Inkiko zirakenesha, ibibazo tujye twicara tubicoce – Depite Mukamana

Yanditswe na Twizeyimana Fabrice

Ku ya 02-12-2019 saa 15:30:13
Depite Mukamana yasabye abaturage kwirinda gusiragira mu nkiko ku bibazo byakemukira mu muryango

Mukamana Elizabeth, Umudepite mu Nteko Ishinga Amategeko y’u Rwanda, yasabye abaturage bo mu karere ka Nyaruguru kugira umuco wo gukemurira ibibazo mu nama z’imiryango no mu bunzi, aho kwihutira kujya mu nkiko kuko kuzisiragiramo kenshi bikurura ubukene.

Ni ubutumwa uyu mudepite yagarutseho asoza icyumweru cyahariwe ibikorwa by’abunzi mu karere ka Nyaruguru cyatangiwe kuwa 25 Ugushyingo 2019 gisozwa kuya mbere Ukuboza 2019.

Depite Mukamana yagarutse kuri bamwe mu baturage bagifite imyumvire y’uko buri kibazo bagomba kukijyana mu nkiko, abibutsa ko gusiragira mu nkiko biteza ubukene, bityo bakwiye kujya bakemurira ibibazo mu nama z’imiryango no mu bunzi.

Yagize ati “Inkiko zirakenesha, nk’uko Leta y’ubumwe aho itugejeje n’ibyo yadutoje ubu uyu ni umwanya wo kugira ngo ibibazo tujye twicara tubicoce, ngira ngo iriya nama y’umuryango n’uko yubakitse ibibazo bigaragara ubu ngubu abaturage mu bufatanye nayo igakomeza igakora ibibazo byagabanuka cyane.

Aho kugira ngo dute umwanya tugana inkiko ahubwo ukavuga uti ndabanza niyambaze ya nama ibikemure ndetse ikiruta ibyo harimo n’ubwiyunge kuko muzicara nk’abavandimwe babunge ikibazo bagikemure.Kera muzi ukuntu bajyaga barangiza ibibazo kuko ubu imyubakire y’u Rwanda dushingiye ku ndangagaciro z’umuco nyarwanda, bakakunga bakavuga bati wowe uratanga iki, kandi ukumva biragushimishije.”

Umuhuzabikorwa w’urwego rushinzwe gutanga ubufasha mu by’amategeko (MAJ) Nsengimana Olivier, yavuze ko mu ntego bari bafite mu cyumweru cyahariwe ibikorwa by’abunzi harimo no gushishikariza abaturage gukemura ibibazo mu mahoro, kugira ngo ‘twubake u Rwanda twifuza’.

Yavuze ko mu buryo bubiri bwemewe n’amategeko bwo gukemura ibibazo mu mahoro harimo kugana komite z’abunzi n’uburyo bw’inama z’imiryango.

Yasobanuye ko ububasha bwa komite z’abunzi bugarukira ku gukemura ibibazo by’imitungo yimukanwa n’itimukanwa y’izungura kuri yo mu gihe agaciro kayo katarengeje miliyoni eshatu y’amafaranga y’u Rwanda, gusuzuma ibibazo byo kutubahiriza amasezerano yabaye hagati y’impande zombi y’abantu ku giti cyabo mu gihe agaciro kayo katarengeje miliyoni eshatu.

Izi komite kandi zemerewe gukemura ibibazo by’imiryango mu gihe igisabwa Atari ugufata icyemezo ku irangamimerere.

Yasabye ko inama z’imiryango zirushaho guhabwa agaciro

Nsengimana yasobanuye ko izi nama zashyizweho mu itegeko rigenga abantu n’umuryango rya 2016, kugira ngo ubutabera bwegereye abaturage bishobore gutangwa. Izo nama z’imiryango ni urwego rwo mu muryango  rushinzwe gukemura amakimbirane avutse mu muryango no kurengera inyungu zawo.

Iyi nama iba igizwe na Se na Nyina w’ufite ikibazo.Abandi ba kabiri ni abavandimwe b’ufite ikibazo bafite imyaka y’ubukure, aba gatatu ni abafitanye isano rya bugufi na Se na Nyina w’ufite icyo kibazo, ni ukuvuga ba Nyirarume, ba Nyirasenge, ba Sewabo, na ba Nyina wabo.

