24°C , Partly cloudy | Kigali-Rwanda

Iran yagabye igitero ku birindiro by’ingabo z’Amerika muri Iraq

Yanditswe na Imvaho Nshya

Ku ya 08-01-2020 saa 04:36:04
Ikarita ya Iran na Iraq, igaragaza uduce twagabwemo ibitero na Iran kuri uyu wa Gatatu

Ibisasu bisaga 10 byo mu bwoko bwa ‘rockets’ byoherejwe na Iran ku birindiro bibiri by’ingabo z’Abanyamerika ziri muri Iraq, mu rwego rwo guhorera Jenerali Qassem Soleiman wa Iran wishwe n’ingabo z’Abanyamerika zirwanira mu kirere mu cyumweru gishize.

Minisiteri y’Ingabo y’Amerika yemeje ko ibyo bisasu byatewe ku birindiro bya Ain al-Asad  mu Ntara ya Anbar n’ibya Erbil , mu gitondo cyo kuri uyu wa Gatatu.

Iki gitero cyatumye Philippines itegeka ko abaturage bayo bari muri Iraq bacyurwa, nk’uko byemejwe na Minisiteri y’Ububanyi n’Amahanga ya Philippines.

Aljazeera dukesha iyi nkuru iravuga ko umuyobozi wo muri Leta y’Amerika yavuze ko igitero cya Iran ku ngabo z’Amerika niba hari n’abo cyakomerekeje ari bake.

Minisitiri w’Itumanaho muri Iran yavuze ko Mohammad-Javad Azari Jahromi yanditse kuri Twitter ko iki gitero ari icyo kwihorera, asaba Abanyamerika kuva mu Burasirazuba bwo Hagati.

Hagati aho Ikigo cy’Amerika gishinzwe Indege (FAA) cyatangaje ko indege z’Amerika zitongera kunyura mu kirere cya Iraq, Iran, Ikigobe cya Oman no hejuru y’amazi ari hagati ya Iran na Saudi Arabia nyuma y’aho Iran igabye igitero muri Iraq ku ngabo z’Abanyamerika.

Igitero cy’Ingabo z’Amerika cyahitanye Jeneral Soleimani wa Iran, cyagabwe ku mategeko ya Perezida wa Leta zunze Ubumwe z’Amerika, Donald Trump, ubwe, atabimenyesheje Inteko Ishinga Amategeko.

Itegeko Nshinga ry’Amerika rigabanyamo kabiri ububasha bwo guha igisirikari amabwiriza, igice kimwe kiri mu maboko ya Congress (Inteko Ishinga Amategeko), ikindi kikaba mu maboko ya Perezida.

Congress ifite ububasha bwo gutangaza urugamba (declare war) mu gihe Perezida nk’Umugaba w’Ikirenga w’Ingabo, afite ububasha bwo gukoresha igisirikari mu kurengera Amerika.

Mu bihe bitandukanye abaperezida b’Amerika na Congress bagiye batumvikana niba Perezida yemerewe kohereza ingabo mu mirwano mu mahanga atabigiyeho inama na Congress.

Hagati aho Iran iravuga ko yatangije ibikorwa byo kugaba igitero cya kabiri ku ngabo z’Abanyamerika ziri muri Iraq, nyuma y’aho igitero cya mbere ntawe cyahitanye.

Madamu Nancy Pelosi uyobora Congress, yanditse kuri Twitter ko arimo gukurikira ibibera muri Iraq, avuga ko ibikorwa by’ubushotoranyi budafite impamvu bikwiye guhagarara kuko yaba Amerika yaba Isi ntacyo byakungukira mu ntambara.

Abadepite b’aba Democrats banenze cyane icyemezo cya Perezida Trump cyo kwica Jenerali Soleimani atabiganiriyeho n’Inteko Ishinga Amategeko.

Biteganyijwe ko mu Cyumweru gitaha Abademocrats bazatora umwanzuro (resolution) wo kugabanya ububasha bwa Trump mu bikorwa byo muri Iran.

Twabamenyesha kandi ko Iran yabwiye ibihugu byo mu karere iherereyemo k’Uburasirazuba bwo Hagati birimo Israel ko izabigabaho ibitero na byo nibiramuka bikoreshejwe n’Amerika mu bitero igaba kuri Iran.

Umwanditsi:

Imvaho Nshya

2 Comments on “Iran yagabye igitero ku birindiro by’ingabo z’Amerika muri Iraq”

  1. ntanyungu yi nambara ariko ntanicyubahiro cyayo America nive mubigobe jya pelise itahe amahoro azaboneka kwisi.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.