21°C , Mostly cloudy | Kigali-Rwanda
Minisitiri w’Ubuzima Dr. Gashumba Diane yavuze ko iyo gahunda nshya yo kwisuzumisha ari inzira yo kunoza ubuzima bw’umwana n’umubyeyi

Inshuro umubyeyi yisuzumisha mbere yo kubyara zikubye kabiri

Yanditswe na MUTUNGIREHE SAMUEL

Ku ya 20-08-2018 saa 08:20:34

U Rwanda rwatoranyijwe n’ishami ry’umuryango w’Abibumbye rishinzwe ubuzima (OMS) gutangira gushyira mu bikorwa gahunda nshya yo kwita ku buzima  bw’umwana n’umugore mbere yo kubyara, aho inshuro zo kwisuzumisha ku mubyeyi mbere yo kubyara zikubye kabiri zikava kuri enye zikagera ku munani.

Minisitiri w’Ubuzima Dr. Gashumba Diane yavuze ko iyo gahunda nshya yo kwisuzumisha ari inzira yo kunoza ubuzima bw’umwana n’umubyeyi

Itangazo Minisiteri y’Ubuzima yashyize ahagaragara mu cyumweru gishize, yatangaje ko u Rwanda na Burkina Faso, u Buhinde na Malawi ari ibihugu bitatu byatoranyijwe gutangiza ingamba nshya za OMS zo kwita ku buzima bw’umwana n’umubyeyi.

Iyi gahunda nshya igena ko inshuro umubyeyi yahuraga na muganga yisuzumisha mbere yo kubyara zizava ku nshuro enye zikagera ku munani, mu rwego rwo kurushaho kubungabunga ubuzima bw’umwana.

Muri izo nshuro enye, umubyeyi utwite azajya ahura na muganga inshuro imwe mu mezi atatu y’igihembwe cya mbere cyo gutwita, yongere ahure na muganga inshuro ebyiri mu gihembwe cya kabiri hanyuma yongere guhura na muganga inshuro eshanu mu mezi atatu y’igihembwe cya gatatu ari na cyo cya nyuma mbere yo kubyara.

Minisitiri w’Ubuzima Dr. Gashumba Diane yavuze ko izo ngamba ari inzira yo kunoza ubuzima bw’umwana n’umubyeyi mu Rwanda no kuziba icyuho cyose cyabonekamo.

Ati: “Ni ibintu byiza cyane kuri twe, izo nshuro zose zo kwisuzumisha mbere yo kubyara ku mubyeyi ni ingenzi cyane kuko zitanga umusaruro mwiza ku mubyeyi utwite kandi ni imwe mu nzira zo kugabanya imfu z’ababyeyi bapfa babyara n’abana bapfa bavutse. Binyuze muri izo nshuro umubyeyi azajya yisuzumisha mbere yo kubyara, tuzabasha kuziba icyuho muri gahunda yo kuboneza urubyaro binyuze muri serivisi nziza umubyeyi azahabwa zibimushishikariza.”

Dr Sayinzoga Felix, ukora mu ishami rishinzwe ubuzima bw’umubyeyi n’umwana mu kigo cy’Ubuzima RBC, avuga ko hatazabaho gusuzuma gusa ahubwo haziyongeraho no gusuzuma umubyeyi hakoreshejwe icyuma kireba mu nda (Echographie).

Kwisuzumisha inshuro zose zisabwa mbere yo kubyara bituma umubyeyi amenya neza imikurire y’umwana atwite, bikamufasha gukurikirana ubuzima bwe n’ubw’umwana ari nako ahabwa inama na muganga uko ibihembwe bikurikirana mbere yo kubyara.

TANGA IGITEKEREZO

Leave a Reply

1 Comment on "Inshuro umubyeyi yisuzumisha mbere yo kubyara zikubye kabiri"

avatar
Sort by:   newest | oldest | most voted
Samuel
Guest

Ibi ni byiza cyane bizatuma ubuzima b’umwana n’umubyeyi burushaho kuba bwiza. Ariko birasaba kongera abakozi