Abandi bagize iyo nama y’umuryango ni abantu babiri mu mudugudu bazwiho kuvugisha ukuri n’ubushobozi bwo gukemura ibibazo.

Nsengimana yasabye inzego zose guharanira ko iyi nama y’umuryango ihabwa agaciro kuko imyanzuro yayo ari kimwe mu bisigaye bibazwa mu gutera kashe mpuruza.

Yagize ati “Ibibazo dufite mu karere ka Nyaruguru ni ibibazo by’ubutaka, 90% ni ibibazo by’ubutaka mu gihe 97% by’ibibazo by’ubwo butaka ari iby’abantu bahuriye mu muryango, biba bihuza abagize umuryango.

Hakaba hari ikibazo rero cy’uko abantu bari guhera ikibazo muri komite y’abunzi bagera mu rukiko rukanga kubaterera kashe mpuruza kubera ko kitahereye mu nama y’umuryango.Ni yo mpamvu dushaka kuvuga inama y’umuryango no kuyibakangurira no gusaba abayobozi kudufasha kugira ngo bayishyigikire ikore bityo abaturage babone ubutabera.”

Nsengimana kandi yibukije abaturage ko ntawemerewe kubangamira inama y’umuryango kuko ahanwa nk’uwabujije urwego rw’ubutabera gukoram kandi agakurikiranwa harimo impamvu nkomezacyaha.

Akomeza avuga ko iyi nama itegeko riteganya ko ifata ikemezo, niba ari nk’isambu ikemeza ko Runaka ayihawe hanyuma utanyuzwe n’icyo kemezo niwe uregera komite y’abunzi.

Iyi nama y’abunzi iba ifite agaciro kanini, kuko ikemezo ifashe ntihagire uregera komite y’abunzi gishyirwaho kashe mpuzuza nk’uko n’urundi rubanza rwose rushyirwaho kashe mpuruza cyangwa nk’uko umwanzuro w’abuzi nawo ushyirwaho iyo kashe.

Yagize ati “Komite z’abunzi n’inama z’imiryango zegereye abaturage  mu gihe urukiko rwacu ari rumwe mu karere, nk’umuntu wavuye Nyabimata agiye kurega mu rukiko murabona ko bizamusaba Amafaranga yo gutega, ariko komite ziratwegereye n’izo nama z’imiryango ziratwegereye.

Akandi kamaro ni uko abafitanye ikibazo nibo bahitamo abagize inteko yunga muri ba bunzi barindwi bahitamo batatu bo kubakemurira ikibazo, iyo bumvikanye ku bunzi babiri,ba bunzi babiri bahitamo uwa gatatu bagakemura ikibazo.”

Yakomeje agira ati “Akandi kamaro k’ingenzi n’uko izi komite zikemura ikibazo abantu bagakomeza kubana, murabizi abantu iyo bagiye mu rukiko umwe ashobora kunyura inzira imwe undi akanyura indi ntibashobora gukoresha inzira imwe, iyo inzira ari imwe umwe agenda mbere undi akagenda amukurikiye, iyo bageze ku rukiko ntibashobora kwicarana  kuko bameze kuba abanzi.Ariko izi komite zikemura ibibazo abantu bagakomeza kubana bakajya mu iterambere.”

Abaturage bibukijwe kandi ko yaba komite y’abunzi ndetse n’inama y’umuryango nta garama ry’urubanza ricibwa, nta bihembo by’abavoka, ahubwo byose bikorerwa ubuntu.

Imibare itangwa na MAJ muri aka karere igaragaza ko komite y’abunzi muri aka karere mu mwaka wa 2018/2019 yakiriye ibibazo 2641 igakemuramo 2404, hagasigara ibibazo ibihumbi 237. Bivuze ko ibibazo 80% byakemuwe muri byo 10% ni byo byagiye mu nkiko ibindi bikemurirwa muri komite z’abunzi.

Ku rwego rw’Akarere ka Nyaruguru,  abunzi  bo mu Karere ka Nyaruguru bakiriye ibibazo  2641 , hamemurwa ibibhazo  2404 hakaba harasigaye  ibigera kuri 237 .

U rwego rw’Abunzi rwashyizweho mu 2004 nk’urwego rwegereye abaturage  hagamijwe   kwishakamo ibisubizo no gukemura ibibazo by;amaturage bitagoranye cyane.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.