19°C , Mostly cloudy | Kigali-Rwanda
Perezida w'Umutwe w'Abadepite Hon Mukabalisa Donatille uwa 4 uvuye iburyo n'abagize itsinda ry'Abanyanamibiya baje kwigira ku Rwanda kurwanya ubushomeri (Foto Gisubizo G)

Intumwa za Namibiya zashimye uko u Rwanda rufasha urubyiruko

Yanditswe na SEZIBERA ANSELME

Ku ya 12-06-2018 saa 08:28:56

Itsinda ry’Abagore 5 bahagarariye abandi mu bagize Inteko Ishinga Amategeko mu gihugu cya Namibiya bakoreye uruzinduko rw’iminsi 6 mu Rwanda bashima gahunda zinoze igihugu gifite zifasha urubyiruko.

Perezida w’Umutwe w’Abadepite Hon Mukabalisa Donatille uwa 4 uvuye iburyo n’abagize itsinda ry’Abanyanamibiya baje kwigira ku Rwanda kurwanya ubushomeri (Foto Gisubizo G)

Uru ruzinduko rugamije kwigira k’u Rwanda inzira rwanyuzemo n’uburyo rwakoresheje mu kurwanya ubushomeri by’umwihariko mu rubyiruko ndetse n’abagore.

Margaret Nkungano Mahoto uyoboye iryo tsinda ry’abavuye Namibiya, avuga ko baje mu Rwanda kureba uburyo barwigiraho uko inzego zinyuranye zagiye zitera imbere, uburyo bwo guhanga imirimo n’ibindi.

Agira ati Nta bwo ushobora kumva urubyiruko rwijujutira kutagira icyo rukora, rudafite umurimo kuko ureba hirya hino ukabona rufite icyo rukora bose twavuga ko bafite akazi, nta kindi bikomokaho uretse kuba igihugu gifite gahunda nziza zinoze kigenderaho kandi zifasha n’urubyiruko byongeye n’abagore bakabona akazi.

Mu gihugu cyacu urubyiruko rusoje amashuri rusuzugura imirimo rukanga gukora, ubutaka usanga budupfira ubusa, nta gahunda na politiki by’ubuhinzi zifatika wahabona, navuga ko urubyiruko n’abagore muri Namibiya babayeho mu bukene kuko usanga benshi bataka ubushomeri”.

Margaret avuga ko muri rusange urubyiruko rugera kuri 50% nta kazi rufite rubayeho mu bushomeri iwabo kandi hakaba hataragaragara uburyo bwo gukemura icyo kibazo.

 

Perezida w’Umutwe w’Abadepite, Hon. Mukabalisa Donatille, yavuze ko hari byinshi iryo tsinda rizigira ku Rwanda nk’uko babyifuje cyane cyane uburyo nk’igihugu cyashyizemo imbaraga kugira ngo kirwanye ubushomeri mu rubyiruko nka kimwe mu by’ibanze.

Hon. Mukabalisa agira ati Icya mbere ni uko hariho ubushake bwa politiki, icya kabiri hari uburyo bwashyizweho haba mu rwego rw’amategeko, haba mu rwego rw’ibigo bitandukanye biba byarashyizweho kugira ngo icyo kibazo abantu bakirebe kandi bakigire icyabo banabirebeye mu burezi.

Mu guhangana n’icyo kibazo mu Rwanda hanubatswe inzego kandi hagakurikiranwa uburyo zikorana kugira ngo zishyire imbaraga hamwe bityo icyo kibazo cy’ubushomeri mu rubyiruko, kirebana no kurwigisha, kuruhindura imyumvire bakumva ko basabwa kwigishwa guhanga imirimo kandi banatanga imirimo bakareka kumva ko biga bagamije kujya kuyisaba”.

Hon. Mukabalisa ashimangira ko hari ubumenyi izo ntumwa ziri buhabwe kuko mu gihe zifite mu Rwanda zizagenda zihura n’inzego zinyuranye.

Atangaza ko zizagira umwanya wo guhura na Minisiteri ifite urubyiruko mu nshingano, bakazahura na Minisiteri ifite umurimo mu nshingano, Ikigo k’igihugu gishinzwe guteza imbere imyuga n’ubumenyingiro (WDA), bakazanagira umwanya wo kuganira na komisiyo y’Inteko Ishinga Amategeko ishinzwe izo nshingano kugira ngo na bo bazabashe gukora ibyo bumva byabagirira akamaro mu gihugu cyabo.

Mu kurushaho kumenya icyo u Rwanda rwasanze rwakwigira ku gihugu cya Namibiya nyuma y’ibiganiro byabanje, Hon Mukabalisa yagize ati Kugeza ubu ibyo twabajije twumvise basa nk’aho bagifite intambwe ndende yo gutera ari nayo mpamvu baje kwigira ku gihugu cyacu kubera ko amakuru bafite ari ay’uko hari intambwe tumaze gutera igaragara kandi hari n’ubushake bwo gukomeza gutera izindi nyinshi kuko nubwo tuvuga ko hari izimaze guterwa hari byinshi dusabwa gukora ariko icya ngombwa ni ukugira ubwo bushake kandi tukanamenya ko hari ibyo tugisabwa gushyiraho nk’uburyo bushoboka kugira ngo tubashe kugera ku byo twifuza”.

Hon. Mukabalisa avuga ko mu guhanga akazi hashobora no kwifashishwa ubutaka igihugu gifite kuko bagaragarije Abanyanamibiya uburyo hashyizweho itegeko ry’ubutaka, bamenyeshwa icyo riteganya n’uburyo rigirira akamaro ababufite kugira ngo babe babutangaho ingwate babone amafaranga yabafasha gukora indi mirimo itari iy’ubuhinzi cyangwa n’ijyanye nabwo.

 

 

TANGA IGITEKEREZO

Leave a Reply

Be the First to Comment!

avatar