17°C , Mostly cloudy | Kigali-Rwanda
Bugingo Irene, Umushakashatsi mu Kigo cy’Ubushakashatsi n’Ubusabane Bigamije Amahoro IRDP ( Ifoto Mukagahizi R.)

IRDP: Gusaba imbabazi no kuzitanga bivuye ku mutima bizubaka u Rwanda

Yanditswe na Mukagahizi Rose

Ku ya 12-02-2019 saa 15:03:20

Bugingo Irene, umushakashatsi mu Kigo cy’Ubushakashatsi n’Ubusabane Bigamije Amahoro IRDP, asanga gusaba imbabazi bivuye ku mutima bizagira uruhare mu kubaka u Rwanda rwiza.

Mu kiganiro n’Imvaho Nshya, Bugingo yavuze ko mu bushakashatsi bakoze basanze urubyiruko rugenda rutera intambwe zihuta kurusha abakuze mu rugendo rw’ubumwe n’ubwiyunge.

Gusa abakuze na bo babasha kubigeraho vuba igihe bimitse indangagaciro yo kuvugisha ukuri no gusaba imbabazi, nk’uko Bugingo yakomeje abisobanura.

Yagize ati “Hari ibiganiro byagiye bikorwa mu gihugu mu rwego rw’umushinga ugamije guteza imbere ibiganiro hagati y’Abanyarwanda kugira ngo abantu bamenye ibibazo barimo, tubyita gusana imitima y’Abanyarwanda duteza imbere imibanire myiza hagati y’imiryango, ibyo bikaza bikurikira ingaruka za Jenoside yakorewe Abatutsi mu 1994 n’impamvu twebwe twese Abanyarwanda tugomba gufatanya mu kubaka umuryango nyarwanda.”

Avuga ko uburyo babikora bahitamo uburyo bw’ibiganiro n’ubushakashatsi mu gihugu, aho bafasha Abanyarwanda kureba imibanire yabo, imbogamizi zituma imibanire itaba myiza 100% zikaganirwaho.

Bugingo asanga imbabazi ari ikintu k’ingenzi cyane kuko ari zo zizatuma igipimo cy’ubumwe n’ubwiyunge kigerwaho 100% kikava kuri 92,5% kigezeho ubu.

Yagize ati “Bamwe mu banyarwanda hari ihungabana bagize bitewe n’isano bafitanye na Jenoside yakorewe Abatutsi mu 1994. Ni yo mpamvu hirya no hino mu gihugu tuhagira amatsinda y’ibiganiro aganira kuri ibi bibazo. Gacaca yaje igira ngo tumenye amakuru, abantu bamenye ibyabaye, nibamara kubimenya ni intambwe ya mbere yo kugira ngo ube wakwiyunga, wamara kumenya amakuru ugasaba imbabazi cyangwa ugasabwa imbabazi zaba ari imbabazi zivuye ku mutima ukazitanga kuko iyo uzitanze ubwiyunge bubaho.”

Bugingo Irene, Umushakashatsi mu Kigo cy’Ubushakashatsi n’Ubusabane Bigamije Amahoro IRDP ( Ifoto Mukagahizi R.)

Avuga ko kugira umutima ukeye ari uwasabye imbabazi ari n’uwasabwe imbabazi bivuye ku mutima umutima we uruhuka hakabaho kwiyunga, ni ukuvuga ngo baharanira kureba imbere no gutuma ibyabaye bitazongera.

Ashimangira ko kuri ubu nyuma ya Jenoside yakorewe Abatutsi mu 1994 Abanyarwanda babanye neza kandi bagendana baharanira kwiyubakira igihugu.

Bugingo avuga ko basanze kuri ubu uwakoreye undi icyaha babasha gukorana bizinesi, kwicarana mu ishuri umwe agatiza undi amakayi, akaba yanamusobanurira ibyo atumvise, babasha gukorana mu kazi bakigishanya, gukora ubuzima bwose bafatanyije bareba imbere, ibyabaye mbere bitakiri intambamyi y’ibyo bakora.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, Ndayisaba Fidele, na we ashimangira ko urugendo rw’ubumwe n’ubwiyunge mu gihugu rugeze ku ntambwe ishimishije nyuma yo gufunguka imitima hakabaho imbabazi.

Avuga ko kuba abantu batarabona aho abantu babo bashyinguye biri mu bibangamira ubumwe n’ubwiyunge kandi hari ababizi bakicecekera, hari abavuzwe muri Gacaca ntibavuge kubera ubwoba, ubugome cyangwa kwanga kwiteranya.

Ndayisaba asaba Abanyarwanda kwitandukanya na Jenoside n’ingengabitekerezo yayo, bakayoboka gusaba imbabazi n’abazisabwa na bo bakagira ubushake bwo kuzitanga bafite umutima ukeye kuko ari byo bizabageza mu bwiyunge burambye.

TANGA IGITEKEREZO

Leave a Reply

Your email address will not be published. Required fields are marked *