21°C , Intermittent clouds | Kigali-Rwanda
Itsinda ry'Abadepite ryavuye muri Burkina Faso riyobowe na Hon. Madamu Elise Foniyama Ilboudo Thiombiano uwa kane uvuye i bumoso abanjirijwe na Hon. Mukabaliza Donatille

Inteko Ishinga Amategeko ya Zimbabwe n’iya Burkina Faso zaje kwigira ku Rwanda 

Yanditswe na RUTAYISIRE EMILE 

Ku ya 30-07-2019 saa 07:39:26

Itsinda ry’Abadepite bari mu Nteko Ishinga Amategeko  ya Zimbabwe ndetse n’itsinda ry’Abadepite bari mu Nteko Ishinga Amategeko ya Burkina Faso bari mu ruzinduko rw’akazi mu Rwanda aho baje kwigira ku mikorere y’Inteko Ishinga Amategeko y’u Rwanda Umutwe w’Abadepite.

Ejo hashize ku wa Mbere tariki ya 29 Nyakanga 2019, Perezida w’Inteko Ishinga Amategeko y’u Rwanda, Umutwe w’Abadepita, Hon. Mukabalisa Donatille yakiriye mu biro bye itsinda ry’Abadepite bari mu Nteko Ishinga Amategeko ya Zimbabwe riyobowe na Hon. Kindness Paradza, ukuriye Komite y’Ububanyi n’amahanga n’ubucuruzi mu Nteko Ishinga Amategeko ya Zimbabwe.

Nyuma yo kwakira uwari ayoboye itsinda ry’Abadepite ryavuye muri Zimbabwe, Hon. Mukabalisa yakiriye itsinda ry’Abadepite ryaturutse mu Gihugu cya Burkina Faso riyobowe na Visi Perezida wa kane w’Inteko Ishinga Amategeko ya Burkina Faso, Hon. Madame Elise Foniyama Ilboudo Thiombiano.

Mu kiganiro n’abanyamakuru, Hon. Kindness Paradza wari uyoboye itsinda ryavuye muri Zimbabwe yashimye cyane imikorere isobanutse y’Inteko Ishinga Amategeko y’u Rwanda kubera amategeko igenderaho, ashima umwanya u Rwanda ruha abanyamahanga agira ati «Twashimye cyane uburyo u Rwanda rworohereza abanyamahanga gusura u Rwanda ndetse n’uburyo abashoramari boroherezwa gushora imari mu Rwanda.»

Uwari ayoboye itsinda ry’Abadepite bavuye mu Gihugu cya Burkina Faso, Hon. Madame Elise Foniyama Ilboudo Thiombiano yavuze ko baje mu Rwanda kwigira ku mikorere y’Inteko Ishinga Amategeko y’u Rwanda Umutwe w’Abadepite kuko basanga hari byinshi u Rwanda rufite bo batari bageraho.

Akagira ati «Twamenye ko mufite Inteko Ishinga Amategeko ikora neza cyane, twaje mu Rwanda kwiga uburyo twagendera ku mikorere y’Inteko Ishinga Amategeko y’u Rwanda.»

Yakomeje avuga ko mu Rwanda mu Nteko Ishinga Amategeko Umutwe w’Abadepite harimo imikorere myiza ku buryo basanga hari ibyo bagomba kuvugurura iwabo bagashyiramo n’ibyo bungukiye mu Rwanda. Umubare munini w’abagore akaba asanga ari gahunda nziza Leta y’u Rwanda ifite yo kwita ku byiciro bitari byarahawe agaciro mbere.

Perezida w’Inteko Ishinga Amategeko y’u Rwanda, umutwe w’Abadepite Hon. Mukabalisa Donatille yavuze ko abashyitsi baturutse mu Nteko zishinga amategeko za Zimbabwe na Burkina Faso baje kwigira ku mikorere y’Inteko Ishinga Amategeko y’u Rwanda cyane cyane mu bijyanye n’inzira y’amategeko, uko Inteko ikora bigendanye n’inshingano z’Inteko Ishinga Amategeko n’ishyirwa mu bikorwa rya gahunda y’ibikorwa bya Guverinoma.

Hon. Mukabalisa yavuze kandi ko usibye kuba baza bashaka kureba n’imiterere y’Inteko Ishinga Amategeko, baba banashaka ko umubano w’inteko zishinga amategeko ukomeza gushinga imizi, zigakomeza kujya zungurana ibitekerezo. N’ubwo Inteko zishinga amategeko zo mu bindi bihugu zikunze kuza kwigira ku Rwanda, Hon. Mukabalisa avuga ko baboneraho no kubabwira ku mateka y’u Rwanda, akagira ati « Iyo badusuye gutya tuboneraho no kubagaragariza amateka y’Igihugu cy’u Rwanda,  aho u Rwanda rwavuye, aho rugeze, aho rushaka kugera n’uburyo ruzabigeraho mu bufatanye buranga Abanyarwanda. »

Itsinda ry’Abadepite ryavuye muri Burkina Faso riyobowe na Hon. Madamu Elise Foniyama Ilboudo Thiombiano uwa kane uvuye i bumoso abanjirijwe na Hon. Mukabaliza Donatille

TANGA IGITEKEREZO

Leave a Reply

Your email address will not be published. Required fields are marked *