17°C , Partly sunny | Kigali-Rwanda
Abakinnyi b'Intare FC bishimira igikombe cya shampiyona y'ikiciro cya kabiri ya 2017-2018

Intare FC yegukanye igikombe cya shampiyona y’ikiciro cya kabiri

Yanditswe na BUGINGO FIDELE

Ku ya 06-07-2018 saa 08:03:27

Ikipe y’Intare FC ni yo yegukanye igikombe cya shampiyona y’ikiciro cya kabiri mu mupira w’amaguru  itsinze ku mukino wa nyuma ikipe ya AS Muhanga ibitego 2-1.

Abakinnyi b’Intare FC bishimira igikombe cya shampiyona y’ikiciro cya kabiri ya 2017-2018

Izi kipe zombi zamaze no kuzamuka mu kiciro cya  mbere  zakinnye umukino wa nyuma tariki 04 Nyakanga 2018 kuri Sitade Amahoro. Ikipe ya AS Muhanga ni yo yafunguye amazamu ku gitego cya Bizimana Yannick ku munota wa 8.

Mu gice cya kabiri cy’umukino ku munota wa 61, ikipe y’Intare FC yishyuye iki gitego  gitsinzwe na Byukusenge Jacob nyuma ku munota wa 75, Mugunga Yves atsindira Intare FC igitego cyayihesheje insinzi.

Ikipe y’Intare FC yageze ku mukino wa nyuma isezereye  Pepiniere FC ku bitego 2-1 mu mikino yombi  naho AS Muhanga  isezerera Sorwathe FC  ku bitego 4-1 mu mikino yombi.

Nyuma yo gutsinda AS Muhanga  akegukana igikombe, umutoza w’Intare FC, Rubona Emmanuel yatangaje ko yasabye abakinnyi be gutuza bagakina umupira kandi byabakundiye. Uyu mutoza akomeza avuga ko bagiye kwitegura shampiyona y’ikiciro cya mbere ya 2018-2019.

Umunyamabanga mukuru w’Intare FC, Byabuze Katibito   yavuze ko icyo iyi kipe yarushije izindi ari uko   bari bamaze imyaka isaga 3 biga umupira ko igihe cyari kigeze ngo bagaragaze  ibyo bize. Katibito yakomeje avuga ko iyi kipe nta gahunda yo kuyihindura kuko ari intego bihaye zo gukinisha abakiri bato.

Perezida wa AS Muhanga, Ndayisaba Damascene yavuze ko n’ubwo bategukanye igikombe bishimiye ko intego yo kugaruka mu kiciro cya mbere bayigezeho. Ati Ubu  twaje  kandi nta kongera gusubira inyuma, AS Muhanga ntizongera gusubira mu kiciro cya kabiri”.

Intare FC na AS Muhanga  zikaba zarabonye itike yo gukina shampiyona y’ikiciro cya mbere mu mwaka w’imikino wa 2018-2019. Intare FC yaherukaga mu kiciro cya mbere muri 2004 naho AS Muhanga yaheruka mu kiciro cya mbere muri 2016.

TANGA IGITEKEREZO

Leave a Reply

Your email address will not be published. Required fields are marked *