19°C , Mostly cloudy | Kigali-Rwanda
Karasira Venuste, umwe mu barokokeye i Nyanza ya Kicukiro atanga ubuhamya bw'ibyababayeho

Inzira y’inzitane itazibagirana ku barokotse Jenoside i Nyanza ya Kicukiro

Yanditswe na Nshimyumukiza Janvier Popote

Ku ya 15-04-2019 saa 10:10:28

Kuva kwa Karasira Venuste kugera kuri Eto-Kicukiro harimo metero 800 ariko kuhagera byamusabye gukora urugendo rw’isaha n’igice. Si uko yari akanyamasyo, ni uko inzira yari mbi.

Byasabaga kugenda areba hirya no hino ngo hato atisanga mu maboko y’abahigaga Abatutsi, hakiyongeraho n’imvura yagwaga ubudahagarara. Ni umunsi avuga ko atazibagirwa.

Ecole Technique Officielle (Eto-Kicukiro) yarimo Ingabo z’Ababiligi zaje mu Rwanda mu butumwa bw’amahoro bwa Loni (MINUAR).

“Tugeze muri Eto twahasanze abandi benshi ndetse bisuka rwose buri kanya, abenshi bakomeretse, twizera ko tuza kuhabona ubuhungiro ndetse bakanadufasha.”

Mu buhamya bwe, Karasira asobanura ko bahageze ku itariki ya 8 Mata 1994, ariko aba mbere bari bahageze umunsi umwe mbere yaho, ubwo Jenoside yatangiraga mu Mujyi wa Kigali.

Abo mu bice byegereye Eto bahahungiye ari uruvunganzoka, bamwe bajya mu mashuri, abandi mu buryamo bw’abanyeshuri (dortoires), abandi mu biro by’abayobozi, Karasira ahagera huzuye.

Yasabye ko umwana we wari urwaye ashakirwa umwanya mu ishuri imbere, baramwemerera, we n’abandi baje nyuma bagomba guhagarara hanze, hadatwikiriye, imvura ibanyagira.

Asobanura ariko ko imvura bumvaga ntacyo ibatwaye kinini kuko nibura bumvaga ko nta muntu waza kuhabicira hari ingabo za MINUAR. Ntibari bazi ko zitegura kubasiga zigasubira iwabo.

Bitoyemo komite y’abantu 5 ngo babashe kugeza ibyifuzo byabo kuri MINUAR, mu izina ry’abantu ibihumbi 4 byari byahahungiye. Karasira yagiriwe ikizere, ajya muri iyo komite.

Bakimenya ko Inkotanyi zafashe hakurya i Remera, iyo komite yasabye ko Inkotanyi zamenyeshwa ko bari muri Eto kuko bari bizeye ko ziza kuhabakura, ariko ntibyaba.

Karasira ati: “Wabonaga batangiye kugira ubwoba na bo (Ababiligi), tuyoberwa iyo buva, naje kumenya ko batewe ubwoba na bagenzi babo barindaga Agatha bishwe.”

Abaparakomando 10 b’Ababiligi barindaga Minisitiri w’Intebe Uwiringiyimana Agatha, biciwe muri Camp Kigali nyuma y’uko Agatha yicanwe n’umugabo we, ku ya 7 Mata 1994.

Nyuma y’imyaka itandatu, ni ukuvuga muri Mata 2000, Minisitiri w’Intebe w’u Bubiligi, Guy Maurice Marie Louise Verhofstadt, yasabye imbabazi ku kuba Abatutsi baratereranwe n’ingabo z’igihugu cye.

Yavuze ko Ingabo z’Ababiligi zabaga mu Rwanda zitakagombye gusiga abantu bazihungiyeho, avuga ko ari amakosa yakozwe ku ruhande rw’u Bubiligi n’umuryango mpuzamahanga muri rusange utaratabaye.

Ku ya 11 Mata 1994, abasirikare b’Ababiligi bari muri Eto batangiye kuzinga utwabo, abari babahungiyeho ubwoba burabataha. Bakihava, abasirikare n’Interahamwe bahise bahagera.

Karasira ati: “Twabonye abasirikare (b’Ababiligi) bitegura, bazinga ibikoresho byabo, tuti ko tureba mutegura kugenda byaba ari byo cyangwa si byo? Bati tugiye kugenda koko. Tuti kureka abantu bagiye gupfa mwaraje mu gikorwa nk’iki (cyo kugarura amahoro) mukaba mudutaye mugiye? Bati Abajandarume ba Leta barabarinda. Tuti ese baraturinda ari bo batwica?”

Nk’uko Karasira abihamya, bidatinze abasirikare ba Leta baraje, bafasha Ababiligi guhambira utwangushye, basohoka muri Eto bafata imodoka zibajyana ku kibuga k’indege barataha.

“Bamaze kugenda, abasirikare baraje barasa mu kirere amasasu menshi. Interahamwe babaye nk’aho bazibwiye ngo nimwinjire, twaguye mu kaga, biratuyobera, ibintu biradogera.”

Abatutsi bari bahungiye muri Eto basigaye badafite aho bapfunda imitwe, basohorwa muri icyo kigo babwirwa ko bajyanywe aho baza kurindirwa neza. Nta yandi mahitamo bari bafite.

Babashyize ku murongo, nk’uko bikubiye mu buhamya bwa Karasira, bagenda bakuramo uwo bashaka bakamwambura, bakamwica, bagenda babica urusorongo kugeza bageze i Nyanza.

