19°C , Partly cloudy | Kigali-Rwanda

Ingufu u Rwanda rushyira mu isuku zikomeje  kurugira ikitegererezo  

Yanditswe na Tumukunde Georgine

Ku ya 04-07-2018 saa 18:17:02

 Muri iki gihe u Rwanda  rwizihiza isabukuru yo Kwibohora ku nshuro ya 24, hari byinshi byagezweho mu iterambere byo kwishimira, birimo no kuba Igihugu kirangwamo isuku n’abanyamahanga batangarira.

Ibyegeranyo bitandukanye byagiye bikorwa birimo ik’Ishami ry’Umuryango w’Abibumbye ryita ku Miturire cyo muri 2016,  bigaragaza ko  Umujyi wa Kigali uza ku isonga mu migi ifite isuku muri Afurika.

Intambwe yatewe mu rwego rw’isuku ishingiye kuri politiki ya Guverinoma y’u Rwanda, yashyizeho  uburyo buboneye bwo gusukura, gukusanya  no gutunganya  imyanda iva hirya no hino mu migi no mu cyaro, hakiyongeraho ubukangurambaga buhoraho butuma buri Muturarwanda isuku ayigira umuco.

Bamwe mu Banyarwanda baganiriye n’Imvaho Nshya  bagaragaje uburyo batewe ishema n’Igihugu cyabo kubera isura nziza kimaze kugira mu ruhando rw’amahanga.

Murekatete Eugenie ni umucuruzi mu isoko rya Nyarugenge, mu Mujyi wa Kigali, avuga  ko ibikorwa by’isuku biri ku rwego rushimishije kubera ubuyobozi bwiza Igihugu gifite. Ati: “ Rwose  ubu isuku ikorwa ahantu hose, bikagera no mu isoko,  Ubundi kera mbere y’uko Igihugu kibohorwa ntibyabagaho, amasoko ntiyabaga anubakiye, ntawatekerezaga ko n’isoko rigomba guhora rifite isuku!”

Murengerantwari Donatien utuye mu murenge wa Kigarama,  mu karere ka Kicukiro yagize ati: “Igihugu cyacu kirimo isuku pe, naguha ubuhamya kuko hari ibihugu byinshi nagenzemo,  Leta yacu turayishima yatugejeje ku iterambere, idutoza n’umuco w’isuku aho turi hose; mu ngo iwacu, aho tugenda mu muhanda n’ahandi.”

Abanyamahanga na bo bashima isuku basanga mu Rwanda

Nkurunziza Abdul ni Umunyekongo,   yagize ati: “ Ndi umushoferi ukorera hano ku mupaka munini ku ruhande rwa  Congo, i Goma, nkunda kuza mu Rwanda, rwose iyo mpageze mbona ari heza, nka  hano ku mupaka wa Rubavu ahahurijwe serivisi za gasutamo hameze neza, hubatse neza, hahora isuku ni nko ku kibuga k’indege…”

Abihurizaho na Kanyonyo Emeritha ukomoka muri Uganda uvuga ko bakwiye kwigira ku Rwanda ibijyanye n’isuku.

Ubukangurambaga bwatumye  buri wese isuku ayigira umuco

Nko muri  Kigali, Umuyobozi w’Umujyi  wa Kigali wungirije ushinzwe imibereho myiza y’abaturage Muhongerwa Patricia agaruka ku bukangurambaga bakora butuma uyu mugi utuwe cyane kandi ugendwa cyane n’abantu b’ingeri zose barimo n’abanyamahanga ukomeza kugira isuku buri wese atangarira.

Mu bukangurambaga habaho no guhemba imirenge yitwaye neza mu isuku. Umurenge wa Rwezamenyo mu karere ka Nyarugenge wahembwe iyi modoka

Ati: “Hari byinshi byagezweho mu rwego rw’isuku, ariko ntabwo twahagararira aho;  ubukangurambaga mu isuku bugomba guhoraho,    ubu dukorana na Polisi y’Igihugu n’izindi nzego   mu gukangurira abaturage kumva ko igikorwa k’isuku n’umutekano ari icyabo, ari bo gifitiye inyungu mbere na mbere.”

Mu bukangurambaga hajya habamo n’ibikorwa byo guhemba abitwaye neza. Yagize ati: “Ubu dushoje  ubukangurambaga twakoranye na Polisi y’Igihugu  kuva  mu kwezi kwa mbere  kugeza mu kwezi kwa gatandatu uyu mwaka, umurenge witwaye neza mu kwimakaza isuku hakurikijwe  ibipimo  twari twashyizeho  wahawe  igihembo k’imodoka.”

