17°C , Partly cloudy | Kigali-Rwanda

Irani yanze kohereza mu mahanga agasanduku k’umukara k’indege yahanuye  

Yanditswe na Kayira Etienne

Ku ya 23-01-2020 saa 15:00:37
Aka ni ko gasanduku k'umukara Leta ya Téhéran yerekana ko ari ak'indege ya Ukraine Boeing 737-88 yahanuwe na Irani (Foto Reuters)

Ikibazo k’indege ya Ukraine yo mu bwoko bwa Boeing yahanuwe na misire 2 zo muri Irani gikomeje kugaruka mu itangazamakuru, nyuma y’ibyumweru bibiri iyo mpanuka ibaye. Ibihugu bikomeye byari bimaze iminsi mike bisabye Irani kohereza agasanduku k’umukara ariko Abayobozi ba Téhéran batsembye ko batakohereza mu mahanga.

Nta bwo byoroshye nk’uko bitangazwa na Radio Mpuzamahanga y’u Bufaransa RFI, Irani gufata agasanduku k’umukara bakunze kwita « boîte noire » mu rurimi rw’igifaransa, agasanduku kabitse amakuru yose y’uko ikibazo cyagenze ngo ikohereze mu bihugu by’amahanga kandi izi neza ko karara kageze ku mwanzi wayo, ari yo Leta Zunze Ubumwe z’Amerika (USA).

Umunyamakuru ukorera RFI i Téhéran, Siavosh Ghazi, atangaza ko nyuma y’ibyumweru bibiri bishize indege ya Ukraine ikoreye impanuka ku butaka bwa Irani hagapfamo abagenzi 176, Abayobozi ba Leta ya Téhéran ngo bemeje ko yahanuwe n’ibisasu 2 byo mu bwoko bwa misire.

N’ubundi iki gihugu gikomeje kuvuga ko ibyabaye ngo ari impanuka kubera ko guhanura iyo ndege yo mu bwoko bwa Boeing ya Leta ya Kiev batabikoze babigambiriye.

Muri raporo y’ibanze yakozwe n’Ikigo cya Irani k’indege za gisivire, yemeje ko iyo mpanuka yatewe n’ibisasu 2 bya misire byarashe iyo ndege bituma ihanuka bityo irashya n’abantu bose yari itwaye barapfa ntihagira n’umwe urukoka.

Raporo igira iti « Iperereza ku buryo izo misire zarashwe rirakomeje. Naho ku bijyanye n’ubusabe bw’ibihugu by’amahanga byumva Irani yakohereza agasanduku k’umukara ngo kage gusuzumirwa ahandi,  Abayobozi ba Irani nabo basabye u Bufaransa na Leta Zunze Ubumwe z’Amerika ko bakohereza ibikoresho ako kazi kagakorerwa aho impanuka yabereye  ariko no kugeza uyu munsi nta byo bohereje .»

Canada na Ukraine ni bo basabye bwa mbere ko ako gasanduku kakoherezwa gusuzumirwa ahandi hatari muri Irani.

RFI iti « Iyo raporo ya Leta ya Téhéran imenyesha ko kuva ibihugu by’u Bufaransa na Amerika byanze kohereza ibikoresho byasabwe, Guverinoma ya Irani yemeje ko igiye kubigura bidatinze kugira ngo bagere ku makuru yizewe abitse mu gasanduku k’umukara k’indege ya Ukraine yarashwe na misire za Irani. »

Iyi nkuru y’uko Irani igiye kwishakamo ibisubizo byo kwigurira ibikoresho bizatuma amakuru ari mu gasanduku k’umukara « boîtes noires », amenyekana igaragaza ko Abayobozi b’iki gihugu banze burundu ibyo kohereza ako gasanduku k’umukara mu mahanga nkuko byasabwe na Ukraine na Canada.

Bitandukanye n’ibyo umwe mu bayobozi b’indege za gisivire za Irani yatangaje mu minsi mike itambutse ko bagiye kuzohereza ako gasanduku mu Bufaransa cyangwa muri Ukraine. Radio Mpuzamahanga y’u Bufaransa (RFI), isoza iyi nkuru itangaza ko byumvikana ko Abayobozi bakuru ba Guverinoma ya « Téhéran » bisubiyeho mu byo bari bemeye mbere.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.