Karasira Venuste, umwe mu barokokeye i Nyanza ya Kicukiro atanga ubuhamya bw’ibyababayeho

Nyanza, umusozi w’amateka y’urupfu rw’Abatutsi

Kanyabugoyi Speciose, umwe mu bajyanywe i Nyanza akaharokokera, avuga ko kuba Interahamwe zaragiye kubicira ku Musozi wa Nyanza atari ibintu byapfuye kubaho gutyo.

Ati:“Twaje kumenya ko mu 1963 i Nyanza bahiciye Abatutsi batagira ingano, ni umusozi w’amateka y’urupfu rw’Abatutsi.”

Bajyanwa i Nyanza, Kanyabugoyi avuga ko hari imodoka zari zabatanze imbere izindi ziri inyuma yabo ngo hatagira utoroka, ndetse n’abana bato bari bafite imbunda zibasumba.

Avuga ko yashavuzwaga no kubona “akana kangana urwara, kagufi inkota isumba” gakubita umugabo we urushyi, kamwambura ingofero kakamukuramo n’amataratara.

Umwari Agnes na we warokokeye i Nyanza, avuga ko bahageze nka saa kumi n’ebyiri n’igice, bwije, “banzura ko tutaharenga bakeka ko bwira cyane tukegera muri Nyabarongo tukabacika”.

Umusirikare umwe mu bari babayoboye ngo yaravuze ati: “Nta Bahutu barimo ngo tutikora mu nda? Urumva kubera ubwoba abenshi baravuze ngo ndi Umuhutu, ndi Umuhutu!”

Batangiye kubonamo abo bakekaho ubututsi bitewe n’ibimenyetso bakurikizaga bareba ubututsi, bararakaye, nk’uko Umwari abivuga, banzura kubica bose batavanguye.

Umusirikare umwe ngo yaravuze ati:“Ari abahutu baje baherekeje Abatutsi ni abagambanyi, ari n’Abatutsi ubwabo ni Inyenzi, mwese ni kimwe, bahise baturekuriramo amasasu. Bararashe nk’igice k’isaha kirarangira, abantu bose babandagara hasi kuko nta washoboraga gucika, bari batugose. Bamaze kurangiza iby’amasasu basubira mu modoka baragenda.”

Umwari avuga ko abasirikare bagiye bagasiga babwiye Interahamwe ngo zihorahoze abatapfuye neza. Ati:“Icyo bakoze, baratemye kugeza nka saa mbiri n’igice bakoresheje amatoroshi n’udutara.”

Mu ma saa mbiri z’igitondo cy’umunsi wakurikiyeho, Inkotanyi zanyuze hafi aho, zigeze ku gahanda kagana ku i Rebero zibwirwa ko hari abaryamye batarapfa, ziza kubareba.

Ngo zasabye abashoboye kugenda kuzikurikira, ariko nk’uko Umwari abivuga, abashoboraga kugenda ntibari bageze no kuri 50 mu bihumbi by’abantu byari bihari. Benshi bari bapfuye.

Inkotanyi zikihava, Interahamwe zari hafi aho zigiriye inama yo kugaruka gusaka amafaranga mu myambaro y’imirambo. Umwari wari waraye arashwe, baraje bamutema ubugira kabiri.

Ati:“Batangiye gusaka umuntu ku wundi, ngewe nari nakomeretse ku bw’amasasu ariko icyo gihe ni bwo baje bantema imihoro ibiri, umwe mu itako undi mu rubavu, ariko ibyo byose babaga bashaka amafaranga, bakuramo ‘amabijoux’ (imitako abagore n’abakobwa bambara) n’ibindi.”

Umwari asobanura ko byari ibihe bigoye. Ati: “Abana bato bonka amabere ya ba nyina bayatemye amaraso ava. Ku munsi wa kane, inyota yari nyinshi.”

Uwitwa Marigarita, umugore wari utuye hafi aho, ngo yazanye amazi arimo dedeti mu kajerekani, atangira kuyaha inkomere, ariko umusirikare wari hafi aho ababuza kuyanywa.

Umwari ati: “Harimo umusirikare wakomezaga asa n’uducunga, ariko wambaye imyenda ya gisirikare ya ex-FAR ariko uko yatwitagaho naravugaga nti uyu ni umukirisitu cyangwa ni Inkotanyi yabivanzemo, kuko yaratubujije ati amazi bongera kubaha ntimuyanywe araroze.”

Kuwa 15 Mata ni bwo urubyiruko rwarokotse i Nyamirambo na Cyivugiza na Mumena, ruyobowe n’abasirikare b’Inkotanyi, rwaje i Nyanza gutwara inkomere, bazijyana i Rebero.

Umwari ahamya ko Imana ari yo yakoreye mu Nkotanyi zamurokoye, ndetse zikamukurikirana, zikamuvuza ibikomere by’umubiri yatewe n’amasasu n’imihoro y’Interahamwe.

Yavanwe i Rebero ajyanwa muri CND ku Kimihurura, ahavanwa yoherezwa kuvurirwa muri Kenya.

Karasira Venuste, Kaberuka Aimable, Kanyabugoyi Speciose na Umwali Agnes ni bamwe mu barokotse Jenoside i Nyanza ya Kicukiro

Bamwe mu bitabiriye umuhango wo kwibuka ku nshuro ya 25 abazize Jenoside yakorewe Abatutsi ku Rwibutso rwa Nyanza ya Kicukiro, kuwa 11 Mata 2019.

TANGA IGITEKEREZO

Leave a Reply

Your email address will not be published. Required fields are marked *