Umurenge wa Rwezamenyo mu Karere ka Nyarugenge mu Mujyi wa Kigali ni wo wegukanye iki gihembo k’imodoka.

Yakomeje avuga  ko ubu  mu mirenge yose igize Umujyi wa Kigali hari imodoka zaguzwe n’abaturage  zishinzwe gukurikirana ibikorwa by’isuku n’umutekano zireba ko  bigenda neza.

Abatanga serivisi z’isuku bashima Leta yabafashije kuvugurura  imikorere

Buregeya Paulin  Umuyobozi mukuru wa COPED, imwe muri  kompanyi zitanga serivisi z’isuku,  agaragaza uburyo Leta y’u Rwanda yitaye ku bikorwa by’isuku ikabiha umurongo   bikaba biri ku rwego rushimishije.

Isuku yageze no mu ntara z’u Rwanda hanze ya Kigali. Abanyamahanga batangarira isuku babona bagikandagira ku butaka bw’u Rwanda. Inyubako yahurijwemo za gasutamo i Rubavu

Ati: “Igihugu kimaze kubohorwa ibikorwa byo gukusanya imyanda  byakorwaga n’Umujyi wa Kigali,  washyiragaho kontineri ku mihanda abaturage bakajyanayo   imyanda, ariko ukabona bigoranye,  nk’abikorera  twatekereje korohereza abaturage tubasaba ko twajya tubatwarira imyanda,   twatangiranye na za resitora dukoresha  imodoka imwe .”

Uyu murimo ngo waje kugira abantu benshi bawukora ariko bamwe  batabifitiye ubushobozi, ni bwo Urwego Ngenzuramikorere (RURA) rwashyizeho  amabwiriza awugenga bituma  imikorere ivugururwa.

Ati: “Ni ryo banga ry’isuku mubona ubu, isuku yariyongereye, abakora uyu murimo bawukora neza kandi ukabateza imbere,  nka twe twatangiranye imodoka imwe  none ubu dufite amakamyo  yabugenewe 13 […],  isuku n’umutekano Abanyarwanda n’abasura u Rwanda  barabyishimira.”

Mukamana Claudine (ibumoso) yita ku busitani bw’ ikigo Rwanda Forensic Laboratory, yatangaje ko ashima uburyo umurimo bakora wahawe agaciro

Iterambere ry’ibikorwa by’isuku kandi rigarukwaho  na Kabera Joseph  Umuyobozi w’Ikigo gitanga serivisi z’isuku  Forefront Services Ltd.  Yagize ati: “Igihugu cyacu kimakaje umuco w’isuku; iyo umuntu akorera ahasukuye bimurinda indwara, bituma akora neza akagira umusaruro, ni yo mpamvu ahantu hose usanga hakorwa isuku. Ibikorwa by’isuku bikomeje  gutera imbere kandi  ntibikorwa mu Mujyi wa Kigali gusa, bikorwa no bindi bice by’Igihugu no ku mbibi zacyo, naguha urugero nka twe dukora isuku  ku mipaka 6: Uwa  La Corniche, Bugarama, Kabuhanga, Nemba, Nshiri na Kanyaruba […], urumva ko isuku nta ho itagera.”

Kabera Elysée na we ufite kompanyi yitwa SEWAGE  Technology Ltd  ikusanya amazi y’imyanda mu Mujyi wa Kigali iyajyana mu kimoteri cyabugenewe, avuga ko uyu murimo awumazemo igihe, akurikije uko kera bakoraga akagereranya n’ubu abona  hari intambwe igaragara yatewe mu isuku. Uretse kuba ibikorwa nk’ibi  bituma Igihugu gisa neza, binateza imbere ababikora kuko bibinjiriza ifaranga.

Yagize ati: “Maze imyaka itari munsi ya 15 nkora uyu murimo, nywutangira hakoraga imodoka imwe gusa y’Umujyi wa Kigali, nyuma abikorera bashyiraho uruhare rwabo,   ubu akazi kariyongereye   kubera iterambere;   inyubako zabaye nyinshi  kandi nta n’imwe  ishobora kubakwa idafite  ahagomba gushyirwa amazi y’imyanda. Urwego Ngenzuramikorere RURA kandi rwashyizeho  amabwiriza tugenderaho, atuma tunoza umurimo; abo duha serivisi bakishima kandi natwe tukiteza imbere.  Natangiranye imodoka imwe  ariko ubu maze kugira eshatu, ni umurimo untungiye umuryango n’abana bariga neza.”

