17°C , Partly cloudy | Kigali-Rwanda
Naggy Tibo utegerejwe mu Rwanda ejo ubwo azaba ari mu ruzinduko rw'akazi

Intumwa y’Amerika muri Afurika izasura u Rwanda ku Cyumweru

Yanditswe na Twagira Wilson

Ku ya 08-03-2019 saa 11:57:24

Umunyamabanga wungirije wa Leta Zunze Ubumwe z’Amerika ushinzwe Umugabane w’Afurika azagera mu Rwanda ku Cyumweru tariki 10 Werurwe 2019, mu ruzinduko rw’akazi.

We n’itsinda azazana na ryo, bazagirana ibiganiro n’abayobozi bakuru banasure urwibutso rwa Jenoside yakorewe Abatutsi rwa Kigali, nk’uko byatangajwe na Ambasade y’Amerika mu Rwanda.

Biteganyijwe ko ku munsi wa kabiri w’uruzinduko rwe, azasura Kaminuza ya Carnegie Mellon, aho azatanga ikiganiro, kizibanda ku nsanganyamatsiko izagaruka ku gutsura umubano hagati y’u Rwanda na Leta zunze ubumwe z’Amerika.

Mbere yo gusura u Rwanda, Tibor Nagy uruzinduko rwe yarutangiriye muri bimwe mu bihugu byo mu karere nka Uganda, aho azaturuka aza mu Rwanda, nyuma akazarukomereza muri Repubulika iharanira demukarasi ya Congo.

Bamwe mu bayobozi bigeze kugirana ibiganiro na Tibor mu mwaka ushize wa 2018, harimo Louise Mushikiwabo wari Minisitiri w’Ububanyi n’Amahanga w’u Rwanda bahuriye muri Amerika, aho abayobozi bombi bagarutse kuri gahunda zarushaho guteza imbere umubano w’ibihugu byombi.

Ikigega cy’Amerika gishinzwe iterambere mpuzamahanga, USAID, kigaragaza ko kugeza mu 2016 icyo gihugu cyari kimaze guha u Rwanda inkunga ingana na milioni 268,8 y’amadorari y’Amerika yashowe mu bikorwa bitandukanye birimo iby’ubuzima by’umwihariko mu kurwanya agakoko gatera Sida, kurwanya amakimbirane, gusigasira amahoro n’umutekano, uburezi, urwego rw’ubuhinzi, isuku n’ibindi.

Mu ruzinduko yari aherutse kugirira mu Rwanda, umuyobozi w’Ikigega cy’Abanyamerika gishinzwe ishoramari mu mahanga (Overseas Private Investment Corporation/OPIC), Elizabeth Littlefield yashimye Urwego rw’Igihugu rushinzwe Iterambere RDB, avuga ko abashoramari bo muri Leta Zunze Ubumwe z’Amerika bagiye kongererwa ubushobozi kugira ngo babashe gushora imari yabo mu Rwanda nka kimwe mu bihugu bikiri mu nzira y’amajyambere.

Naggy Tibo utegerejwe mu Rwanda ejo ubwo azaba ari mu ruzinduko rw’akazi

TANGA IGITEKEREZO

Leave a Reply

Your email address will not be published. Required fields are marked *