24°C , Mostly cloudy | Kigali-Rwanda
Perezida w’Inteko Nshingamategeko umutwe w’abadepite, Mukabarisa Donatille (Foto Inteko)

Inteko Ishinga Amategeko y’u Rwanda yashimye Ingabo zari iza FPR zahagaritse Jenoside

Yanditswe na KAYITARE JEAN PAUL

Ku ya 15-05-2018 saa 07:24:26

Inteko Ishinga Amategeko y’u Rwanda imitwe yombi yibutse ku nshuro ya 24 Jenoside yakorewe Abatutsi, maze ishima ingabo zari iza FPR-Inkotanyi zemeye guhara ubuzima zigahagarika Jenoside yakorerwaga Abatutsi.

Perezida w’Inteko Nshingamategeko umutwe w’abadepite, Mukabarisa Donatille (Foto Inteko)

Abagize Inteko Ishinga Amategeko Imitwe yombi, bamaganye kandi abakomeje guhakana, gupfobya no gukwirakwiza ingengabitekerezo ya Jenoside, ahubwo bagasaba Abanyarwanda gukomereza mu ntambwe y’iterambere.

Perezida w’Inteko Ishinga Amategeko, Umutwe w’Abadepite, Mukabalisa Donatille, ashima ubutwari bw’Inkotanyi zemeye gushyira ubuzima bwazo mu kaga ariko zigahagarika Jenoside yakorerwaga Abatutsi.

Ati “Iyo twibuka Jenoside yakorewe Abatutsi mu 1994, nta bwo nk’Inteko Ishinga Amategeko twareka gushima ingabo zari iza FPR-Inkotanyi zari zirangajwe imbere na Nyakubahwa Paul Kagame, Perezida wa Repubulika y’u Rwanda. Zagize ubutwari budasanzwe, zirahagarara zemera guhara ubuzima bwazo, zihagarika Jenoside yakorerwa Abatutsi zibohora igihugu cyacu”.

Akomeza avuga ko nk’abanyapolitiki bari mu nzego zinyuranye by’umwihariko abagize Inteko Ishinga Amategeko, urugamba rwatangiwe n’abanyapolitiki beza baranzwe n’umutima wo gukunda igihugu n’Abanyarwanda, n’ingabo zahagaritse Jenoside, biyemeje gukomeza iyo nzira yo kubaka igihugu kuko ngo bafite umusingi wo kubakiraho, ari wo ubumwe bw’Abanyarwanda, amahoro n’umutekano bisesuye.

Avuga kandi ko abato bakwiye kubigisha amateka n’ubutwari bwaranze abahagaritse Jenoside yakorewe Abatutsi. Ati “Dukomeze rero kwigisha amateka nyayo abakibyiruka tubafasha kumva ibibi byabaye mu mateka y’Abanyarwanda, tubagaragariza ubutwari bw’Abanyarwanda bitanze bagahagarika Jenoside amahanga arebera”.

Perezida w’Inteko Ishinga Amategeko umutwe w’abadepite Mukabalisa, agaragaza ko bamaganye abahakana n’abapfobya Jenoside yakorewe Abatutsi kimwe n’abakwirakwiza ingengabitekerezo yayo. Ati “Iyo Abanyarwanda twibuka abacu bishwe urw’agashinyaguro, nk’intumwa za rubanda tuboneraho umwanya wo kwamagana bidasubirwaho abagifite gahunda yo gukwirakwiza ingengabitekerezo ya Jenoside, guhakana no gupfobya Jenoside yakorewe Abatutsi mu 1994”.

Akomeza avuga ko icyo abo baba bagamije ari ukwambura agaciro inzirakarengane zirenga miliyoni zishwe muri Jenoside yakorewe Abatutsi no gukomeretsa Abanyarwanda ariko cyane cyane abarokotse Jenoside, bashaka ndetse no kugoreka amateka nkana, bagamije gushinyagura gusa.

Avuga ko nk’Inteko Ishinga Amategeko Abanyarwanda bafite umugisha udasanzwe wo kugira Umukuru w’Igihugu ushyize imbaraga muri dipolomasi ariko ngo n’intumwa za rubanda  biyemeje gukomeza gukoresha dipolomasi mu miryango mpuzamahanga Inteko Ishinga Amategeko y’u Rwanda ihagarariwemo cyangwa irimo, mu gusobanurira neza izindi Nteko zishinga amategeko, baba ari abo bahurira mu nama zitandukanye, aho bagiye hose, basobanura neza amateka nyayo y’u Rwanda n’amateka ya Jenoside yakorewe Abatutsi kuva kera no kubasaba gushyikiriza abakoze Jenoside ubutabera kugira ngo bacirwe imanza ndetse no gufasha u Rwanda guhangana n’abakomeje gukwirakwiza ingengabitekerezo ya Jenoside, abayihakana n’abayipfobya.

Hon. Mukabalisa ashimira ibihugu bimwe na bimwe ngo nubwo bikiri bike, byamaze kohereza bamwe mu bagize uruhare muri Jenoside kugira ngo baburanire aho bakoreye ibyaha, ibamaze kubacira imanza, ndetse no gusaba ko n’abandi bakekwaho icyaha cya Jenoside bakidegembya hirya no hino muri ibyo bihugu, bashyikirizwa ubutabera kimwe n’ibihugu bitaratera iyo ntambwe bikagera ikirenge mu k’ibyo bihugu byiyemeje kubahiriza, icyo amategeko mpuzamahanga abisaba.

Avuga ko Abanyarwanda n’ababahagarariye mu Nteko Ishinga Amategeko, bakomeze kwihuta mu ntambwe bamaze gutera mu iterambere kubera ubuyobozi bwiza bw’igihugu.

Ati “Twese dukomeze kwihuta mu iterambere kubera ubuyobozi bwiza, tunashima utubereye ku isonga Perezida Paul Kagame, dukomeze dushyigikire gahunda ya Ndi Umunyarwanda igamije gufasha Abanyarwanda kwigobotora ingaruka dukomora ku mateka mabi kandi turushaho gutera intambwe irushijeho”.

 

TANGA IGITEKEREZO

Leave a Reply

Your email address will not be published. Required fields are marked *