19°C , Mostly cloudy | Kigali-Rwanda
Murekezi Anastase, Umuvunyi Mukuru asobanura itegeko rishya ryongerera ububasha uru rwego rwo gusubirishamo amadosiye agaragaramo ruswa

Iperereza ry’Umuvunyi kuri ruswa ntirishobora kubangikana n’irya RIB

Yanditswe na MUGISHA BENIGNE

Ku ya 10-10-2018 saa 14:08:24

Umuvunyi Mukuru, Anastase Murekezi, avuga ko urwego ayoboye n’Urwego rw’Igihugu rw’Ubugenzacyaha (RIB) badashobora gukora iperereza kuri dosiye imwe ya ruswa.

Murekezi avuga ko iyo Urwego rw’Umuvunyi rutangiye gukora iperereza, rumenyesha RIB, na RIB yaba itangiye iperereza ikamenyesha Umuvunyi kugira ngo hatabaho kuvangirana.

Ati “Itegeko riha Urwego rw’Umuvunyi kugenza ibyaha bya ruswa, kimwe na RIB, iyo ari twe dutangiye kugenza iyo dosiye, RIB irayireka, iyo ari RIB iyitangiye na twe ntituba tukiyikurikiranye, ni yo ikomeza.”

Yabitangarije mu kiganiro yagiranye n’abanyamakuru kuri uyu wa Gatatu, aho yabasobanuriraga ibikubiye mu itegeko rishya nomero 54/2018 ryo ku wa 13/08/2018 ryerekeye kurwanya ruswa ryasohotse mu igazeti ya Leta mu nomero idasanzwe (Nomero special) yo ku wa 20/09/2018.

Yavuze ko iryo tegeko ryitezweho kugira uruhare runini mu rugamba rwo kurwanya ruswa, abakekwaho ibyo byaha bagahanwa ku buryo bubera abandi urugero.

Yavuze kandi ko iri tegeko rizajya rihana abigwizaho imitungo bitemewe n’amategeko kimwe no gusubiramo imanza zaregewe Urwego rw’Umuvunyi, zasuzumwa rugasanga koko hagaragaramo akarengane.

Yagize ati “Hari imanza Urwego rw’Umuvunyi rwemererwa n’iri tegeko gukurikirana nk’ubujurire bw’imanza zagaragaye ko zaciwe nabi, abigwizaho imitungo bitemewe n’amategeko ndetse n’abakekwaho kunyereza umutungo wa Leta.”

Mu bibazo byabajijwe n’abanyamakuru harimo ibijyanye n’abayobozi bitaba Komisiyo y’Inteko Ishinga Amategeko ishinzwe kugenzura no gukurikirana umutungo wa Leta (PAC), rimwe na rimwe abakekwaho ibyaha bagafatwa bagafungwa bugacya barekuwe.

Aha Umuvunyi Mukuru yavuze ko abitaba PAC bashobora kwisobanura neza Abadepite bakanyurwa kimwe n’uko bashobora gukekwaho ibyaha, bityo bakaba bakurikiranwa bakabibazwa.

Murekezi Anastase, Umuvunyi Mukuru asobanura itegeko rishya ryongerera ububasha uru rwego rwo gusubirishamo amadosiye agaragaramo ruswa

 

Yongeho ko bashobora kubibazwa ariko ibimenyetso by’ibyaha baketsweho ntibigaragare, bityo bakarekurwa.

Yagarutse ku bafungurwa by’agateganyo kugira ngo bage baburana bari hanze, ariko bikarangira batorotse ubutabera, ari na zo mpungenge za benshi, akaba asanga umucamanza akwiye kujya ashishoza mu gufata ikemezo ku ifunga n’ifungurwa ry’abakekwaho ibyaha bya ruswa.

Ku bijyanye n’igihe ntarengwa utishimiye ibyavuye mu rubanza azajya ageza dosiye y’ubujurire bwe ku Muvunyi, Murekezi yavuze ko itegeko rivuga ko umwe mu baburanyi utishimiye imikirize y’urubanza, azajya abanza kwandikira perezida w’urukiko rwamuburanishije agaragaza ko atishimiye imikirize y’urubanza kuko yagaragayemo akarengane mu gihe cy’ukwezi kumwe, nyuma yo gusubizwa na bwo ntabyishimire itegeko rivuga ko yemerewe kwandikira umuvunyi bitarenze ukwezi kumwe agaragaza ko atishimiye imikirize y’urubanza yaburanye mu rukiko.

Bamwe mu baturage bari bazanye dosiye zabo ku Rwego rw’Umuvunyi batangarije Imvaho Nshya ko hari imbogamizi ziterwa na ruswa ku wayakiriye n’uwayitanze, bakaba basanga ikwiye gucika.

Rwagasore Augustin, ni umuturage wo mu Karere ka Gasabo, Umurenge wa Gisozi, avuga ko sosiyete igaragaramo ruswa idashobora gutera imbere kuko ruswa ahanini igendana n’akarengane.

Yavuze ko ruswa imunga ubukungu bw’igihugu, igatuma icyo umuntu afitiye uburenganzira atakibona mu burenganzira asanganywe ahubwo akakibona ari uko agize icyo atanga.

Ati “Buriya ruswa ni mbi cyane, icya mbere ituma umuntu atabona uburenganzira yemererwa n’amategeko, ikindi ni uko ituma ukuri kudakurikizwa ndetse igatuma bamwe baharenganira.”

Umuvunyi Mukuru, Murekezi yasoje agaragaza ko imirimo uru rwego rushinzwe igenda yiyongera, abakozi 78 basanzwe bakaba bazongerwaho abandi 10 kugira ngo imirimo n’inshingano by’Urwego rw’Umuvunyi bigende neza.

TANGA IGITEKEREZO

Leave a Reply

Your email address will not be published. Required fields are marked *