Abakorera kompanyi zitanga serivisi z’isuku na bo bishimira agaciro bahawe.  Mukamana Claudine umukozi w’ikigo  gitanga serivisi z’isuku  Forefront Services Ltd, yagize ati: “Maze igihe kinini mu kazi ko gukora isuku, umurimo dukora ugenda neza, ni umurimo wahawe agaciro nk’iyindi yose, dukora dufite ibikoresho byabugenewe kandi banatwishyurira ubwishingizi. Tubasha no kwizigamira tugatera imbere   kuko umushahara uzira igihe. Ibyo bituma dukora akazi neza nk’abikorera.”

Ndayishimye Jean Baptiste umukozi wa  New Generation Cleaners & Supplies CO. Ltd,  yagize ati: “Ubu abakora isuku duhabwa  ibikoresho bya ngombwa bitewe n’aho dukora,  tugakora tunabungabunga ubuzima bwacu,  twambara impuzankano, natwe ubwacu isuku iba itugaragaraho.”

Ibikorwa by’isuku bikorwa hashingiwe ku mabwiriza yashyizweho na  RURA

Kuba isuku igeze ku rwego rushimishije bituruka ku bukangurambaga no ku mabwiriza agenga imikorere ya kompanyi zitanga serivisi z’isuku yashyizweho n’Urwego Ngenzuramikorere (RURA).

Isuku yitabwaho umunsi ku wundi

Nk’uko bitangazwa na Nzitonda Jacques Umuyobozi w’ishami rya  RURA rishinzwe kugenzura  amazi, isuku n’isukura,  aya mabwiriza yahinduye byinshi kandi  akomeje gutanga umusaruro.

Ati: “Amabwiriza yo gukora isuku twayashyizeho muri 2011,  muri 2017  turayavugurura  kugira ngo muri uyu murimo wo gutanga serivisi z’isuku hinjiremo ababifitiye ubumenyi n’ubushobozi […], hari intambwe igaragara yatewe kuko n’abanyamahanga basura u Rwanda batangarira isuku ihari. Ariko nubwo hari ibyagezweho nta kwirara ngo turekere aho, ahubwo ibikorwa by’isuku bigomba gukomeza kwitabwaho, tugakomeza ubugenzuzi buhoraho ndetse n’ubukangurambaga.”

Gutwara imyanda bikorwa mu buryo bunoze hifashishijwe imodoka zabugenewe

Aya mabwiriza agena ibiciro by’impushya  zo gutanga serivisi z’isuku, igihe zimara, akagaragaza ibyo  ushaka gutanga izi serivisi  agomba kuba yujuje.

Impushya zitangwa hakurikijwe imirimo ikorwa mu isuku n’isukura.

Isuku rusange

Nzitonda Jacques avuga ko ibikorwa by’isuku rusange mu bigo bitandukanye, mu  busitani no ku mihanda bikorwa na kompanyi cyangwa koperative zifite ibikoresho byabugenewe n’abakozi bakora bambaye imyambaro ibarinda icyabangiza ku mubiri: inkweto, isarubeti, uturindantoki n’uturinda amazuru, n’ibindi. Byumwihariko, abakora isuku mu muhanda hiyongeraho agakote gatuma  abatwaye ibinyabiziga bababona kugira ngo batabagonga.

Abaza mu Mujyi wa Kigali batangarira uburyo ukeye

Avuga ko abakora isuku muri iki kiciro  bashyira imyanda hamwe,  hanyuma abashinzwe kuyikusanya no kuyitwara bakaza kuyihakura bayijyana mu bimoteri.

Kugenzura  imyanda y’ibishingwe

serivisi yo gucunga imyanda y’ibishibwe yahawe umurongo, igabanywamo  ibice 3 kugira ngo ibashe gukurikiranwa neza. Harimo serivise zitandukanye arizo:

  • Gukusanya no gutwara imyanda iva mu ngo, mu masoko, cyangwa ahandi hahurira abantu benshi ikajyanwa mu kimoteri cyabugenewe.
  • Kubyaza umusaruro imyanda ibora igakorwamo ifumbire, ibicanwa (Briquettes) bikoreshwa mu guteka,… Kubyaza umusaruro imyanda itabora; nk’iya pulasitiki igakorwamo amashashi akoreshwa mu gutwara imyanda, mu bwubatsi n’impapuro zo gupfunyikamo (envelopes) n’iz’isuku.
  • Gucunga ibimoteri

Hashyizweho uburyo bunoze bwo gucunga amazi yanduye

Ubu abafite inyubako nini n’abazubaka bateganya ibyobo bijyamo  amazi yakoreshejwe. Ayo mazi aratunganywa, akabyazwa umusaruro akoreshwa mu bindi bikorwa nko kuvomerera ubusitani, adakoreshejwe akoherezwa muri za ruhurura kuko haba hizewe ko atahumanya ibidukikije.

