17°C , Mostly cloudy | Kigali-Rwanda
Gukoresha ifumbire ikomoka ku nka byatumye abahinzi b'urutoki bo mu Karere ka Kirehe bakungahara

Inka bahawe na Perezida Kagame zatumye babona umusaruro mwinshi w’urutoki

Yanditswe na Rutayisire Emile

Ku ya 11-07-2019 saa 15:52:41

Abaturage bo mu Karere ka Kirehe bishimiye umusaruro w’urutoki basigaye babona muri iki gihe kuko wazamutse ku buryo bushimishije bakaba bamaze kwiteza imbere babikesha kuvugurura ubuhinzi bwarwo, baruhinga kijyambere kandi bakoresha n’ifumbire y’inka bahawe na Perezida Paul Kagame muri gahunda ya Girinka Munyarwanda.

Mukabunani Cansilde atuye mu Murenge wa Mushikiri, umwe mu Mirenge ifite urutoki rwinshi, avuga ko mu myaka yahise umuntu yezaga igitoki k’ibiro 20 icyo kikaba ari cyo kinini ariko muri iki gihe igitoki kigeza mu biro bisaga 80.

Ati: “Uyu musaruro tuwukesha gahunda nziza ubuyobozi bwadukanguriye zo guhinga kijyambere, ariko tugafashwa cyane n’ifumbire y’imborera ikomoka ku nka zatanzwe na Perezida wa Repubulika Paul Kagame muri gahunda ya Girinka Munyarwanda”.

Akomeza avuga ko iyi gahunda ya Girinka n’ubwo yatangiye inka zihabwa abantu batishoboye igamije kubavana mu bukene, habayeho no korozanya ku buryo byatumye haboneka inka nyinshi, buri wese atinyuka korora ku buryo benshi bifite baziguze bituma haboneka ifumbire igira akamaro ku buhinzi bw’urutoki.

Kamanayo Sylvestre atuye mu Murenge wa Musaza yatangarije Imvaho Nshya ko mu myaka yashize bahinga mu buryo bwa gakondo bezaga ibitoki bike kandi na byo bikabura abaguzi n’ababonetse bakabahenda, avuga ko kuri ubu haje inganda zibagurira ibitoki bivamo inzoga.

Ati: “Ibitoki byose twejeje tubona ababitugurira. Inganda zaje zitugurira ku giciro kiza ku buryo ubuhinzi bw’urutoki bwaduteje imbere. Turashimira Perezida Kagame wazanye gahunda ya Girinka Munyarwanda none kubera ifumbire inka ziduha dusigaye tweza byinshi kandi bikabona isoko”.

Imvaho Nshya yavuganye na Muzungu Gerald, Umuyobozi w’Akarere ka Kirehe, ayitangariza ko ari abaturage bahoze mu Karere ka Kirehe ndetse n’abandi bahimukiye nibura bahamaze imyaka makumyabiri, bavuga ko ubuhinzi bw’urutoki bakoraga bwarangwaga n’urutoki gakondo ndetse n’uburyo bwo kubyaza umusaruro urutoki bukaba gakondo.

Aha bikaba bishatse kuvuga ko iyo rutaba urutoki rwo kubonamo imineke yo kurya cyangwa ibyo guteka bengagamo inzoga y’urwagwa.

Kimwe n’izindi politiki mvugururabuhinzi, urutoki narwo rwitaweho kuva mu 2008 nk’uko bitangazwa n’Umuyobozi w’Akarere ka Kirehe Muzungu. Agira ati: “Urutoki nk’igihingwa kiberanye na twinshi mu duce tw’aka karere ka Kirehe kazwiho kugira urutoki rwinshi, rwitaweho ku buryo abaturage bigishijwe uko barukorera kandi hafi ya bose bishyize hamwe mu makoperative ku buryo benshi bishakiye uburyo bwo kugeza umusaruro ku masoko cyane ku bitoki biribwa naho ku bitoki bivamo inzoga hari inganda zibitunganga zamaze kubona ibyangombwa ku buryo inganda zimaze kuba eshatu zikora inzoga zivuye mu bitoki”.

Gukoresha ifumbire ikomoka ku nka byatumye abahinzi b’urutoki bo mu Karere ka Kirehe bakungahara

TANGA IGITEKEREZO

Leave a Reply

Your email address will not be published. Required fields are marked *