bazitekerezeho ayo bakoresha ku kwezi bagura amazi yo ku ywa gusa maze batekereze ibintu nkenerwa by’ibanze byafasha umuntu ngo abashe kubaho anabesheho abandi. Murakoze!9.

  32. Ikibazo nyamukuru numushahara muto wa mwarimu nigute wahemba umuntu 40000 akayaryamo agakodesha agategamo,akaguramo umwenda ,warangiza ngo ireme mukemure ikibazo cyumushahara nibyumba ibyo byonyine bizarizamura

    Ikindi kuki ibitekerezo bizamura ireme bidaturuka kubirirwa kuri terrain ? naho kuvugango abarimu babiri mucyumba njye mbona ntacyo bizakemura ,nibyo byabindi bidatanga umusaruro Audit yaza ngo hakozwe inyigo nabi , ubundi murinde mwarimu inzara murebe ko ireme ritabonekà murakoze

  33. nibyiza bwana Dr Mutimura byaribikwiriye ko abana nkabariya bagira umwarimu umwe kuko cyn birabafasha kd Baja name I yum camp bityo tukaba tubasaba amahugurwa menshi kubarezi bigisha icyiciro cya1 cyamashuri abanza!

  34. Bivuzeko mu ishuri rimwe mu kiciro cya mbere hazakora abarimu babiri. Twizereko abandi barimu bagiye kuva mu bushomeri. Ikindi kandi nge ndumva iyi gahunda itareba amashuri abarizwamo abana bake nka 15 mu cyumba k’ishuri.

  35. Yewe ga !ibibazo ni 3 ubucukike ndetse n’ibikoresho (intebe…),kuba mwalimu ari urugero rw’ umuntu uciririritse Hashingiwe ku mibereho ye , burya mu bice by’ibyaro harimo ibibazo by’umyumvire y’ababyeyi aho abana batiga uko bikwiye ugasanga yiga rimwe mu cyumweru ndetse na promotion automatique aho siporo no gushushanya ndetse n’imirimo y’amaboko bihagije ngo umwana yimuke

  36. yebaba weeeeee !Mwikwikirigita ngo museke.cash zivana mu myenda ya hato na hato ku barezi then after igitsure gishingiye ku ivugururwa ry’amategeko yongerere ba HTs ububasha n’ ubushobozi kubo birirwana mu kazi! Kuvanaho akajagari hagashyirwaho gahunda ihamye mu burezi .

  37. Guhemba mwarimu nibyo, kugabanya ubucucike nabyo Ni ingenzi, ariko ibyo byossseeee, hatabayeho gushakira hamwe ibihano bikwiye umwana ngo ahe agaciro mwarimu, maze hateganywe no kudapfa kwimura umwana. Ibyo byose byazaba ubusa. Ireme ry’uburezi riri mu mutwe wa mwarimu. Akiri muri ubu buzima ahakekwa umuti ntaho.

  38. Mwarimu mumufate neza aryoherwe n’akazi akora nko muri WDA usanga umwarimu ufite A2 akora muri IPRC ahembwa hejuru ya 180000frws ukora Muri Secondary TVET ari A0 ntarenza 148000 frws na Horizontal,Vertical promotion Muri W DA ntizibamo .ubundi imishahara ishyirwaho hagendewe kuki? Aho dukora? niveau d’Etude dufite?

  39. Bjr! Ibi minister yavuze ni kimwe mu miti yavugutirwa ireme ry’Uburezi ariko kandi hakwiye no gusuzumwa ubushobozi aba barezi bafite kuko harimo benshi badashoboye kwigisha: benshi ngo bakoze candidat lible kuko bari babuze abandi bajya abandi na bo bagiye biga TTC kuko babuze Amanota abajyana mu yandi ma options. Abo se ubwo tubategeho ireme ry’Uburezi na bo bad afire?
    Umushahara na wo ni uwo gutekerezwaho kuko ni ba umwana wa Mwarimu adashobora kwiga uko bikwiye kwigisha ab’abandi bizamubera ihurizo.

  40. Erega bavandimwe tujye tubwizanya ukuri ireme ry’uburezi riri mumutwe wa mwalimu.Niba se mwalimu adatuje mu mibereho azigisha neza ate?Uretse na mwalimu se ninde wundi wakorana umurimo uwo ariwo wose ibibazo akabona umusaruro ukenewe?Nonese washakira amata meza kunka yagaburiwe nabi ntinahage?Mwarimu akeneye kwitabwaho maze agatanga umusaruro wose asabwa

  41. Iyi gahunda ni nziza kuko niyo natwe twigagamo kera twigishwa na mwarimu 1 gusa nibongere na salaire iracyari hasi cyane

  42. Reka,natwe turusheho kunoza akazi kacu kuko twize uburezi tubukunze,umushahara sicyo kibazo,Kandi siwo watanga igisubizo mukunoza ireme ry’uburezi.Murebe abanditse bose urasanga imyandikire yabo idahwitse,Uyu mugani muwusesengure:Pour Donner long comme un doigt,on doit posseder long comme un bras!