Nzitonda Jacques  yagize ati: “Abantu bubaka inzu nini; amahoteli, amasoko ya kijyambere,… basabwa kugira inganda zitunganya amazi yakoreshejwe mbere y’uko bayarekurira muri za ruhurura.  Bitewe n’uko ba nyiri amazu baba badafite ubumenyi bw’uko atunganywa bitabaza abubaka izo nganda ari na bo basaba impushya muri RURA zo gutanga serivisi zo kubaka inganda zitunganya amazi mabi.”

Ibi byatumye ayo mazi arimo imyanda acungwa neza  kugira ngo atanduza amazi meza yo mu butaka atunguka mu masoko abantu bakoresha,  bakanayanywa.

Imyanda ihumanya na yo ifite uburyo icungwa

Imyanda ihumanya yo itwikwa mu buryo butangiza ibidukikije ( aha ni mu bitaro bya CHUK) cyangwa igashyingurwa

Mu rwego rwo gukomeza kubungabunga ubuzima, RURA yashyizeho n’amabwiriza yo gucunga imyanda ihumanya nk’iyo kwa muganga;  inshinge, imiti yashaje, imyanda iva mu bwiherero mu ngo, mu biro, n’indi myanda itandukanye ishobora guhumanya. Abakora uyu murimo baba bafite uruhushya rutangwa n’uru Rwego habanje kurebwa niba babifitiye ubushobozi koko.

Mu Rwanda hari n’uburyo bwo kubyaza umusaruro imyanda ya pulasitiki igakorwamo ibindi bintu birimo amashashi yubakishwa n’atwara ibishingwe. Mu ruganda rwa Ecoplastic

Imicungire y’imyanda yo mu bwiherero

Ku bijyanye n’imyanda yo mu bwiherero,  Nzitonda avuga  ko abadafite aho bacukura ibindi byobo mu gihe ibya mbere byuzuye, aho ibyobo byakira imyanda yo mu bwiherero byuzuye, bahabwa serivisi yo kuvidura iyo myanda ikajyanwa ahabugenewe. Abatanga iyo serivisi yo gukusanya na gutwara imyanda y’amazi yanduye na bo babisabira uruhushya ndetse bakaruhabwa bamaze kugaragaza ubushobozi mu gutanga izo serivisi.

Uburyo bwo gucunga  ibimoteri

Mu rwego rwo kunoza serivisi y’isuku ku buryo burambye, RURA inatanga impushya zirebana  no gucunga ibimoteri akenshi usanga bifitwe n’uturere n’imigi ariko bigahabwa  ba rwiyemezamirimo bakabicunga.

Imyanda itabashije kubyazwamo ibindi bikoresho irashyingurwa, ariko na byo bigakorwa mu buryo butandukanye hagendewe ku bwoko bw’imyanda; ibora n’itabora, kandi bigakorwa mu buryo batabangamiye ibidukikije.

Nzitonda Jacques Umuyobozi w’ishami rya  RURA rishinzwe kugenzura  amazi, isuku n’isukura ati: “ Kuva twatangira gushyiraho amabwiriza hari impinduka zigaragara zabayeho, abantu basobanukiwe impamvu ibikorwa by’isuku bigomba gukorwa mu buryo bunoze.”

Ushaka gutanga serivisi z’isuku  agomba kuba afite kompanyi yanditse mu Kigo k’Igihugu gishinzwe Iterambere (RDB), yaba ari koperative ikaba yanditswe mu Kigo gishinzwe Amakoperative (RCA).

RURA irakangurira abafite kompanyi zitanga serivisi z’isuku gukomeza kubahiriza amabwiriza, inibutsa  ko  hari ibihano biteganyijwe ku batayubahiriza. Inashishikariza abaturage kugaragaza ahari intege nke mu bikorwa by’isuku kugira ngo bikurikiranwe hakiri kare.

Bahamagara kuri numero za telefoni zikurikira: (+250) 252584562, (+250)  788430046,  (+250)  738182159, 0788318683 cyangwa bakohereza ubutumwa kuri Email: info@rura.rw

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.