28°C , Sunny | Kigali-Rwanda

Insengero zirahamagarirwa guteza imbere ihame ry’uburinganire

Yanditswe na Mukagahizi Rose

Ku ya 23-08-2019 saa 15:28:23
Insengero zirahamagarirwa guteza imbere ihame ry’uburinganire

Umuryango w’Itorero Mpuzamahanga rigamije guteza imbere uburinganire urahamagarira abayobozi b’amatorero n’amadini guteza imbere ihame ry’uburinganire kuko Bibiliya itagaragaza ko umugore atangana n’umugabo mu bijyanye n’ubuyobozi.

Mu nama mpuzamahanga yaberaga i Kigali yiga ku kwizera, ubutabera n’ihame ry’uburinganire mu madini, Rev. Domnic Misolo, Umuyobozi wa Ekklesia Foundation for Gender Education (EFOGE International) yavuze ko umugore n’umugabo ari umwe muri Kirisito.

Yagize ati : “Tubona mu nsengero nta butabera n’uburinganire buhari urebye uburyo abasenyeri n’abashumba basobanura Bibiliya by’umwihariko mu bijyanye n’ubuyobozi mu gihe hari abandi bashaka ubuyobozi mu rugo no muri sosiyete sivili.”

Avuga ko hari abasobanura nabi Bibiliya. Ati : “Niyo mpamvu turi hano mu rwego rwo kugaragaza ko abantu bose baremwe mu ishusho y’Imana.”

Akomeza agira ati: “Dushaka uburinganire mu ngo iwacu, mu rusengero no mu muryango muri rusange. Turahamagarira abantu kwimakaza uburinganire hagati y’umugabo n’umugore.”

Dr. Mimi Haddad, nawe witabiriye iyi nama yavuze ko kuva mu ntangiriro Bibiliya igaragaza uburinganire bw’umugabo n’umugore mu kuba bararemwe mu ishusho y’Imana, muri Kristo.

Yagize ati : “Insengero zagombye guteza imbere ihame ry’uburinganire kuko Bibiliya ntigaragaza ko umugore atangana n’umugabo mu bijyanye n’ubuyobozi. Bibiliya ibisobanura neza ko itorero ryagombye kwakira umugabo n’umugore.”

Uwimabera Emma, ahagarariye umuryango ugamije kwigisha no guhugura ibijyanye n’ihame ry’uburinganire kugira ngo ryumvikane neza nyuma ribe impamvu yo kuzamura ubukungu bw’igihugu kurusha uko bishobora kuba impamvu yo gutandukanya abantu, yavuze ko mu gutegura iyi nama icyari kigamijwe ari uguhuza abantu bafite inararibonye mu bijyanye n’ihame ry’uburinganire n’ibivugirwa mu rusengero kuko ahanini ikibazo gikunze kuboneka ku bakirisito usanga hari ubwo mu nsengero abantu bigishwa ibitandukanye n’ibiri ukuri mu ihame ry’uburinganire.

Yagize ati : “ Hari ubwo usanga mu nsengero bakubwira ko Bibiliya itemera ihame ry’uburinganire, bamwe mu bakirisitu bakumva ko kujya mu ihame ry’uburinganire baba batambikiriye ariko aba bantu bafite uburyo babyumva neza ku buryo Bibiliya ishobora kuba imbarutso ndetse no gufasha Abakirisitu gufatanya cyane cyangwa kuba imbarutso y’ihame ry’uburinganire mu iterambere kurusha uko babibona nk’ikintu kitari cyo.”

Ku bijyanye n’imiyoborere mu buryo bw’amadini n’amatorero hari hamwe abagore bahezwa avuga ko kugeza ubu hari amadini amwe n’amwe atemera ubuyobozi bw’abagore ndetse no ku myanya yo hejuru bakaba bakiri bake cyane, ibyo bakabikora bitwaje uburyo bafata Bibiliya.

Ni mu gihe ashimangira ko Bibiliya yanditswe n’abantu bajyanishije n’umuco wari mu Bayuda ariyo mpamvu basaba ko kuri ubu ihame ry’uburinganire ryakwimakazwa mu nsengero, umugabo n’umugore bose bakagira uruhare mu buyobozi bw’insengero.

Yagize ati : “Harageze ko n’abanyamadini bacu ndetse n’amatorero bahindura imyumvire bakigisha Bibiliya batagiye mu by’umuco wa kera ahanini wakandamizaga umugore ahubwo bakajyanisha n’ihame ry’uburinganire.”

Basanga igihe kigeze ngo umugore agire ibitekerezo bifatanya n’iby’umugabo kubaka mu iterambere ry’ivugabutumwa bwiza.

Insengero zirahamagarirwa guteza imbere ihame ry’uburinganire

TANGA IGITEKEREZO

Leave a Reply

Your email address will not be published. Required fields are marked *