  43. Muraho?
    Ikibazo cy’ ireme ry’ Uburezi mu Rwanda kirakomeye cyane.
    Kubera ibyo rero, mbere yo kugifatira ibyemezo hari hakwiye kubanza kubikoraho ibiganiro hamwe nabo boreba bose: ababyeyi, abarezi,abahanga mu bumenyi bw’ imyigishirize. Ndetse n’ abanyeshuri ubwabo
    Ku birebana n’ iki cyemezo cyo kugira abarimu batatu mw’ ishuri rimwe ndabona ahubwo bishobora gutera ibibazo: ” akavuyo” mw’ ishuli, ubunebwe no gusiba kw’ abalimu bamwe na bamwe…kurangara…
    Ahubwo iryo shuri nirigabanywemo gatatu buri mwalimu agire abanyeshuri be.
    Murakoze

  44. Ese umwarimu utariye niyo baba barindwi mu ishuri mukeka ko uretse akavuyo mu ishuri Hari ikindi byatanga??
    Mugabanye abana mucyumba kdi muhembe abarimu akwiriye muve mubyo muri kwishuka ngo ireme!!!
    Se minister we avuga iki ku bihumbi 45 mwarimu ahembwa n’isoko riri hanze aha????

  45. Niba bashaka ireme ry’uburezi, ubuyobozi bukwiye kwita kuri ibi bikurikira:
    1. kuvanaho promotion automatique, bizatuma abana biga bafite ubushake,
    2. systeme educatif ikwiye kuba stable, kuko guhindagurika buri kanya bituma ubumenyi butangwa butagira ireme,
    3. Mwarimu akwiye guhabwa agaciro mu muryango nyarwanda yongererwa ubushobozi mu mibereho ye,
    4. professorat mu mashuri abanza ntikwiye kuko abana ntibabasha kuyikurikira neza
    5. ubucucike mu mashuri bwatumye abarimu badashobora gukurikirana uko bikwiye abo barera.
    Ni uko mbyumva.

  46. Nimuhembe mwarimu amafaranga aringaniye nawe yibone kubiciro biri Ku isoko, ni mwubake amashuri mugabanye ubucucike bwabana mushyire wamwarimu umwe uhoraho udafite umusimbura muri p1,2&3 murebeko bitagenda neza. Naho nimwongera ubucucike bwabarimu batari motive nabana, byose bizaba isupu.

  47. Ni byiza cyane mu kuzamura ireme, ariko hakenewe na supervision ihoraho kuko harigihe bishobora no gukorwa nabi aho abo barezi baba babonye umwanya wo kwirirwa biganirira ibyabo aho kwita ku bana. ndabivugira uko byajyaga bigenda aho nyuma ya recreation abarimu kugaruka mu mashuri byashoboraga bake abandi bibereye mu biganiro hanze bagasigaho uwandika abasakuza bakagaruka badutsibura inkoni tugataha utubuno twatose nkuko byavugwaga.

  48. Nongere ntange uyu musanzu,nubwo bisa n’ibyavuzwe:Dore icyibanze cyo gukora vugurura double shift kuko aricyo kizavanaho ubucucike bwabana n’abarimu bakabona igihe cyo guhumeka kugira ngo bashobore gutegura neza ibidanago.Cyokora birasaba kongera umubare w’abarimu.Ibyumba byo byabonekera muri double shift ivuguruye bivuga abiga mbere ya saa sita bagatahana na mwarimu wabo,nawe akajya gutegurira murugo ibyejo,abanyuma ya saa sita nabo bakazana na mwarimu wabo.Ya mafaranga mwavuze agashirwa muri recruitment yabarimu benshi no kongera salary,uwa nyuma agahembwa90000(kandi birashoboka hirinzwe kongera menshi bake bagejeje muri 200000 nka ba Dir…),wenda no mu kunononsora amahugurwa (nko gufatira kuburyo USAID Soma umenye yateguraga ayayo wabonaga ko yabikoranye ubwitonzi n’ubuhanga)Kandi banyakubahwa bayobozi,murizi mpinduka mwagombye kujya mubanza mwifashisha inararibonye ziri “in action”,” kuri terrain”mbere yo gushakisha aba consultants mushingiye ku mpamya bumenyi zabo gusa uko zaba zihanitse kose.Nanjye ubwanjye hano kuri terrain,hari contribution natanga hagize uyinsaba kuko nakoze muri system nyinshi harimo n’iriya double shift ivuguruye na propozaga haruguru.

  49. Banyakubahwa mugerageje kunoza single shift, mukongera ibikoresho bikenerwa nimfashanyigisho, mukanongeza mwalimu, mukagabanya nubucucike mumashuri byakemuka. Ireme ryuburezi ryaboneka.

    Nkubu ibizamini biri kwandikwa kukibaho muma primaire bakanasibira kubana batararangiza. Murumva ireme ryavahe nikizami kitakozwe neza?

  50. Ibi bitekerezo byatanzwe garuguru ni byiza,gusa icyo nongera nuko byose ari ubusa mwalimu nadahabwa agaciro akwiye binyuze mu kumwongerera umushahara hanyuma hakongerwa ibyimba by’amashuri. Hakiyongeraho ko P1,2 na3 bakagira koko umwarimu 1 waho udahinduka. Mugire amahoro.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.