27°C , Mostly cloudy | Kigali-Rwanda
Perezida wa Sena Makuza Bernard iburyo na Visi-Perezida w'u Buhinde, Muppavarapu Venkaiah Naidu, basinya amasezerano

Inteko y’u Rwanda n’iy’u Buhinde basinye amasezerano y’ubufatanye

Yanditswe na MUTUNGIREHE SAMUEL

Ku ya 11-07-2018 saa 06:50:50

Perezida w’Inteko Ishinga Amategeko y’u Rwanda Umutwe wa Sena, Makuza Bernard, ari mu ruzinduko mu gihugu cy’u Buhinde ku butumire bwa Visi-Perezida w’u Buhinde Muppavarapu Venkaiah Naidu, aho bashyize umukono ku masezerano y’ubufatanye hagati y’Inteko z’ibihugu byombi.

Perezida wa Sena Makuza Bernard iburyo na Visi-Perezida w’u Buhinde, Muppavarapu Venkaiah Naidu, basinya amasezerano

Ku munsi w’ejo hashize, tariki ya 10 Nyakanga 2018, ni bwo Makuza Bernard yahuye na Muppavarapu Venkaiah Naidu bagirana ibiganiro bashyira umukono ku masezerano y’ubufatanye hagati y’Inteko Zishinga Amategeko zombi, iy’u Rwanda n’iy’u Buhinde izwi ku izina rya “Rajya Sabha”.

Visi-Perezida w’u Buhinde Muppavarapu Venkaiah Naidu akaba ari n’umuyobozi Mukuru w’Akanama k’Ikirenga k’Inteko Ishinga Amategeko y’u Buhinde (Rajya Sabha). Uruzinduko rwa Perezida wa Sena Makuza Bernard mu Buhinde rugamije gutsura umubano hagati y’ibihugu byombi.

Abayobozi bombi bashimye umubano uri hagati y’ibihugu byombi mu bya politiki, biyemeza kuwushimangira nk’ikimenyetso cyo kongera ubufatanye mu bukungu n’ishoramari. Ni mu gihe mu mpera z’uku kwezi kwa Nyakanga 2018 Minisitiri w’Intebe w’u Buhinde Narendra Modi azasura u Rwanda.

Avuga kuri uru ruzinduko rwa Minisitiri w’Intebe w’u Buhinde mu Rwanda, Makuza yavuze ko ruzateza imbere ubutwererane bw’ibihugu byombi, cyane ko u Rwanda rushaka ubufatanye n’u Buhinde mu nzego z’ubuhinzi n’ingufu.

Uretse Minisitiri w’u Buhinde uzasura u Rwanda mu mpera z’uku kwezi, na Perezida w’u Bushinwa Xi Jinping azasura u Rwanda ku matariki ya 22-23 z’uku kwezi kwa Nyakanga 2018. Undi uzasura u Rwanda muri uku kwezi ni Perezida w’igihugu cya Mozambique Filipe Nyusi.

TANGA IGITEKEREZO

Leave a Reply

Be the First to Comment!

avatar